اسے پہلے ہی خالی کرالیا گیا تھا ۔ادھرکویت ایئر پورٹ پر بھی ڈرون حملہ، فلائٹ آپریشنز بری طرح متاثر، تل ابیب پر ہائپر سونک میزائل داغے

 امریکہ اور اسرائیل نے جب ایران پر حملہ کیا تھا تو ان کے وہم و گمان میں بھی نہیں ہو گا کہ ایران کی جوابی کارروائی اتنی شدید اور پورے مشرق وسطیٰ کو دہلادے گی۔ایران نے آپریشن وعدۂ صادق کے تحت جو کارروائی شروع کی ہے اس کی زد میں اب دنیا کی سب سے اونچی عمارت ’برج خلیفہ ‘ بھی آگئی ہے۔ جمعرات کو دبئی کے ڈائون ٹائون بزنس ڈسٹرکٹ میںایران کی جانب سے ڈرون حملہ کیا گیا جس کی وجہ سے برج خلیفہ بھی دہل گیا کیوںکہ یہ عمارت اسی علاقے میں واقع ہے۔ اس تعلق سے وائرل ہونے والے ویڈیوز میں دیکھا جاسکتا ہے برج خلیفہ کے قریب سے سیاہ اور کثیف دھواں اٹھ رہا ہے۔ دبئی کے مقامی انتظامیہ نے بھی اس حملے کی تصدیق کی اور بتایا کہ حالات بالکل قابو میں ہیںکیوں کہ  برج خلیفہ کو پہلے ہی خالی کرا لیا گیا تھا اسی لئےکوئی بڑا جانی و مالی نقصان نہیں ہوا ہے ۔بہر حال اس حملے سے تشویش میں اضافہ ہوا ہے۔
 ایران نے صرف دبئی پر حملے پر اکتفا نہیں کیا بلکہ اس نے امریکہ کے ایک اور اتحادی کویت پر بھی حملہ کیا ۔ یہاں ایرانی ڈرون اور میزائل نے کویت کے مصروف ترین ایئر پورٹ کو نشانہ بنایا۔ مقامی انتظامیہ کے مطابق اس حملے میںکویت ایئر پورٹ کی عمارت اور انفراسٹرکچر کو کافی نقصان پہنچا ہے۔ حملے کے بعد وہاں فلائٹ آپریشنز معطل کردئیے گئے تھے اور اطلاعات کے مطابق اب تک  فلائٹس شروع نہیں ہو سکی تھیں۔ 
  دریں اثناء پاسدارانِ انقلاب نے اسرائیل کے دارالحکومت تل ابیب میں صہیونی فوج کے عسکری مراکز کو تباہ کرنے کا دعویٰ کیا ہے۔ ایران نے ڈرون حملوں کی تازہ لہر میں اسرائیل کے پاماخیم اور اووداایئر بیس کو نشانہ بنایا۔ ڈرونز نے اسرائیلی انٹیلی جنس ادارے شن بیت کے ہیڈ کوارٹر کو بھی تباہ کر دیا۔ ایرانی حملوں میں ایئربیس کے رن وے، ہینگرز اور کنٹرول ٹاور کو نشانہ بنایا گیا۔ ایران کی جانب سے کارروائی یومِ قدس کی مناسبت سے میجرجنرل محمد پاکپور کی یاد میں کی گئی۔ مقبوضہ گولان، حیفہ اور شمالی اسرائیل پر بھی میزائل داغے گئے۔ اس سے پہلے ایران اور حزب اللہ کے مشترکہ حملے میں وسطی اسرائیل دھماکوں سے گونج اٹھا۔ اسرائیلی میڈیا کا کہنا ہے راکٹ حملوں میں شیرون میں بڑے پیمانے عمارتوں کونقصان پہنچا۔ ایران اور حزب اللہ کی جانب سے ایک سو پچاس راکٹ داغےگئے