شیوا راجورا انڈیا کی سی پی آئی کے مطابق مختلف اجناس کی کیٹیگریز بالخصوص اشیائے خوردونوش کی قیمتوں میں کمی کی وجہ سے افراط زر کی شرح میں کمی متوقع ہے۔

شیوا راجورا انڈیا کی کنزیومر پرائس انڈیکس (سی پی آئی) پر مبنی خردہ افراط زر کی شرح اپریل میں مزید کم ہونے کا امکان ہے۔ اس طرح یہ مسلسل تیسرے مہینے ریزرو بینک آف انڈیا کے۴؍ فیصد سے نیچے کے ہدف کے اندر رہنے والا ہے۔ مختلف اجناس کی کیٹیگریز بالخصوص اشیائے خوردونوش کی قیمتوں میں کمی کی وجہ سے افراط زر کی شرح میں کمی متوقع ہے۔
 یہ ریزرو بینک کی مانیٹری پالیسی کمیٹی(ایم پی سی) کیلئے جون میں اپنی دو ماہی جائزہ میٹنگ میں مزید ریپو ریٹ میں کمی پر غور کرنے کا ایک اور موقع  دے سکتا ہے۔ مارچ میں خردہ افراط زر ۳ء۳۴؍   فیصد رہا، جو اگست۲۰۱۹ء کے بعد سب سے کم ہے۔ قومی شماریاتی دفتر(این ایس او) پیر کو اپریل کیلئے سی پی آئی  ڈیٹا جاری کرے گا۔ ریزرو بینک نے اپریل میں منعقدہ اپنی آخری میٹنگ میں اندازہ لگایا تھا کہ موجودہ مالی سال ۲۶۔۲۰۲۵ء میں خردہ افراط زر کی شرح ۴؍ فیصد رہے گی، جو کہ پہلی سہ ماہی (اپریل- جون) میں۳ء۶؍ فیصد تک کم رہنے کا امکان ہے۔
 بینک آف بڑودہ کے چیف اکنامسٹ مدن سبنویس نے کہا کہ خردہ افراط زر۳؍ فیصد تک گرنے کا امکان ہے، جس میں خوراک کی افراط زر ایک اہم کردار ادا کر رہی ہے۔ یہ اعداد و شمار ریزرو بینک کو جون کی پالیسی میٹنگ میں اپنے مؤقف کو مزید نرم کرنے کا موقع فراہم کریں گے۔انہوں نے کہاکہ  `خوراک کی مہنگائی کی شرح میں اتار چڑھاؤ سے راحت ملی ہے، خاص طور پر ٹماٹر، پیاز اور آلو(ٹی او پی ) کی قیمتوں میں اور اس سے خردہ افراط زر سے راحت مل رہی ہے۔ سپلائی فی الحال کم افراط زر کے حق میں ہے۔ ٹماٹر، پیاز اور آلو پیدا کرنے والی بڑی ریاستوں میں گرمی کی لہروں سے ابھی بھی راحت ہے۔ اس سے متوقع حد سے زیادہ گرمی سے کچھ راحت ملی ہے۔