ٹرمپ نے ۲۲ اپریل کو کشمیر کے پہلگام میں ہوئے دہشت گردانہ حملوں اور اس کے بعد ہندوستان کے پاکستان کے خلاف ’آپریشن سیندور‘ کے بعد ہند-پاک جنگ بندی میں اپنی ثالثی کے دعوؤں کو بھی دہرایا۔

امریکی صدر ڈونالڈ ٹرمپ نے منگل کو ایئر فورس ون پر صحافیوں سے گفتگو کرتے ہوئے ہندوستانی مصنوعات پر ممکنہ طور پر ۲۰؍ سے ۲۵؍ فیصد ٹیرف لگانے کا اشارہ دیا ہے۔ یہ اشارہ نئے تجارتی اقدامات کیلئے ان کے ذریعے مقرر کردہ یکم اگست کی ڈیڈ لائن سے صرف چند دن پہلے سامنے آیا ہے۔ اس کے ساتھ ہی انہوں نے یہ بھی کہا کہ ہند۔امریکہ تجارتی معاہدہ ”بہت اچھی طرح کام کر رہا ہے۔“

ٹرمپ نے نئی دہلی پر الزام لگایا کہ اس نے دیگر ممالک کے مقابلے امریکی مصنوعات پر سب سے زیادہ ٹیرف عائد کئے ہیں۔ ٹرمپ نے کہا کہ ”ہندوستان ہمارا ایک اچھا دوست رہا ہے۔ لیکن اس نے گزشتہ برسوں میں کسی بھی دوسرے ملک سے زیادہ ٹیرف لگائے ہیں۔ لیکن اب میں انچارج ہوں۔ اور اب آپ ایسا نہیں کر سکتے۔“ انہوں نے مزید کہا کہ کوئی بھی نیا انتظام امریکہ کے حق میں ہونا چاہئے۔

اگرچہ ٹرمپ نے ابھی تک ہندوستان کو کوئی باضابطہ نوٹیفکیشن جاری نہیں کیا ہے لیکن ان کے تبصروں نے اس قیاس آرائی کو تیز کر دیا ہے کہ ۲۵ فیصد تک کے باہمی ٹیرف کا اعلان کیا جا سکتا ہے۔ اپریل میں، ٹرمپ نے مختصر طور پر بھارتی درآمدات پر ۲۶ فیصد ڈیوٹی عائد کی تھی جسے بعد میں مذاکرات تک کیلئے روک دیا گیا تھا۔

ٹرمپ نے ٹیرف کو وسیع تر امریکہ-ہندوستان تعلقات سے جوڑا

ٹرمپ نے ۲۲ اپریل کو کشمیر کے پہلگام میں ہوئے دہشت گردانہ حملوں اور اس کے بعد ہندوستان کے پاکستان کے خلاف ’آپریشن سیندور‘ کے بعد ہند-پاک جنگ بندی میں اپنی ثالثی کے دعوؤں کو بھی دہرایا۔ وزیر اعظم مودی کی تعریف کرتے ہوئے انہوں نے کہا کہ”وہ میرے دوست ہیں۔۔۔ انہوں نے (میری) درخواست پر پاکستان کے ساتھ جنگ ختم کی، اور میں بہت اچھا تھا اور پاکستان نے بھی ایسا ہی کیا۔“ ہندوستان نے پہلے ٹرمپ کے ثالثی کے دعوے کو مسترد کر دیا تھا اور واضح کیا تھا کہ جنگ بندی پاکستان کی فوجی قیادت کی براہ راست درخواست پر ہوئی تھی۔

ہند۔امریکہ تجارتی مذاکرات ’اچھی طرح آگے بڑھ رہے ہیں‘

وزیر تجارت پیوش گویل نے اتوار کو کہا کہ واشنگٹن کے ساتھ گفتگو ”بہت اچھی طرح چل رہی ہے۔“ انہوں نے مزید کہا کہ ”ہندوستان آج طاقت اور اعتماد کے ساتھ مذاکرات کر رہا ہے۔ اس سے ہمیں اچھے آزاد تجارتی معاہدے کرنے کی ترغیب ملتی ہے۔ امریکہ کے ساتھ ہماری بات چیت بہت اچھی طرح آگے بڑھ رہی ہے۔“

وزیر خارجہ وکرم مسری نے گزشتہ ہفتے وزیر اعظم مودی کے برطانیہ کے دورے کے دوران تصدیق کی تھی کہ دونوں ممالک ایک ممکنہ باہمی تجارتی معاہدے (بی ٹی اے) پر سرگرمی سے کام کر رہے ہیں۔ ہندوستان-برطانیہ آزاد تجارتی معاہدے پر دستخط کے بعد مسری نے کہا کہ ”ہماری گفتگو جاری ہے۔ رابطے جاری ہیں اور ہم دیکھیں گے کہ یہ کیسے ہوتا ہے۔“ ایک سینئر عہدیدار نے اس ماہ کے شروع میں کہا تھا کہ ہندوستان، بی ٹی اے پر ”ٹھوس پیش رفت“ کر رہا ہے اور ”باہمی فائدے کے سودے“ پر سرگرمی سے غور کر رہا ہے جو دونوں ممالک کے مفادات سے ہم آہنگ ہو۔