گریٹا تھنبرگ اور دیگر سماجی رضاکاروں کیساتھ بارسیلونا سے غزہ جانے والا امدادی بیڑا خراب سمندری موسم کے سبب بندرگاہ واپس لوٹ آیا۔

غزہ کیلئے امدادی سامان لے کر نکلنے والے ’گلوبل صمود فلوٹیلا‘ کے کشتیوں کے قافلے کوخراب موسم کے سبب بندرگاہ پر لوٹنا پڑا ہے۔اس قافلے میں۴۴؍ ممالک کے۳۰۰؍  سے زائد رضاکار شامل ہیں جو ۵۰؍ کشتیوں کی مدد سے ہزاروں ٹن امدادی سامان  لے کر غزہ جارہے ہیں۔ یہ قافلہ اتوار کو مقامی وقت کے مطابق دوپہر ساڑھے ۳؍ بجے غزہ کیلئے روانہ ہوگیاتھا۔تاہم سمندری طوفان کے خطرے اور خراب موسم کے سبب اسے واپس لوٹنا پڑا ہے اور حالات سازگار ہوتے ہی یہ پھر روانہ ہوگا۔’العربیہ انگلش ‘ کی رپورٹ کے مطابق  درجنوں کشتیوں پر مشتمل  امدادی بیڑا، جو اتوار کو غزہ کیلئے فلسطین حامی کارکنوں کو لے کر روانہ ہوا تھا، جن میں ماحولیاتی تحفظ مہم کی کارکن گریٹا تھنبرگ اور دیگر شامل ہیں ، خراب موسم کے باعث پیر کو بارسلونا کی بندرگاہ واپس آ گیا ہے۔ منتظمین نے بتایا کہ ہم نے آزمائش سے بھرا سفر شروع تو کیالیکن  طوفان سنگین نوعیت کا ہے اسلئےبندرگاہ واپس آ گئے۔ اس کا مطلب یہ  ہے کہ ہمیں اپنی روانگی مؤخر کرنی پڑی  ہے تاکہ چھوٹی کشتیوں کو پیچیدگیوں کے خطرے سے بچایا جا سکے۔گلوبل صمود فلوٹیلا مشن نے  بیان میں کہا،’’ ہوائیں تقریباً۳۵؍ میل فی گھنٹہ تک چل رہی تھیں۔‘‘ خیال رہے کہ کارکنان میں ’گیم آف تھرونز‘ کے اداکار لیام کننگھم بھی شامل ہیں، جو اس بیڑے کا حصہ ہیں۔ یہ بیڑا درجنوں کشتیوں پر مشتمل ہے جس کا مقصد اسرائیل کی بحری ناکہ بندی توڑنا اور غزہ  پٹی میں خوراک اور انسانی امداد پہنچانا ہے، جو تقریباً دو سال سے جاری اسرائیلی جنگ سے تباہ حال ہے۔ بتایا گیا کہ تیونیشیا سے اس  قافلے میں مزید کشتیاں شامل ہوں گی اور ستمبر  کے وسط تک  یہ غزہ پہنچ جائے گا۔