وزیر اعلیٰ کے مطابق بی جے پی نے ان کے خاندان پر کیچڑ اچھالا ہے ، ایسے لوگوں کو کبھی معاف نہیں کیا جاسکتا

زیر اعلیٰ ادھو ٹھاکرے نے بی جے پی کے ساتھ دوبارہ حکومت بنانے کے تمام امکانات کو پوری طرح سے خارج کردیا ہے۔ انہوں نے کہا کہ وہ اب کبھی بی جے پی کے ساتھ حکومت نہیں بنائیں گے کیوں کہ اس پارٹی نے ان کے خاندان پر کیچڑ اچھالا ، ان کے اہل خانہ کو ہراساں کرنے کی کوشش کی اور پارٹی توڑنے کی بھی کوشش مسلسل کررہی ہے ۔ ایسے میں کس منہ سے میں اسمبلی میں ان کے ساتھ بیٹھوں ؟ میں خاموش رہتا ہوں ، ہر معاملے پر ردعمل ظاہر نہیں کرتا لیکن اس کا یہ مطلب نہیں ہے کہ میں کمزور ہوں یا اپنی پارٹی کو بچانہیں سکتا۔ مجھے معلوم ہے کہ پارٹی کیسے چلائی جاتی ہے اور نئی پارٹی کیسے کھڑی کی جاتی ہے۔
  ادھو ٹھاکرے نے شیو سینا کے ضلع صدور سے ویڈیو کانفرنسنگ کے ذریعے خطاب کرتے ہوئے کئی باتیں واضح کیں۔ ادھو  نے باغی اراکین  سے کہا کہ وہ جس پارٹی میں جانا چاہیں جاسکتے ہیں، میں انہیں نہیں روکوں گا کیوں کہ اب میں نئی اور مضبوط شیو سینا بنائوں گا جو واقعی بالاصاحب ٹھاکرے کی وفادار ہو گی۔  نئی پارٹی بنانے کے لئے مجھے محنت کرنی ہو گی اس کے لئے میں بالکل تیار ہوں ۔  انہوں نے باغیوں پر شدید تنقید کرتے ہوئے کہا کہ جن لیڈروں کو ہم نے اپنا نام  اور اپنی شناخت استعمال کرنے کا موقع دیا  اور انہیں کچھ بنایا آج ان کی خواہشات ضرورت سے  زیادہ بڑھ گئی ہیں جس کی وجہ سے اب ہم انہیں پورا کرنے سے قاصر ہیں۔ اسی لئے میں کہہ رہا ہوں کہ جسے جہاں جانا ہے جائے ، ہم نئی شیو سینا بنانے کیلئے تیار ہیں اور ہم یہ کرکے دکھائیں گے ۔