سنیچر کو ہی حاضر ہونے کی ہدایت دی گئی تھی مگر بہار کے نائب وزیراعلیٰ  نے اہلیہ کی علالت کا حوالہ دیکر نئی تاریخ  دینے کی درخواست دی

  لالو پرسادیادو کی بیٹیوں اور خاندان کے دیگر افراد کے ہاں جمعہ کو  مارے گئے چھاپوں پر اپوزیشن کی شدید تنقیدوں  کے بیچ سنیچر کو ای ڈی نے دعویٰ کیا کہ چھاپوں کے دوران اسے غیر  ایک کروڑ روپے  غیر محسوب   ملے ہیںجبکہ جرم کے ارتکاب سے حاصل ہونے والے ۶۰۰؍ کروڑ روپوں کی مالی لین دین کے ریکاڈ  بھی سامنے آئے  ہیں۔ اس  بیچ سی بی آئی  نے آر جے ڈی  لیڈر اور بہار کے نائب وزیراعلیٰ تیجسوی یادو کو سنیچر کوحاضر ہونے کیلئے سمن جاری کیا تاہم تیجسوی تفتیش کاروں کے سامنے حاضر نہیں  ہوئے۔اس سے قبل انہیں  ۴؍ مارچ کو بھی طلب کیاگیاتھا۔ سنیچر کو عدم حاضری پر  انہوں نے جواز پیش کیا کہ ان کی اہلیہ جو امید سے ہیں، اسپتال داخل ہیں اسلئے وہ پوچھ تاچھ کیلئے تفتیشی ایجنسی کے  دفتر میں پیش نہیں  ہوسکتے۔ تیجسوی یادو نے نئی تاریخ دینے کی مانگ کی ہے۔ 
تیجسوی کی اہلیہ کو ۱۵؍ گھنٹوں تک بٹھا کر رکھا گیا
  اس بیچ  ای ڈی کے چھاپوں کے دوسرے دن سنیچر کو لالو پرساد یادو نے بی  جےپی کو تنقید کا نشانہ بناتے ہوئے کہا کہ اس کے ذریعہ بھیجے گئے تفتیش کاروں نےان کی بہو(تیجسوی کی اہلیہ) کو ۱۵؍ گھنٹوں تک بٹھا کررکھا جو امید  سے ہے۔ واضح رہےکہ  تیجسوی نے اپنی اہلیہ کی بیماری اور ان کے اسپتال داخل ہونے کا حوالہ دیتے ہوئے ہی سنیچر کو   سی بی آئی کے دفتر میں حاضری سے معذرت ظاہر کی ہے۔ لالو یادو  نے اپنےبیان میں کہا ہے کہ ’’میں نے ایمرجنسی کا سیاہ دور دیکھا ہے اور اس کا مقابلہ کیا ہے۔ ای ڈی کے افسران نے میری حاملہ بہو کو زبردستی   ۱۵؍ گھنٹے تک بٹھا کررکھا۔اسی کو نہیں ،انہوں نے میری بیٹیوں اوران کے بچوں کو بھی گھنٹوں بیٹھے رہنے پر مجبور کیا۔ زعفرانی پارٹی بہت نیچے تک گر گئی ہے۔‘‘  
ای ڈی نے ضبطیوں کا دعویٰ کیا
  ان الزامات  کے بعد کہ ای ڈی کے ذریعہ لالو پرساد یادو کو صرف  انتقامی سیاست کی بنا پر نشانہ بنایا جارہاہے،  انفورسمنٹ ڈائریکٹوریٹ نے سنیچر کو چھاپوں کے دوران ثبوت ملنے کا دعویٰ کرکے اپنی کارروائی کو جائز ٹھہرانے کی کوشش کی۔ تفتیشی ایجنسی کے مطابق  چھاپے کے دوران  جو ایک کروڑ روپے ملے ہیں وہ غیر محسوب ہیں جبکہ  ۶۰۰؍ کروڑ کے لین دین کے ریکارڈ بھی سامنے آئے ہیں۔ ای ڈی کے مطابق لالو پرساد یادو کے اہل خانہ کے ذریعہ کی گئی مزید سرمایہ کاریوں کو بے نقاب کرنے کی جانچ کا یہ سلسلہ جاری رہے گا۔ان کے مطابق لالو پریوار نے مختلف مقامات پر زمین کے کاروبار میں پیسہ لگایاہے۔