خصوصی مواقع جیسے عید اور دیوالی پر مخصوص فلمیں ریلیزکرنے کا چلن رہا ہے لیکن اس سال دیوالی پر ایسی کوئی بڑی فلم ریلیز نہیں ہوئی جس کا پہلے سے چرچا رہا ہو۔ اس سال دیوالی کے موقع یعنی اس ہفتہ جو فلم ریلیز ہوئی ہے اس کا نام’ایک دیوانے کی دیوانیت‘ ہے۔ میلاپ زویری کی تحریر اور ہدایت کاری میں بننے والی یہ فلم، اپنے عنوان کے مطابق، یک طرفہ، جنونی محبت پر مبنی ہے۔ اگرچہ یہ فلم۹۰ءکی دہائی کی کلاسک لگ سکتی ہے، لیکن ہرش وردھن رانے اور سونم باجوہ کی کیمسٹری، سپر ہٹ گانے، اور محبت میں شدت کی کہانی ناظرین کو اپنی جانب متوجہ کرنے کی کوشش کرتی ہے۔

’ایک دیوانے کی دیوانیت‘ وکرمادتیہ بھوسلے (ہرش وردھن رانے) کی کہانی ہے، جو ایک بہت ہی طاقتور اور بااثر سیاست دان کا بیٹا ہے۔ وہ شہر میں اتنا اثر و رسوخ رکھتے ہیں کہ وزیر اعلیٰ بھی انہیں اپنی نشست پیش کرتے ہیں۔’میری مرضی ہی میری مرضی ہے‘ یہ اس کی زندگی کااہم ترین اصول ہے۔ بچپن سے ہی اس کے والد (سچن کھیڈیکر) نے اسے ایسے ماحول میں پالا ہے جہاں اس کی ہر خواہش حکم بن گئی۔ جب وکرم، طاقت اور اختیار کے نشے میں، بالی ووڈکی چمکدار ستارہ ادا (سونم باجوہ) پرجب اس کی نظر پڑتی ہے تو وہ اسے پانے کی ٹھان لیتا ہے۔ لیکن ادا کے لیے وکرم صرف ایک اور مغرور آدمی ہے، اور اس کے لیے محبت کا مطلب احترام اور مساوات کے سوا کچھ نہیں۔ جب وکرم اسے ایک ماہ کے اندر اس سے شادی کرنے کا الٹی میٹم دیتا ہے، اور اس پر زبردستی کرنے کے لیے ہر ضروری طریقہ استعمال کرنا شروع کر دیتا ہے، تو ادا  اندر تک ہل جاتی ہے۔یہ توہین اسے اندر تک زخمی کر دیتی ہے۔

اداکھلے عام اس کےخلاف کھڑی ہوجاتی ہے اور اس کی ضد کا جواب اسی تیور میں دیتی ہے۔ کہانی اس وقت ایک خطرناک موڑ لے لیتی ہے جب غصے اور انتقام کی حالت میں، ادا اعلان کرتی ہے کہ’’جو کوئی وکرم کو دسہرہ تک قتل کردے گا، میں اس کے ساتھ ایک رات گزاروں گی۔‘‘ اس کے بعد جو ہوتا ہے اس سے ایسے حالات پیدا ہوتے ہیںجو ہر کردار کی قسمت تبدیل کردیتے ہیں۔ وکرم کا پاگل پن، ادا کی مزاحمت اور ان کے درمیان کشمکش بالآخر انہیں ایک ایسے دوراہے پر لے جاتی ہے جہاں محبت، نفرت، طاقت اور تباہی کی سرحدیں دھندلا جاتی ہیں۔

ہدایت کار ملاپ زویری اور مصنف مشتاق شیخ کی کہانی میلو ڈرامائی موڑسے بھری ہوئی ہے، جس سے آپ کو حیرت ہوتی ہے کہ کیا ایسا ہو سکتا ہے۔ لیکن پھر، ایسا لگتا ہے کہ عنوان اس کہانی کے لئے نہایت مناسب ہے۔ڈائریکٹر نے بہت سے سین اوور دی ٹاپ بنائے ہیں، جومنطقی نہیں لگتے۔ تاہم، ممبئی کا رنگین پس منظر، ریٹرو تھیم پر مبنی موسیقی، خوبصورتی سے کوریوگراف اور ملبوسات والے گانے، بیک گراؤنڈ اسکور، اور۹۰ء کی دہائی میں پرانی یادیں فلم کے حق میں کام کرتی ہیں۔ماہر زویری کی ایڈیٹنگ چست ہو سکتی تھی لیکن نگم بومجان نے ممبئی کے مقامات کو خوبصورتی سے قید کیا ہے۔ موسیقاروں کی ایک بڑی تعداد پر مشتمل، ’تیرے دل پر حق میرا ہے‘،’بول کفارہ کیا ہوگا،‘’دل دل دل‘، اور’میرا ہوا‘ جیسے گانے فلم کی روح ہیں۔

ہرش وردھن رانے اور سونم باجوہ کی جوڑی محبت اور نفرت کی شدت کو پیش کرنے میں مکمل طور پر کامیاب رہی ہے۔پیار کیلئے کسی بھی حد تک جانے والے جنونی عاشق کے کردار میں ہرش وردھن رانے پوری طرح چمکتے ہیں۔ ان کے جذبات اور تاثرات پر اثرہیں جبکہ نفرت سے بھری ادا کا کردار ادا کرنے والی سونم باجوہ بھی اس سے مستثنیٰ نہیں ہیں۔ وہ گلیمرس اور خوبصورت نظر آتی ہیں، پھر بھی اپنی کارکردگی سے دل موہ لیتی ہے۔سپورٹنگ کاسٹ میں شاد رندھاوا اور سچن کھیڈیکر بھی متاثر کن ہیں۔

یہ فلم شدت سے بھرپور محبت کی کہانی  اوراس کے پر اثر گانوں کے لیے دیکھنے کے قابل ہے۔