مسلمانوں کیخلاف نفرت انگیز ویڈیو پوسٹ کرنے کے معاملے میں کانگریس نے پولیس اور الیکشن کمیشن میں شکایت درج کرائی تھی

مسلمانوں کے خلاف نفرت انگیز ویڈیو پوسٹ کرنے کے معاملے میں کانگریس پارٹی کے ریاستی یونٹ کی جانب سے درج کرائی گئی شکایت پر بنگلور پولیس نے بی جے پی صدر جے پی نڈا اورپارٹی کے آئی ٹی سیل کے سربراہ امیت مالویہ کو پوچھ تاچھ کے لئے سمن جاری کردیا ہے۔ واضح رہے کہ گزشتہ روز ہی کارروائی کرتے ہوئے الیکشن کمیشن نے ٹویٹر سے یہ پوسٹ فوری طور پر ہٹانے کی ہدایت دی ہے اور اس پر اعتراض بھی ظاہر کیا ہے۔ اس کارروائی کے بعد ہی بنگلور پولیس نے یہ سمن جاری کیا ہے اور  بی جے پی کے دونوں ہی لیڈران کوبنگلور شہر کے ہائی گرائونڈس  پولیس اسٹیشن میں طلب کیا گیا ہے۔ اس سمن پر فی الحال بی جے پی کی جانب سے کوئی باقاعدہ ردعمل نہیں آیا ہے لیکن پارٹی کے باوثوق ذرائع کا کہنا ہے کہ وہ اس سمن کا جواب دینے پر غور کررہے ہیں لیکن فی الحال پیش ہونے پر کوئی فیصلہ نہیں کیا گیا ہے۔
 واضح رہے کہ گزشتہ دنوں کرناٹک بی جے پی کے ٹویٹر اکائونٹ سے ایک اینی میشن ویڈیو ایکس پر پوسٹ کیا گیا تھا جس میںمسلمانوں کو نشانہ بناتے ہوئے راہل گاندھی پر بھی تنقید کی گئی تھی اور بتایا گیا تھا کہ کیسے ایس سی ، ایس ٹی اور او بی سی کا ریزرویشن چھین کر مسلمانوں کو دے دیا جائے گا۔ اس ویڈیو پر کانگریس پارٹی نے شدید اعتراض کرتے ہوئے نہ صرف الیکشن کمیشن میں شکایت درج کروائی بلکہ پولیس میں بھی ایف آئی آر کروائی تھی ۔ جس کے بعد الیکشن کمیشن نے فوری طور پر ویڈیو ہٹانے کا حکم دیا جبکہ اب پولیس نے بھی کارروائی کرتے ہوئے جے پی نڈا اور امیت مالویہ کو سمن جاری کیا ہے اور دونوں کو پیش ہونے کی ہدایت دی ہے۔