بارہویں جماعت کے ریاضی کے امتحان کے سوالیہ پرچے میں موجود ایک کیو آر کوڈ کے بارے میں سوشل میڈیا پر دعویٰ کیا گیا کہ اسے اسکین کرنے پر یوٹیوب پر مشہور گانا ’’Never Gonna Give You Up‘‘ کھل جاتا ہے، جس کے بعد معاملہ آن لائن بحث کا موضوع بن گیا اور بورڈ نے بھی اس پر وضاحت جاری کی۔

سینٹرل بورڈ آف سیکنڈری ایجوکیشن کے بارہویں جماعت کے ریاضی کے سوالیہ پرچے نے پیر ۹؍ مارچ کو سوشل میڈیا پر خاصی توجہ حاصل کی جب متعدد صارفین نے دعویٰ کیا کہ پرچے پر موجود ایک کیو آر کوڈ اسکین کرنے پر یوٹیوب پر ایک میوزک ویڈیو کھل جاتا ہے۔ سوشل میڈیا پر گردش کرنے والی تصاویر اور ویڈیوز میں دکھایا گیا کہ سوالیہ پرچے کے اوپر بائیں کونے میں موجود کیو آر کوڈ کو اسکین کرنے پر برطانوی گلوکار رک ایسٹلی کا مشہور گانا ’’Never Gonna Give You Up‘‘ چلنے لگتا ہے۔ یہ گانا انٹرنیٹ پر ایک معروف مذاق یا میم ’’رِک رول‘‘ سے منسلک ہے۔

Bhai ye mere friend ka math ka paper hai bas ek baar ye QR code scan kar lo 😭🙏🏻
This was not on my 2026 list CBSE 😭💔 pic.twitter.com/CDG7wnC2gP

— Aaditya (@Aadityaparkash) March 9, 2026

رک رولنگ کیا ہے؟
انٹرنیٹ کلچر میں ’’رِک رولنگ‘‘ ایک ایسا مذاق ہے جس میں کسی شخص کو ایک لنک پر کلک کرنے کے لیے کہا جاتا ہے، مگر وہ لنک کسی اور چیز کے بجائے اچانک اسی گانے کی ویڈیو کھول دیتا ہے۔ یہ میم دو ہزار سات کے آس پاس مقبول ہوا تھا جب ایک صارف نے یوٹیوب پر اس گانے کی ویڈیو کو کسی اور مواد کے طور پر ظاہر کرتے ہوئے شیئر کیا۔ اس کے بعد یہ مذاق انٹرنیٹ پر تیزی سے پھیل گیا اور وقت کے ساتھ ایک مشہور آن لائن روایت بن گیا۔

Bhai ye mere friend ka math ka paper hai bas ek baar ye QR code scan kar lo 😭🙏🏻
This was not on my 2026 list CBSE 😭💔 pic.twitter.com/CDG7wnC2gP

— Aaditya (@Aadityaparkash) March 9, 2026

سی بی ایس ای کے ریاضی کے پرچے کے حوالے سے بھی کچھ ویڈیوز آن لائن سامنے آئے جن میں طلبہ یہ دکھاتے ہوئے نظر آئے کہ کیو آر کوڈ اسکین کرنے کے بعد یہ گانا ظاہر ہو جاتا ہے۔ سی بی ایس ای نے بعد میں اس معاملے پر ردعمل دیتے ہوئے کہا کہ سوالیہ پرچے اصل تھے اور امتحان کی سیکوریٹی سے کسی قسم کا سمجھوتہ نہیں ہوا ہے۔ تاہم بورڈ نے یہ بھی تسلیم کیا کہ بعض سیٹوں میں موجود کیو آر کوڈ اسکین کرنے پر صارفین یوٹیوب ویڈیو کی طرف ری ڈائریکٹ ہو رہے تھے۔ بورڈ کے مطابق اس معاملے کی جانچ کی جا رہی ہے تاکہ یہ معلوم کیا جا سکے کہ ایسا کیوں ہوا اور کیا یہ کسی تکنیکی مسئلے کا نتیجہ تھا۔

Important Update:
Press Release issued by CBSE pic.twitter.com/HqhdjYo23q

— CBSE HQ (@cbseindia29) March 10, 2026

واضح رہے کہ سی بی ایس ای نے سوالیہ پرچوں پر کیو آر کوڈز کو ۲۰۱۸ء میں ایک سیکوریٹی اقدام کے طور پر متعارف کرایا تھا تاکہ امتحانی پرچوں کے لیک ہونے کو روکا جا سکے اور ہر سیٹ کی شناخت ممکن ہو۔ تعلیمی حکام کے مطابق کیو آر کوڈ کا مقصد پرچے کی تصدیق اور سیکوریٹی کو بہتر بنانا تھا، تاہم حالیہ واقعے نے سوشل میڈیا پر دلچسپ بحث کو جنم دیا ہے۔ بارہویں جماعت کے سی بی ایس ای بورڈ امتحانات ۱۷؍ فروری سے شروع ہو چکے ہیں اور یہ سلسلہ ۱۰؍ اپریل تک جاری رہے گا۔