اتوار کا دن گزرنے کے بعد آدھی رات کو گودھرا جیل میں خود سپردگی کی

بلقیس بانو کیس کے تمام ۱۱؍ مجرمین بالآخر جیل پہنچ گئے ہیں۔ انہوں  نے اتوار کی رات پونے ۱۲؍ بجے گودھرا جیل پہنچ کر خود سپردگی کی۔ اہم بات یہ ہے کہ سپریم کورٹ نے انہیں  اتوار کی شام ۵؍ بجے تک خود سپردگی کی ہدایت دی تھی مگر وہ دو گاڑیوں  میں سوار ہوکر آدھی رات کو گودھرا جیل پہنچے۔ 
مجرمین نے یہ خود سپردگی سپریم کورٹ کو قانونی داؤ پیچ میں الجھانے کی کوشش میں ناکامی کے بعد کی ہے۔ اس سے قبل انہوں نے سپریم کورٹ سے استدعا کی تھی کہ انہیں کچھ مہلت دی جائے جس سے کورٹ نے انکار کردیاتھا۔ جسٹس بی وی ناگرتنااور اجل بھویاں کی بنچ نےمجرمین کی درخواستوں کو مسترد کرتے ہوئے کہا کہ مزید وقت کےمطالبہ کی کوئی معقول اور اہم وجہ نہیں  ہے۔ اس سے قبل  سپریم کورٹ نے بلقیس بانو کیس کے مجرمین کی رہائی کے گجرات حکومت کے فیصلے کو کالعدم قراردیتے ہوئے انہیں نہ صرف ۲؍ ہفتوں  کے اندر خود سپردگی کی ہدایت دی تھی بلکہ گجرات سرکار کو بھی اس کیلئے آڑے ہاتھوں لیاتھا۔ کورٹ  نے مجرمین پر کورٹ کے ساتھ فراڈ کا الزام عائد کیا اور نشاندہی کی کہ انہوں نے عدالت کو گمراہ کرکے یہ فیصلہ حاصل کیا کہ ان کی رہائی کا فیصلہ کرنے کیلئے جواز حکومت گجرات سرکار  ہے۔ کورٹ نے مذکورہ فیصلے کو کالعدم قراردیا اور گجرات سرکار کو  ملزمین کے ساتھ ملی  بھگت پر آڑے ہاتھوں  لیا۔ کورٹ نے   نشاندہی کی کہ یہ جانتے ہوئے کہ  وہ مجرمین کی رہائی کافیصلہ کرنے والی مجاز حکومت نہیں  ہے، گجرات حکومت نے عدالت کو اس سے آگاہ نہیں کیا اور اقتدار کا ناجائز فائدہ اٹھاتے ہوئے  مجرمین کو رہاکرنے کا حکم سنایا۔اس معاملے میں مجاز حکومت مہاراشٹر سرکار تھی۔