بنگلہ دیشی استغاثہ کا کہنا ہے کہ شیخ حسینہ کے پاس پھانسی کا سامنا کرنے کے سوا کوئی قانونی متبادلنہیں ہے،جبکہ منگل کو حسینہ کے دسمبر میں واپس آنے کے ارادے پر کشیدگی کے دوران ہونے والی آتش زنی کے حملوں اور دیسی بم دھماکوں کی لہر میں ایک شخص ہلاک ہو گیا۔

دی ڈیلی اسٹار کے مطابق بنگلہ دیش کے انٹرنیشنل کرائمز ٹریبونل کے چیف پراسیکیوٹر محمد امین الاسلام نے منگل کو کہا کہ معزول وزیر اعظم شیخ حسینہ کے پاس اگر وہ ملک واپس آتی ہیں تو اپنی سزائے موت پر عمل درآمد کا سامنا کرنے کے سوا کوئی قانونی متبادل نہیں ہے۔اسلام نے یہ تبصرے اس کے ایک دن بعد کیے جب یہخبر آئی  کہ حسینہ نے بنگلہ دیش واپس آنے میں آسانی کے لیے نئے پاسپورٹ اور قومی شناختی کارڈ کے لیے درخواست دی تھی۔واضح رہے کہ استغاثہ کے تبصرے آتش زنی کے حملوں اور دیسی بم دھماکوں کی لہر کے درمیان آئے جو حسینہ کے دسمبر میں ملک واپس آنے کے بیان کے بعد پیدا ہونے والی کشیدگی کے سبب ہوئے۔اسلام نے کہا کہ نومبر۲۰۲۵ء کے فیصلے کے خلاف اپیل دائر کرنے کے لیے۳۰؍ دن کی مدت ختم ہو چکی ہے جس میں انہیں سزائے موت سنائی گئی تھی۔

یہ بھی پڑھئے: بروکلین جیل میں قید نکولس مادورو کا مذہب کی طرف رجحان، بائبل اور قرآن کا مطالعہ

واضح رہے کہ حسینہ کو بنگلہ دیش کے انٹرنیشنل کرائمز ٹریبونل نے نومبر۲۰۲۵ء میں۲۰۲۴ء میں مظاہرین کے خلاف مہلک کریک ڈاؤن کے سلسلے میں انسانیت کے خلاف جرائم کے لیے سزائے موت سنائی تھی۔اسلام کے حوالے سے کہا گیا کہ ٹریبونل کے قانون میں مدت سے آگے اپیل کی اجازت نہیں ہے اور سزا پر عمل درآمد کے سوا کوئی متبادل نہیں ہے۔انہوں نے یہ بھی کہا کہ سزائے موت پانے والے کسی شخص کو پاسپورٹ یا سفری دستاویز جاری کرنے کی کوئی قانونی بنیاد نہیں ہے۔ بنگلہ دیش پاسپورٹ آرڈر کا حوالہ دیتے ہوئے، انہوں نے کہا کہ اس کی دفعات بعض جرائم میں سزا یافتہ افراد کو پاسپورٹ جاری کرنے پر پابندی لگاتی ہیں، بشمول ان لوگوں کو جنہیںاخلاقی پستی سے متعلق جرائم کے لیے کم از کم دو سال قید کی سزا سنائی گئی ہو۔ انہوں نے مزید کہا، ’’اگر حسینہ واقعی واپس آنا چاہتی ہیں، تو انہیں حوالگی کے معاہدے کے تحت اپنی واپسی کے لیے ہندوستانی حکومت سے تحریری درخواست کرنی چاہیے۔‘‘

یہ بھی پڑھئے: مصر میں ٹرینوں کے درمیان تصادم،۷؍ افرادجاں بحق،۱۰۰؍ سے زائد زخمی

ذہن نشین رہے کہ حسینہ اگست۲۰۲۴ء میں ہندوستان فرار ہو گئی تھیں۔ ان کی معزولی ان کی عوامی لیگ حکومت کے خلاف کئی ہفتوں تک جاری رہنے والے طلبہ کی قیادت میں وسیع احتجاج کے بعد آئی۔ وہ۱۶؍ سال تک اقتدار میں رہی تھیں۔نومبر۲۰۲۵ء کی سزائے موت کے بعد، فروری میں ایک عدالت نے انہیں ڈھاکہ میں ایک سرکاری ہاؤسنگ پروجیکٹ میں زمین کی الاٹمنٹ میں مبینہ بے ضابطگیوں سے متعلق دو بدعنوانی کے مقدمات میں۱۰؍ سال قید کی سزا سنائی۔بعد ازاں بنگلہ دیش  نے بار بار مطالبہ کیا ہے کہ حسینہ کو حوالے کیا جائے۔ اس کے علاوہ حسینہ  کو دہلی سے اپنے حامیوں سے خطاب کرنے کی اجازت دینے پر بھی تشویش کا اظہار کیا ہے۔تاہم ہندوستانی حکومت نے کہا ہے کہ یہ حسینہ پر منحصر ہے کہ وہ بنگلہ دیش واپس آنا چاہتی ہیں یا نہیں۔
مئی۲۰۲۵ء میں، بنگلہ دیش کی عبوری حکومت نے ملک کے انسداد دہشت گردی ایکٹ کے تحت حسینہ کی پارٹی، عوامی لیگ کی تمام سرگرمیوں پر پابندی لگا دی، بشمول ان کے آن لائن پلیٹ فارم۔