وزیراعلیٰ کی آمد کے پیش نظر اسٹالوں کوبڑے پیمانے پر منہدم کیا گیا جس پرموچی اور معذور افراد نے دھرنادیا۔

وزیر اعلیٰ ایکناتھ شندے پیر (آج) کو مختلف ترقیاتی منصوبوں کا افتتاح کرنے کیلئے کلیان آرہے ہیں۔ ان کے دورہ کے پیش نظر کلیان ڈومبیولی میونسپل کارپوریشن (کے ڈی ایم سی ) نے موچی اور معذور افراد کے اسٹالوں کے خلاف بڑے پیمانے پر انہدامی کارروائی شروع کی ہے۔ اس کارروائی کے خلاف متاثرین نے میونسپل کمشنر کے بنگلہ کے باہر دھرنا آندولن کیا۔ مظاہرین کاکہنا ہے کہ میونسپل کمشنر ہماری روزی روٹی کو ختم کرنا چاہتی ہے۔ 
کلیان مغرب میں سٹی پارک، دلیپ کپوتے پارکنگ ایریا کا افتتاح اور بی ایس یو پی پروجیکٹ کے مکانات کی چابیاں دینے کیلئے پیر کو وزیر اعلیٰ ایکناتھ شندے کلیان آرہے ہیں۔ ان کی آمد کے پیش نظر اتوار کوکے ڈی ایم سی کے اسسٹنٹ میونسپل کمشنر نے فٹ پاتھوں پر رکھی ہوئی ٹپریوں کو منہدم کردیا۔ سنجانند چوک سے شیواجی چوک کے درمیان ٹپریوں کو توڑدیا گیا۔ 
اس کارروائی سے مشتعل معذور افراد نے اتوار کی صبح میونسپل کمشنر اندورانی جھاکڑ کے بنگلہ کے باہر احتجاج کیا اور میونسپل کارپوریشن کے خلاف نعرے لگائے۔ اس موقع اشوک بھویئر نے کہا کہ وزیراعلیٰ کے دورے کو بنیاد بناکر غیرقانونی طریقہ سے ٹپریوں کے خلاف انہدامی کارروائی کی گئی ہے۔ انہوں نےیہ بھی کہا کہ گزشتہ سال معذور افراد کو شہری انتظامیہ نے ہی اسٹال الاٹ کئے تھے اور اب وہیں غیرقانونی قرار دے رہا ہے۔