امریکہ کی ریاست جارجیا کے تفریحی پارک ’سکس فلیگس اوور جارجیا‘ میں رولر کوسٹر حادثے کے نتیجے میں ایک شخص ہلاک اور متعدد زخمی ہوگئے۔ حادثے کے بعد انتظامیہ نے احتیاطی طور پر چھ تفریحی پارکوں میں ۹؍ رولر کوسٹر جھولے عارضی طور پر بند کردیے، جبکہ پولیس نے واقعے کی تحقیقات شروع کردی ہیں۔

امریکہ کی ریاست جارجیا کے ایک تفریحی پارک میں پیر کے روز رولر کوسٹر سے متعلق حادثے میں ایک شخص کی موت ہوگئی، جبکہ متعدد دیگر افراد زخمی ہوگئے۔ یہ واقعہ اٹلانٹا کے قریب واقع ’سکس فلیگس اوور جارجیا‘ تفریحی پارک میں پیش آیا۔ پولیس کے مطابق حادثہ مقامی وقت کے مطابق شام تقریباً ۴؍ بجے سے کچھ پہلے پیش آیا۔ حکام نے واقعے کی وجوہات جاننے کے لیے تحقیقات شروع کردی ہیں۔ کوب کاؤنٹی پولیس ڈپارٹمنٹ کے مطابق پارک میں تعینات اہلکاروں اور گشت کرنے والی پولیس نے واقعے کے بعد فوری طور پر کارروائی کی۔ پولیس کے میجر کرائمز یونٹ کے تفتیش کاروں کو واقعے کے حالات کا جائزہ لینے کی ذمہ داری سونپی گئی ہے۔ تاہم، حکام نے اب تک یہ واضح نہیں کیا کہ حادثہ کس طرح پیش آیا، ہلاک ہونے والے شخص کی موت کی وجہ کیا تھی یا زخمی ہونے والے افراد کی حالت کیسی ہے۔

ABD’de lunaparka giden bir kişi, 60 metre yüksekliğe sahip yüksek hızlı Roller Coaster`ın üstünden düşerek feci şekilde hayatını kaybetti. https://t.co/FR9zs743TJ

— BPT (@bpthaber) October 12, 2026

مقامی ذرائع ابلاغ کے مطابق عینی شاہدین نے ایک شخص کو رولر کوسٹر سے گرتے ہوئے دیکھنے کا دعویٰ کیا۔ تاہم، پولیس نے اس بات کی تصدیق نہیں کی کہ وہ شخص جھولے سے گرا تھا یا واقعے کے پیچھے کوئی دوسری وجہ تھی۔ حکام کی جانب سے تحقیقات مکمل ہونے تک حادثے کی اصل وجہ غیر واضح ہے۔ تاہم حادثے کے بعد پارک کی ’گولیاتھ‘ نامی رولر کوسٹر کو بند کردیا گیا اور اس پر سوار افراد کو محفوظ طریقے سے باہر نکالا گیا۔ مقامی ٹیلی ویژن چینلوں کی فوٹیج میں جھولے کے قریب امدادی سرگرمیاں اور مسافروں کو باہر نکالنے کے مناظر دکھائے گئے۔ اگرچہ پولیس نے ابتدائی طور پر متعلقہ رولر کوسٹر کا نام نہیں بتایا، لیکن ذرائع ابلاغ کی تصاویر میں گولیاتھ جھولے کو رکا ہوا دیکھا گیا۔

گولیاتھ رولر کوسٹر کا افتتاح ۲۰۰۶ء میں کیا گیا تھا۔ پارک کی ویب سائٹ کے مطابق یہ جھولا تقریباً ۲۰۰؍ فٹ (۶۱؍ میٹر) بلند ہے اور اس کی رفتار ۷۰؍ میل فی گھنٹہ، یعنی تقریباً ۱۱۳؍ کلومیٹر فی گھنٹہ تک پہنچ سکتی ہے۔ یہ پارک کے نمایاں جھولوں میں شمار ہوتا ہے۔ حادثے کے بعد سکس فلیگس انتظامیہ نے احتیاطی اقدام کے طور پر اپنے چھ تفریحی پارکوں میں ۹؍ رولر کوسٹر جھولے عارضی طور پر بند کردیں۔ کمپنی کے ترجمان کے مطابق یہ فیصلہ ان جھولوں کے ساتھ ممکنہ مماثلت کو مدنظر رکھتے ہوئے کیا گیا اور اس کا مقصد احتیاط برتنا تھا۔ کمپنی نے کہا کہ پارک کی انتظامیہ اور مقامی حکام نے فوری کارروائی کی اور وہ تحقیقات میں مکمل تعاون کررہے ہیں۔

یہ بھی پڑھئے: آئن لائن سیل میں ۲؍دنوں میں ۲۴؍ ہزار کروڑ کی فروخت

سکس فلیگس نے واقعے پر افسوس کا اظہار کرتے ہوئے ہلاک ہونے والے شخص کے اہلِ خانہ اور دوستوں سے تعزیت کی۔ کمپنی کے مطابق حادثے سے متاثر ہونے والے دیگر مہمانوں اور ملازمین کو بھی مدد فراہم کی جارہی ہے۔ انتظامیہ نے اہلِ خانہ کی رازداری کا احترام کرتے ہوئے مزید تفصیلات جاری نہ کرنے کا فیصلہ کیا ہے۔ تاہم واقعے کی تحقیقات جاری ہیں اور حکام کی جانب سے حادثے کی وجہ اور زخمیوں کی حالت سے متعلق مزید معلومات سامنے آنے کا انتظار ہے۔