کرناٹک کے وزیر اعلیٰ بی ایس یدی یورپا نے منگلور میں پولیس فائرنگ میں مارےجانے والے ۲؍ مظاہرین کو۱۰۔۱۰؍ لاکھ روپے معاوضہ دینےکے اپنے حکم سے یوٹرن لے لیا ہے۔ انہوںنے کہا کہ دونوںمہلوکین مجرمانہ الزامات کا سامنا کر ر ہے تھے اور ایسے لوگوں کو معاوضہ دیئے جانے کی کوئی روایت نہیں ہے۔

 منگلور : کرناٹک کے وزیر اعلیٰ بی ایس یدی یورپا نے منگلور میں پولیس  فائرنگ میں مارےجانے والے ۲؍ مظاہرین کو۱۰۔۱۰؍ لاکھ روپے  معاوضہ دینےکے اپنے حکم  سے یوٹرن لے لیا ہے۔ یدی یورپا نے بدھ کو  پریس کانفرنس سے خطاب کرتے ہوئے کہا کہ ۱۹؍ دسمبر کو منگلور میں ہونے والے تشدد میں پولیس کی گولی لگنے سے دو  ہلاک شدگان  کے اہل خانہ کو معاوضہ نہیں دیاجائے گا کیونکہ دونوں مہلوکین مجرمانہ الزامات کا سامنا کر ر ہے تھے اور ایسے لوگوں کو معاوضہ دیئے جانے کی کوئی روایت نہیں ہے۔
 وزیر اعلیٰ نے کہا کہ معاوضہ کی ادائیگی کا فیصلہ ریاستی حکومت کی طرف سے سی آئی ڈی اور مجسٹریٹ تحقیقات کے مکمل ہونے کے بعد ہی کیا جائے گا۔ پولیس  فائرنگ کے متاثرین کے اہل خانہ کو معاوضہ کی ادائیگی  سے پلٹنے کے اپنے فیصلے کا دفاع کرتے ہوئے انہوں نے کہا کہ وہ لوگ جو مجرمانہ  معاملے کا سامنا کر رہے ہیں، انہیں معاوضہ دینے کا  التزام نہیں ہے۔ اس سے پہلے  یدی یورپا نے سینئر پولیس افسران کے ساتھ ملاقات کر کے شہر کے موجودہ حالات کی معلومات حاصل کی تھی ۔۱۹؍ دسمبر کو ہونے والےاحتجاج میں فائرنگ سے۲؍ مظاہرین کی موت ہوگئی تھی۔