ترکی کے کیچی اورن ضلع کے اسکول میں خصوصی تقریب؛ ترک وزارتِ قومی تعلیم کی ہدایت پر ملک بھر کے طلبہ میں غزہ کی صورتحال سے متعلق آگاہی پیدا کرنے کی مہم۔

ترکی کے دارالحکومت انقرہ کے کیچی اورن ضلع میں طلبہ نے غزہ کے بچوں سے اظہارِ یکجہتی کے لیے ’’پتنگیں نہ گراؤ، آسمان بچوں کے لیے رہنے دو‘‘ کے عنوان سے ایک خصوصی تقریب میں شرکت کی۔ یہ تقریب ۱۶؍ ستمبر ۲۰۲۶ء کو ایک مقامی اسکول میں منعقد ہوئی، جس کا مقصد طلبہ کو غزہ میں جاری صورتحال سے آگاہ کرنا اور بچوں کے لیے امن و تحفظ کی اہمیت اجاگر کرنا تھا۔ یہ سرگرمی ترکی کی وزارتِ قومی تعلیم کی ہدایت کے تحت منعقد کی گئی۔ اس مہم کے ذریعے ملک کے مختلف علاقوں میں طلبہ کو غزہ میں بچوں کو درپیش حالات سے آگاہ کرنے اور انسانی ہمدردی کے جذبات اجاگر کرنے کی کوشش کی جا رہی ہے۔ تقریب کے دوران طلبہ نے پتنگیں اڑائیں، جبکہ شرکا نے ایسے پیغامات پر مشتمل بینرز بھی اٹھائے جن میں بچوں کے لیے آسمان، آزادی اور محفوظ زندگی کی علامت کے طور پر پتنگوں کا حوالہ دیا گیا۔ تقریب کا مرکزی پیغام یہی تھا کہ آسمان بچوں کے کھیلنے، خواب دیکھنے اور آزادانہ زندگی گزارنے کے لیے ہونا چاہیے، نہ کہ جنگ اور خوف کی علامت بنے۔

یہ بھی پڑھئے: غزہ: اسرائیل کی جانب سے حملوں کی دھمکی کے بعد معصوم فلسطینی بچہ اپنی پسندیدہ پتنگیں پھاڑنے پر مجبور

غزہ کے بچوں سے متعلق یہ تعلیمی سرگرمی ترکی میں اسکولوں کے ذریعے طلبہ میں عالمی انسانی مسائل کے بارے میں شعور پیدا کرنے کی وسیع تر کوشش کا حصہ ہے۔ وزارتِ قومی تعلیم کی ہدایت کے مطابق اس نوعیت کی سرگرمیوں کا مقصد طلبہ کو غزہ میں جاری انسانی بحران سے آگاہ کرنا ہے۔