پاکستان کے صوبہ بلوچستان کے ’سنجیدی ڈیگاری ‘میں  ایک جوڑے کا قتل کردیا گیا۔ ’غیرت کے نام پر‘ کئے جانے والے اس قتل کی ویڈیو سوشل میڈیا پر وائرل ہوگئی ہے۔

پاکستان کے صوبہ بلوچستان کے ’سنجیدی ڈیگاری ‘میں  ایک جوڑے کا قتل کردیا گیا۔ ’غیرت کے نام پر‘ کئے جانے والے اس قتل کی ویڈیو سوشل میڈیا پر وائرل ہوگئی ہے۔ اس پر ہنگامہ مچنے کے بعد کوئٹہ پولیس نے ملزمین کیخلاف انسداد دہشت گردی ایکٹ زیر دفعہ۳۰۲؍ ت پ اور دیگر دفعات کے تحت تقریباً ۱۵؍ افراد کے خلاف قتل کا  مقدمہ درج کیا ہے۔ اس معاملے میں پولیس نے اب تک ایک شخص کو گرفتار کیا ہے۔   بلوچستان کے   وزیر اعلیٰ سرفراز بگٹی نے کہا کہ خاطیوں کو بخشا نہیں جائے گا۔ وزیراعلیٰ بلوچستان نے کہا ریاست کی مدعیت میں دہشت گردی کا مقدمہ درج کرلیا گیا اور ایک مشتبہ قاتل گرفتار ہوچکا ہے، قانون اس گھناؤنے معاملے پر اپنا کام کرے گا۔ 
 ڈان انگلش کی رپورٹ کے مطابق مقتول جوڑے نے اپنے اپنے خاندانوں کی مرضی کے بناء شادی کی تھی۔ذرائع کے مطابق احسان سمالانی اور بانو ستاکزئی کو کھانے کی دعوت دی گئی اور پھر انہیں پکڑکر ’جرگے‘ کے روبرو پیش کیا گیا ۔ جہاں سردار وں نے ان پرناجائز تعلقات کا الزام لگایا اور کاروکاری(قتل) کی سزا سنائی ۔ جس کے بعد انہیں سنجیدی ڈیگاری کے ایک سنسنان علاقے میں لے جایا گیا۔ اور وہاں گولیاں ماردی گئیں۔وائرل ویڈیو میں موت سے قبل  خاتون نے براہوی زبان میں کہا کہ ’’ ’صرف سُم ئنا اجازت اے نمے‘ (صرف گولی سے مارنے کی اجازت ہے)‘‘ 
 ایکسپریس کی رپورٹ کے مطابق کوئٹہ ایس ایچ او نوید اختر تھانہ ہنہ اوڑک مدعیت میں مقدمہ درج کیا گیا، مدعی نے تھانہ میں تحریری درخواست دی کہ ویڈیو وائرل ہوئی جس میں خاتون اور مرد کو فائرنگ کرکے قتل کیا گیا۔ متن کے مطابق پولیس نفری کے ہمراہ جائے وقوعہ ’سنجیدی ڈیگاری مارگٹ‘ پہنچا، معلومات کرنے پر علم ہوا کہ واقعہ عیدالاضحی سے تین روز قبل کا ہے،  جس میں’ بانو بی بی‘ اور ’احسان اللہ‘ کو فائرنگ کرکے قتل کیا گیا۔انہوں نے پسند کی شادی کی تھی۔ بتایا گیا کہ  مرد اور خاتون کو قتل کرنے سے قبل سردار شیر باز خان کے پاس لیکر گئے، مدعی مقدمہ نے کہا کہ واقعہ کے دوران ویڈیو بنائی گئی اور سوشل میڈیو کے ذریعے اپ لوڈ کر کے عوام میں خوف و ہراس پھیلا گیا۔ فائرنگ کرنے والوں میں شاہ وزیر، جلال، ٹکری منیر، بختیار، ملک امیر، عجب خان شامل ہیں، سردار شیر باز خان نے فیصلہ سنایا خاتون اور مرد ’کار و کاری‘ کے مرتکب ہوئے ہیں، انہیں قتل کردیا جائے۔معاملے میں جان محمد،بشیر احمد،دیگر۱۵؍نامعلوم افراد بھی شامل ہیں، فیصلے کے بعد مرد اور خاتون کو گاڑیوں میں لیکر سنجیدی ڈیگاری مارگٹ لاکر فائرنگ کر کے قتل کر دیا گیا۔ پولیس ذرائع نے کہا کہ  خاتون اور مرد کے پوسٹ مارٹم سے کئی حقائق سے پردہ اٹھے گا، پوسٹ مارٹم رپورٹ سے معلوم ہوگاکہ خاتون اور مرد کو کتنی کتنی گولیاں ماری گئیں، معلوم ہوگا کہ واقعہ کتنے دن پرانا ہے۔ پولیس کا کہنا ہے کہ مرد اور خاتون کے قتل کی وائرل ویڈیو میں نظر آنے والے مزید۲؍ ملزمین کو گرفتار کر لیا گیا ہے جس کے بعد گرفتار ملزمین کی تعداد۱۳؍ ہو گئی ہے، فائرنگ کرنے والے شخص اور ویڈیو میں نظر آنے والے ایک شخص کو گرفتار کیا گیا ہے۔