کانگریس کے جنرل سیکریٹری جے رام رمیش نے تلنگانہ کے حوالے سے کہا کہ ملک میں سب سے زیادہ بے روزگاری تلنگانہ میں ہے جبکہ ریاست میں نوجوانوں کی خودکشی کی شرح میں اضافہ ہوا ہے۔ تلنگانہ کے قیام کی اہم وجہ نوجوانوں کو روزگار فراہم کرنا تھا لیکن وہاں بے روزگار ی کی شرح ۱۵؍ فیصد ہے۔

کانگریس کے سینئر لیڈر جے رام رمیش نے الزام عائد کیاکہ ملک میں سب سے زیادہ بے روزگاری تلنگانہ میں ہے۔جے رام رمیش نے کھم میں رپورٹرس سے بات چیت کرتے ہوئےکہا کہ تلنگانہ کی تکمیل کی اہم وجہ نوجوانوں کو روزگار فراہم کرنا تھی لیکن ہم ۱۰؍سال بعد (تلنگانہ کے قیام کے) کیا دیکھ رہے ہیں کہ ملک میں سب سے زیادہ بے روزگاری کی شرح تلنگانہ میں ہی ہے۔پورے ہندوستان میں بے روزگاری کی شرح ۱۰؍ فیصد ہےجبکہ تلنگانہ میں بے روزگاری کی شرح ۱۵؍ فیصد ہے۔کانگریسی لیڈر نے یہ بھی دعویٰ کیا کہ تلنگانہ میںنوجوانوں کی خودکشی کی شرح بھی بڑھی ہے۔ انہوں نے تلنگانہ میں پرچوں کے لیک ہونے پر بھی بی آر ایس کونشانہ بنایا۔ ۱۰؍ سال بعد بھی تلنگانہ میں بے روزگاری ہےاور نوجوان بڑے پیمانے پر خودکشی کر رہے ہیں۔تلنگانہ کے قیام کی دوسری اہم وجہ تھی کہ سرمایہ کاری کے تمام مواقع اور حکومتی ادارے حیدرآباد میں موجودتھے۔تلنگانہ کے قیام کے وقت مقصد یہ تھا کہ ضلع جیسے کھمام اور کریم نگر میں سرمایہ کاری اور ترقی میں اضاضہ ہو۔
وزیر اعلیٰ کے چندر شیکھر راؤ کے بیٹے اور کے ٹی راما راؤ نے کہا تھا کہ وہ’’برانڈ حیدرآباد ‘‘ بنائیں گے۔ کانگریس نے برانڈ حیدرآباد کے ساتھ برانڈ تلنگانہ بنانےکیلئے تلنگانہ کی بنیاد ڈالی تھی۔کانگریس نے اس لئے تلنگانہ ریاست تشکیل دی تھی تا کہ تمام اضلاع ترقی حاصل کر سکیں نہ کہ صرف حیدرآباداور اس کے پڑوسی اضلاع۔افسوس کی بات ہے کہ ۱۰؍ سال بعد بھی تلنگانہ کے قیام سے صرف حیدرآباد کو فائدہ پہنچا ہے۔ انہوں نے مزید کہا کہ کانگریس کی لیڈر سونیا گاندھی اور سابق وزیر اعظم منموہن سنگھ نے تلنگانہ کے قیام میں اہم کردار ادا کیا تھا۔