ہدایت کار پریہ درشن نے اداکار راجپال یادو کی تعلیم سے متعلق اپنے متنازع بیان پر وضاحت دیتے ہوئے کہا ہے کہ ان کا مقصد اداکار کی توہین ہرگز نہیں تھا۔ ان کے مطابق وہ دراصل کتابی تعلیم کے بجائے زندگی کے تجربات اور اسٹریٹ اسمارٹنس کی بات کر رہے تھے، جسے غلط انداز میں سمجھ لیا گیا۔

بالی ووڈ میں اس وقت ایک بحث اس وقت شروع ہوئی جب ہدایت کار پریہ درشن کے ایک بیان کو اداکار راجپال یادو کی تعلیم سے جوڑ کر دیکھا گیا۔ اس بیان پر ردعمل دیتے ہوئے راجپال یادو نے ناراضی ظاہر کی تھی اور کہا تھا کہ اگرچہ انہوں نے کئی فلموں میں ایک ساتھ کام کیا ہے لیکن فلمساز انہیں ذاتی طور پر اچھی طرح نہیں جانتے۔ اب پریہ درشن نے اپنے بیان کی وضاحت کرتے ہوئے کہا ہے کہ ان کا مقصد ہرگز یہ نہیں تھا کہ وہ راجپال یادو کی تعلیمی قابلیت پر سوال اٹھائیں۔ ان کے مطابق وہ صرف اس بات کی طرف اشارہ کر رہے تھے کہ انسان کی تعلیم صرف کتابوں سے نہیں بلکہ زندگی کے تجربات اور معاشرتی ماحول سے بھی حاصل ہوتی ہے۔

یہ بھی پڑھئے: مدھوبالا کی بایوپک میں انیت پڈا کی شمولیت کی افواہیں غلط، کیارا اڈوانی زیرغور

ایک انٹرویو میں انہوں نے کہا کہ ’’تعلیم دو طرح کی ہوتی ہے۔ ایک وہ جو کتابوں سے حاصل ہوتی ہے اور دوسری وہ جو انسان عملی زندگی اور معاشرے سے سیکھتا ہے۔‘‘ ان کے مطابق ان کا اشارہ دراصل اسی عملی سمجھ بوجھ یا اسٹریٹ اسمارٹنس کی طرف تھا۔ پریہ درشن نے کہا کہ ان کا بیان کسی بھی طرح راجپال یادو کی توہین کے لیے نہیں تھا۔ ان کے مطابق انہوں نے صرف یہ کہنا چاہا تھا کہ بعض اوقات انسان کی سادگی یا معصومیت اسے مشکل حالات میں ڈال سکتی ہے، خاص طور پر جب وہ صحیح اور غلط لوگوں کے درمیان فرق نہ کر سکے۔

یہ بھی پڑھئے: اکشے کمار کی ’’ویلکم ۴‘‘ پر کام شروع ہے: فیروز ناڈیاڈ والا کی تصدیق

خیال رہے کہ یہ تنازع اس وقت سامنے آیا جب راجپال یادو حال ہی میں بھاری قرض ادا نہ کر پانے کے باعث تہاڑ جیل گئے تھے۔ اس مشکل وقت میں بالی ووڈ کے کئی لوگ ان کی مدد کے لیے آگے آئے تھے جن میں اداکار سونو سود اور فلمساز ڈیوڈ دھون جیسے نام شامل تھے۔ راجپال یادو نے تاہم اس بات پر ناراضی ظاہر کی تھی کہ ان کی تعلیم کو اس مسئلے سے جوڑنا درست نہیں ہے۔ انہوں نے کہا تھا کہ وہ خود کو ایک تعلیم یافتہ شخص سمجھتے ہیں اور ان کے بارے میں ایسی بات کہنا مناسب نہیں۔
پریہ درشن نے مزید کہا کہ وہ کسی بھی طرح کے امتیازی رویے کے قائل نہیں ہیں اور نہ ہی وہ کسی کی تعلیمی حیثیت کی بنیاد پر رائے قائم کرتے ہیں۔ ان کے مطابق ان کا مقصد صرف ایک وسیع مفہوم میں تعلیم کی بات کرنا تھا جو انسان کے ماحول اور تجربات سے بھی جڑی ہوتی ہے۔ انہوں نے اس بات پر بھی زور دیا کہ راجپال یادو ایک باصلاحیت اداکار ہیں اور ان کی مزاحیہ اداکاری نے ہمیشہ ناظرین کو متاثر کیا ہے۔ پریہ درشن کے مطابق آنے والی فلم بھوت بنگلہ میں بھی راجپال یادو نے بہترین کام کیا ہے۔

یہ بھی پڑھئے: جنید خان اور سائی پلوی کی ’’ایک دن‘‘ کا ٹریلر جاری، کہانی یکطرفہ محبت پر مرکوز

فلمساز نے کہا کہ انہیں یقین ہے کہ اس فلم کے بعد راجپال یادو ایک بار پھر کامیڈی کے بڑے ستاروں میں شمار کیے جائیں گے۔ ان کے مطابق اداکار کی صلاحیتیں ایسی ہیں کہ وہ مستقبل میں بھی فلمی صنعت میں نمایاں مقام حاصل کر سکتے ہیں۔ پریہ درشن کا کہنا تھا کہ انہوں نے ہمیشہ راجپال یادو کی صلاحیتوں کی تعریف کی ہے اور ان کے ساتھ کام کرنا انہیں پسند ہے۔ ان کے مطابق ان کا بیان دراصل تعریف کے انداز میں تھا جسے غلط سمجھ لیا گیا۔