وہ دن اس کی زندگی کے خوبصورت ترین دن تھے۔ اسے آج بھی یاد تھا جب فائنل ایئر کا نتیجہ آنے پر اس کے بہترین رزلٹ کی خوشی میں ایک چھوٹی سی سرپرائز پارٹی رکھی گئی تھی اور یہ سب کچھ اس کے والدین اور چھوٹے شان اور سامعہ نے مل کر اس کے لئے کیا تھا۔ وہ جب اپنے شاندار رزلٹ اور خوشی سے تمتماتے ہوئے چہرے کے ساتھ گھر پہنچی تو اس نے دیکھا گھر کی آرائش اس کے پسندیدہ سرخ گلاب اور سفید ڈیزی کے پھولوں سے اس قدر خوبصورت انداز میں کی گئی ہے کہ وہ مبہوت رہ گئی اور ان کی خوشبوؤں میں کھو سی گئی۔ حیرت اور خوشی کے ملے جلے جذبات کے ساتھ جب اس نے ڈرائنگ روم میں قدم رکھا تو ماما بابا سامعہ اور شان نے زوردار تالیوں سے اس کا استقبال کیا۔ وہ مسرور سی آگے بڑھی اور ماما کی پھیلی ہوئی بانہوں میں سما گئی۔

’’مجھے پتہ تھا میری روشنی ہے ہی اتنی قابل کہ اس سے ایسے ہی شاندار رزلٹ کی توقع کی جاسکتی ہے۔‘‘ ماما کے لہجے میں فخر صاف محسوس کیا جاسکتا تھا اپنوں کے اس قدر مان اور اعتماد نے اس کی پلکوں کو نم کر دیا۔ ’’مگر آپ سب کو کیسے پتہ چلا کہ مَیں نے کالج میں ٹاپ کیا ہے؟‘‘ اس نے کچھ کچھ سمجھتے ہوئے بھی انجان بننے کی کوشش کی۔ ’’بھئی یہ تمہارا بھائی صبح سے کمپیوٹر سے چپک کر بیٹھا ہوا تھا جیسے ہی رزلٹ آن لائن ہوا معلوم کرنا کیا مشکل تھا اور پھر نور کا فون بھی آگیا۔‘‘ بابا ہنستے ہوئے بولے۔ ’’لیکن یہ اتنی تیاری آپ لوگوں نے کب اور کیسے کر لی؟‘‘ روشنی کی حیرتیں ختم ہونے کو نہ آرہی تھیں۔ ’’ارے ہم رات سے ہی خفیہ تیاری میں مصروف تھے، چلو اب تمہارے سوالات ختم ہوگئے ہوں تو ہم کیک کاٹ لیں۔‘‘ شان بے صبری سے کہہ اٹھا اور وہ مسکراتی ہوئی حامی بھر گئی۔ بابا کی لاڈلی بیٹی، ماما کی فرمانبردار، شان کی کرائم پارٹنر، سامعہ کی پیاری دیدی ایسی ہی تھی ہر وقت ہنستی مسکراتی ذہین و فطین، ہر ایک کا خیال رکھنے والی، محبت کرنے والی روشنی۔

ز ز ز

’’بھئی اگر آج تم اپنے خیالوں کی دنیا سے باہر آجاؤ تو بتا دینا کہ کھانے کے لئے کچھ ملے گا یا یوں ہی خالی پیٹ سونا پڑے گا۔‘‘ سمیر کی پاٹ دار آواز سے وہ چونک کر حواسوں کی دنیا میں لوٹ آئی، ’’جی.... جی! کیوں نہیں کھانا تو مَیں نے صبح ہی تیار کر لیا تھا بس روٹیاں ڈالنی باقی ہیں۔‘‘ ’’تو پھر ذرا زحمت فرما ہی دو روٹیاں پکانے کی۔‘‘ سمیر نے کڑوے لہجے میں کہا۔ بات بات پر غصہ کرنا طعنے دینا اس کی فطرت ثانیہ تھی، روشنی کبھی تو کڑوے گھونٹ کی طرح پی جاتی اور کبھی اس کی آنکھیں چھلک پڑتیں، دونوں ہی صورتوں میں سمیر پر کوئی خاص فرق نہیں پڑتا۔

ان کی تین سالہ ازدواجی زندگی کا آغاز ابتدا سے ایسا نہیں تھا یا پھر روشنی نے نوٹس کرنا ہی دیر سے شروع کیا وہ آج تک سمجھ نہ پائی۔ کچن میں آ کر اس نے جلدی سے اپنے ہاتھ تیزی سے چلانے شروع کر دیئے وہ تو شکر ہے اماں کسی رشتہ دار کے ہاں دعوت پر مدعو تھیں ورنہ ان کے ہائے واویلے جو بیٹے کے دفتر سے آتے ہی شروع ہو جاتے روشنی کے ہاتھ پیر پھلا دیتے۔ اس نے جلدی جلدی گرما گرم پھلکے اتارے اور ڈائننگ ٹیبل پر کھانا لگ جانے کی اطلاع سمیر کو دی۔ موبائل فون میں مگن سمیر نقص نکال نکال کر کھانا کھاتا رہا اور کھانا ختم کرنے کے بعد اسے چائے لانے کی ہدایت دیتے ہوئے اپنے کمرے کا رخ کیا اور روشنی جھوٹے برتن سمیٹتے ہوئے آج پھر بغیر کھائے رہ گئی۔

ز ز ز

’’بابا! مجھے یونیورسٹی چھوڑ دیں مَیں ذرا ایڈمیشن کی تفصیلات پتہ کر لوں مجھے اب نفسیات میں ماسٹرز کرنا ہے۔‘‘ اس نے بابا کو اطلاع دی۔ ’’بابا کی جان ہم تو تمہارے لئے کچھ اور سوچے بیٹھے ہیں۔‘‘ بابا نے محبت پاش نظروں سے اسے دیکھتے ہوئے کہا۔ ’’بابا! مجھے آگے پڑھنا ہے۔‘‘ روشنی نے ان کے اشارے کو سمجھتے ہوئے قطعیت سے کہا۔ ’’اوکے اوکے بیٹا! ہم تمہاری اعلیٰ تعلیم کی راہ میں بالکل نہیں آئینگے لیکن ایک بار اس پروپوزل پر نظر تو ڈال لو ہم رشتہ طے کئے دیتے ہیں، شادی تعلیم مکمل ہونے کے بعد سہی۔‘‘ ’’بابا میرا فوکس ہٹ جائے گا پڑھائی سے۔‘‘ اس نے ملتجیانہ نظروں سے فراز صاحب کی طرف دیکھا تو فراز شاہ جو ایک پرائیویٹ کمپنی میں منیجر کے عہدے پر فائز تھے، بہت محبت کرنے والے باپ تھے اپنی بیٹی کی خواہش کے آگے زیر ہوگئے۔ لیکن شو مئی قسمت یونیورسٹی کے پہلے سال ہی میں فراز شاہ کی ایک سڑک حادثے میں ناگہانی موت نے ان کے اہل خانہ کو ایک ایسے صدمے سے دو چار کر دیا جس نے ان کی زندگی کو بالکل بدل کر رکھ دیا۔ ملازمت پیشہ شخص کے پاس جائیداد اور بینک بیلنس کے نام پر ہوتا ہی کیا ہے کہ لے دے کر ایک ذاتی مکان اور معمولی سا اثاثہ ہی ان کا کل سرمایہ تھا۔ اپنوں کی بے اعتنائی جھیلتے فرحت آراء اپنے تینوں بچوں کے ساتھ دنیا میں تنہا رہ گئیں۔ شان اور سامعہ ابھی اسکول میں زیر تعلیم تھے اور روشنی کی تعلیم بھی مکمل نہ تھی ایسے میں ان کا سہارا بنے فراز شاہ کے قریبی دوست جواد ملک جنہوں نے اپنے دوست کے یتیم بچوں کے سروں پر ہاتھ رکھا اور اس طرح زندگی کی گاڑی دھیرے دھیرے آگے بڑھنے لگی۔ شوہر کی ناگہانی موت نے فرحت آراء کو توڑ کر رکھ دیا، اپنوں کی بے رخی نے رشتوں پر سے ان کا اعتماد اٹھا دیا۔ ان کی صحت روز بروز گرنے لگی اور انہیں روشنی کو اپنے گھر کا کر دینے کی فکر ستانے لگی۔ ایک بار پھر جواد ملک آگے آئے اور اپنے اکلوتے بیٹے سمیر ملک کا رشتہ روشنی کے لئے پیش کیا۔ روشنی شروع سے بہت فرمانبردار بچی تھی اپنی ماں کی خواہش کے پیش نظر اپنی اعلیٰ تعلیم حاصل کرنے کی آرزو کو دل میں چھپا کر بہت سادگی کے ساتھ سمیر کی دلہن بن کر اس کے گھر آگئی۔ جہاں زندگی اس کے لئے پھولوں کی سیج ثابت نہ ہوئی شہناز بیگم جو اپنے بیٹے کی شادی اپنی امیر کبیر بہن کی بیٹی سے کرنے کہ خواب سجائے بیٹھی تھیں انہیں اس یتیم لڑکی کے وجود سے شروع دن سے ہی پرخاش رہی۔ روشنی کی خوبصورتی اور سلیقہ شعار طبیعت بھی ان کے دل سے اس غم کو جدا نہ کرسکی۔ سمیر شروعاتی دنوں میں تو روشنی کے ساتھ محبت سے پیش آتا رہا لیکن جلد ہی روشنی پر یہ واضح ہوگیا کہ اس کا شوہر غصہ ور اور شکی مزاج انسان ہے اور اس کے سارے سنہرے خواب سمیر کے مزاج کی تپش سے بھاپ بن کر تحلیل ہوگئے۔

گزشتہ تین برسوں سے انہی تلخ حقیقتوں کے ساتھ روشنی اپنی زندگی کی گاڑی کھینچ رہی تھی۔ اس کے ہزار احتیاط کے باوجود شہناز بیگم کو کوئی نہ کوئی موقع مل ہی جاتا اسے ذلیل کرنے کا۔ روزانہ سمیر کے آفس سے آنے کے بعد اماں جی روشنی کی دن بھر کی کارکردگی کی رپورٹ مرچ مسالہ لگا کر پیش کرتیں اور سمیر کا پارہ چڑھ جاتا اور پھر روشنی کی کلاس لگ جاتی۔ جواد ملک کی موجودگی اس پورے گھر میں روشنی کیلئے باعث غنیمت تھی لیکن مختصر عرصے بیمار رہ کر جب ابا جی بھی ملک عدم سدھارے تو روشنی سارے گھر میں تنہا رہ گئی۔

’’محترمہ اگر اپنے ماضی کے سوگ سے باہر آگئی ہو تو میرے کپڑے پریس کر دو، مجھے آج رات ڈنر پر جانا ہے۔‘‘ سمیر کی درشت آواز نے اسے حقیقت کی دنیا میں لاپٹخا اور برتن دھوتے اس کے ہاتھ تیزی سے چلنے لگے۔ ’’نہ جانے کون سے خیالوں میں کھوئی رہتی ہے اور مجال ہے جو کبھی اس کے چہرے کو مسکراہٹ چھو جائے....‘‘ شہناز بیگم کچن سے باہر آتے ہوئے بڑبڑائیں۔ وہ غلطی سے اس وقت کچن میں جا پہنچی تھیں جو روشنی کے کام کا وقت تھا۔ آپ لوگ کبھی خوش ہونے کا موقع تو دیں، مَیں مسکرانا تو کیا قہقہے لگانا بھی جانتی تھی۔ روشنی نے دل گرفتہ انداز میں سوچا اور سمیر کے کپڑے استری کرنے چل دی۔

’’سمیر کیا آپ آج مجھے ڈنر پر جانے سے قبل ماما کے گھر چھوڑ دینگے۔ کئی دنوں سے ماما کی طبیعت ناساز ہے۔ میرا ان سے ملنے کا بہت دل چاہ رہا ہے۔‘‘ وہ عام طور سے ایسی فرمائشیں کرتی تو نہیں تھی کہ شہناز بیگم کو اس کا میکے جانا سخت ناپسند تھا اور سمیر کو بیوی کی پسند ناپسند کی پروا ہی کب تھی۔ لیکن اس روز اس نے ہمت کرکے درخواست کر ہی ڈالی۔ سمیر پہلے تو اسے گھورتا رہا اور پھر بادل ناخواستہ تیار ہوگیا۔ اس نے جلدی سے وارڈروب سے کپڑے نکالے اور ہلکا پھلکا سا تیار ہو کر کہ ماں کے سامنے خوش ہونے کا بھرم بھی قائم رکھنا تھا بڑی سی چادر میں خود کو چھپا لیا۔ سمیر اسکے سراپے پر نظر ڈال کر تنفر سے کہا کہ، ’’اتنی تیاری کس لئے کون ہے جو وہاں انتظار میں بیٹھا ہے جس کا غم ہر وقت مناتی رہتی ہو؟‘‘ ’’کچھ تو خدا کا خوف کریں سمیر ایسی بات کرتے ہوئے، آپ جانتے ہیں میری ماما کی صحت ٹھیک نہیں رہتی ان کے سامنے میں بہتر حال میں جانا چاہتی تھی بس اسلئے کہ ان کے دل کو سکون حاصل رہے۔‘‘ اس کی پلکیں بھیگنے لگیں۔ پچھلے تین برسوں سے وہ سمیر کے منہ سے اتنا کچھ سن چکی تھی کہ اسکے اندر کی ساری خواہشیں مر چکی تھیں۔ سمیر کے زہر آلود جملوں نے اس کو اندر سے مار کر رکھ دیا تھا اور آج تک وہ یہ ذلت سہنے کی عادی نہ ہوسکی۔