ریلوے حکام کے مطابق تکنیکی جانچ کے ختم ہونے کے فوراً بعدٹرین کو دہلی کیلئے روانہ کر دیا جائےگاجبکہ فائر حکام کا کہنا ہے کہ یہ آگ بیٹری باکس تک ہی محدود تھی

بھوپال سے د ہلی جانے والی وندے بھارت ایکسپریس کے ایک ڈبے کے بیٹری باکس میں آج صبح آتشزدگی کا واقعہ پیش آیا ہے ۔ اطلاعات کے مطابق حادثے میں جانی نقصان کی کوئی اطلاع نہیں ملی ہے ۔ یہ واقعہ مدھیہ پردیش کے کروائی کیتھورا اسٹیشن پر صبح۸؍بجے کے قریب پیش آیا۔ یہ ٹرین صبح۵؍ بجکر ۴۰؍ منٹ پر دہلی جانےکیلئےبھوپال سے روانہ ہوتی ہے اورایک بجکر ۱۰؍منٹ پر  دہلی کے حضرت نظام الدین اسٹیشن پہنچتی ہے۔جائے وقوعہ سے ملنے والی تصاویر میں پہیوں کے قریب سے دھواں اٹھتا دکھائی دے رہا تھاجبکہ  فائر بریگیڈ نے فوری طور پر آگ پر قابو پالیا تھا جس کے بعد مناسب جانچ شروع کی گئی۔فائر حکام کا کہنا ہے کہ  یہ آگ بیٹری باکس تک ہی محدود تھی۔ ریلوے حکام نے بتایا کہ تکنیکی امتحان ختم ہوتے ہی ٹرین کو دہلی کیلئے روانہ کر دیا جائے گا۔ واضح رہے کہ اس سے پہلے بھی وندے بھارت ٹرین اس طرح کے حادثات کاشکار ہو چکی ہے ۔  گزشتہ سال جون تا دسمبر ، وندے بھارت ٹرینوں میں جانوروں کے ٹکرانے کے تقریباً ۶۸؍ واقعات پیش آئے تھے، جس کے مطابق وزیر ریلوے اشونی ویشنو نے پارلیمنٹ میں جواب دیا تھا۔