ہندوستانی فضائیہ کی ایئر وائس مارشل شکتی شرما ملک کی مسلح افواج میں پہلی خاتون افسر بنی ، جنہوں نے ایئر وائس مارشل یا اس کے مساوی رینک حاصل کیا، اس سے قبل وہ ایئر کموڈور کے رینک پر فائز تھیں۔

ہندوستانی فضائیہ کے لیے ایک تاریخی لمحہ تھا جب، ایئر وائس مارشل شکتی شرما ملک کی مسلح افواج میں پہلی خاتون افسر (غیر طبی) بن گئی ہیں، جنہوں نے ایئر وائس مارشل یا اس کے مساوی رینک حاصل کیا۔ حکام نے منگل یکم ستمبر۲۰۲۶ء کو یہ معلومات دیں۔انہوں نے یکم ستمبر کو فضائیہ کے مرکزی ہیڈکوارٹر میں اسسٹنٹ چیف آف دی ایئر سٹاف (تعلیم) کا عہدہ سنبھال لیا۔ اس سے قبل وہ ایئر کموڈور کے رینک پر فائز تھیں۔دفاعی وزارت کے مطابق، یہ تقرری ہندوستانی دفاعی افواج میں خواتین افسران کے لیے ایک سنگ میل ہے۔

یہ بھی پڑھئے: امیت شاہ کی تقاریب سے مسلم افسران کو دور رکھنے کا الزام، مہوا موئترا برہم

واضح رہے کہ شکتی شرما کو۱۸؍ جون۱۹۹۴ء کو فضائیہ کے ایجوکیشن برانچ میں کمیشن ملا۔ انہیں تربیتی اداروں، فیلڈ اسٹیشنز، کمانڈ ہیڈکوارٹرز اور ایئر ہیڈکوارٹر میں خدمات کا وسیع تجربہ ہے۔انہوں نے اپنے کیریئر میں اہم ادارہ جاتی اقدامات کی قیادت کی، جن میں آئی آئی ٹی کانپور اور پونے یونیورسٹی میں آئی اے ایف چیئرز آف ایکسیلنس کا قیام شامل ہے تاکہ تعلیمی اور اسٹریٹجک دفاعی تعاون کو فروغ دیا جا سکے۔ نیز، وہ تینوں خدمات سے پہلی خاتون افسر ہیں جنہوں نے سینک اسکول (کپور تھلہ) کی پرنسپل کی حیثیت سے کمانڈ کیا۔یہ کامیابی ہندوستانی دفاعی افواج میں خواتین افسران کے سفر کا نیا باب ہے۔ تین دہائیوں سے زائد کی شاندار خدمات کے ساتھ، وہ نسل در نسل فضائیہ کے نعرے ’’شان سے آسمان کو چھونا‘‘ کی ترغیب دیتی رہیں گی۔