فورس کی غیر معمولی تعیناتی کے بعد بھی مظاہرین ڈٹے رہے مگرمسجد انتظامیہ نےعوامی جان ومال کے تحفظ کیلئے حکومت کی بات مان لی۔

اجین  کے مسلمانوں  نے ۶۰۰؍ سال قدیم شاہی مسجد کو بلڈوزر سے بچانے کیلئے اپنی پوری طاقت جھونک دی ۔ وہ سنیچر کی رات، اتوار کا پورا دن اور اتوار کی پوری رات مسجد میں اس  کے آس پاس ڈٹے رہے تاکہ اس پر بلڈوزر نہ چل سکے۔اس بیچ ریاستی حکومت نے اپنی پوری طاقت جھونک دی اور پولیس فورس کی غیر معمولی تعیناتی کے بعد حالات دھماکہ خیز ہوگئے اور کسی بھی وقت     حالات کے بے قابو ہونے کا اندیشہ پیدا ہوگیا۔ زمینی حالات کو دیکھتے ہوئے مسجد انتظامیہ نے مسلمانوں کی جان ومال کے تحفظ کو ترجیح دینے کافیصلہ کیا اور مسجد کے ا س ۳؍ فٹ حصے کو خود ہی ہٹالینے کافیصلہ کیا جو سڑک کی توسیع  میں آرہاتھا۔ 

شہری انتظامیہ اور مسجد کمیٹی میں گفت وشنید کے بعد یہ فیصلہ کیا گیا جس کے بعد سیکوریٹی فورسیزکے ساتھ بھیجے گئے بلڈوزروں کو ہٹالیا گیا۔البتہ مسجد کے ۳؍ فٹ حصے کو خود منہدم کرنے کا منظر انتہائی دلدوز رہا۔ نوجوان روتے ہوئے  ہتھوڑا چلا رہے تھے اوران کے پیچھے کھڑے نوجوان مسجد کو بچانہ  پانے کے غم میں بلک بلک کررورہے ہیں۔

اس سے قبل شہر میں حالات اس وقت خراب ہوگئے جب مسجد کے اطراف اکٹھا ہونےوالی سیکوریٹی فورسیز  کے خلاف مظاہرین میں غم وغصہ پھیل گیا اور اطلاعات کے مطابق خاکی پوشوں پر پتھراؤ کیاگیا۔  شہر میں کئی دیگر  مذہبی مقامات بھی  پروجیکٹ کی زد میں ہیں۔ سڑک کی توسیع ۲۸ء میں مہاکمبھ منعقد کرنے کیلئے کی جارہی ہے۔ مسجد انتظامیہ کمیٹی نے جب شاہی مسجد کے ایک حصے کو  خود ہی منہدم کرنے کا فیصلہ کیا تو وہاں  موجود مسلمانوں نے سخت مخالفت کی اور احتجاج شروع کردیا۔ احتجاج کے دوران پتھراؤاور پولیس کے ساتھ جھڑپ کا واقعہ بھی پیش آیا جس کے بعد پولیس نے لاٹھی چارج کیا اور بھیڑ پر آنسو گیس کے گولے داغے۔ پولیس نے ایف آئی آر میں ۷؍افراد کو نامزد  جبکہ۱۵؍ افراد کو حراست میں لیا ہے۔سڑک کی توسیع کیلئے مسجد کے جس  حصہ کو منہدم کیاگیا  اس کی لمبائی ۹؍فٹ اور چوڑائی ۴؍فٹ ہے۔