ہندوستان نے اپنے امیگریشن قوانین میں ترمیم کرتے ہوئے غیر ملکی شہریوں کیلئے جو ۱۸۰؍ دنوں سے زائد قیام کرنے کا ارادہ رکھتے ہیں، اندراج لازمی قرار دیا گیا ہے، اس کے علاوہ غیر ملکی والدین کے ہاں ہندوستان میں پیدا ہونے والے بچوں کے لیے بعض شرائط میں نرمی بھی کی ہے۔

ملک کی یونین ہوم منسٹری نے امیگریشن اینڈ فارنرز رولز،۲۰۲۵ء کے تحت قوانین میں ترمیم کرتے ہوئے غیر ملکی شہریوں کو ہدایت دی ہے کہ اگر وہ ہندوستان میں ۱۸۰؍ دن کے بعد قیام کرنا چاہتے ہیں تو انہیں اپنا رجسٹریشن عمل مکمل کرنا ہوگا۔ نئی ترمیم میں کہا گیا ہے کہ ۱۸۰؍ دن یا اس سے کم مدت کے ویزا پر ہندوستان آنے والے غیر ملکی شہری، اگر مجاز مدت سے زائد قیام کرنا چاہتے ہیں، تو انہیں ۱۸۰؍ دن مکمل ہونے سے پہلے رجسٹریشن مکمل کرنی ہوگی۔اس ترمیم نے پچھلی شق کی جگہ لے لی ہے، جس کے تحت غیر ملکیوں کو ہندوستان آمد کی تاریخ سے ۱۸۰؍ دن مکمل ہونے کے۱۴؍ دن کے اندر رجسٹریشن کی اجازت تھی۔

یہ بھی پڑھئے: مسلمانوں کی گائے کو قومی جانور قرار دینے کے مطالبے کی یوگی آدتیہ ناتھ کی مخالفت

بعد ازاں نئے قوانین ان غیر ملکیوں پر بھی عائدہوتے ہیں جن کے پاس ۱۸۰؍ دن سے زیادہ مدت کا ویزا ہے، لیکن شرط یہ ہے کہ ’’ہر قیام ۱۸۰؍ دن سے تجاوز نہ کرے۔‘‘ اگر کوئی شخص ایک بار کے دورے پر یا کیلنڈر سال میں مقررہ حد سے زیادہ ہندوستان میں رہنا چاہتا ہے، تو اسے ہندوستان میں ۱۸۰؍ دن مکمل ہونے سے پہلے رجسٹریشن کرانی ہوگی۔حکومت نے واضح کیا ہے کہ مقررہ قیام کی مدت سے زائد رجسٹریشن کی منظوری ’’صرف ہنگامی حالات میں‘‘ دی جائے گی۔اس کے علاوہ ترمیم شدہ فریم ورک ان بچوں سے متعلق مسائل میں بھی راحت فراہم کرتا ہے جو ہندوستان میں پیدا ہوتے ہیں جہاں ایک یا دونوں والدین غیر ملکی شہری ہوں۔ پہلے والدین کو ویزا خدمات حاصل کرنے کے لیے بچے کی پیدائش کے۳۰؍ دنوں کے اندر رجسٹریشن افسر کو الیکٹرانک طور پر مطلع کرنا ضروری تھا۔ترمیم شدہ قوانین کے تحت، یہ ضرورت نافذ نہیں ہوگی اگر کوئی والدین ہندوستانی شہری ہے اور بچے کی ہندوستانی شہریت برقرار رکھنے کا انتخاب کرتا ہے۔ تاہم، نوٹیفکیشن میں کہا گیا ہے کہ اگر بچہ ہندوستان میں رہائش کے دوران غیر ملکی شہریت حاصل کر لیتا ہے، تو کسی بھی والدین کو اس شہریت کے حصول کے۳۰؍ دنوں کے اندر رجسٹریشن آفیسر کو مطلع کرنا ہوگا۔