ہندوستان لوک سبھا انتخابات ۲۰۲۴ء کیلئے تیار ہے۔ سیاسی جماعتیں اپنے اپنے منشور اور وعدوں کے ذریعے رائے دہندگان کو اپنی جانب راغب کرنے کی کوشش کررہی ہیں۔ انقلاب نے حکمراں جماعت بی جے پی اور سب سے بڑی اپوزیشن پارٹی کانگریس کے منشور کا جائزہ لیا ہے، اور مختلف محاذوں پر ان کا موازنہ کرنے کی کوشش کی ہے۔

مودی کی گیارنٹی نامی بی جے پی کے منشور میں ۱۴؍ وعدے کئے گئے ہیں اور ملک کے ۴؍ اہم ستونوں، خواتین، نوجوان، غیر مراعات یافتہ اور کسانوں کو ترجیح دی گئی ہے۔ کانگریس کے منشور کا نام ’’نیائے پتر‘‘ (پلرز آف نیائے یا معیاراتِ انصاف) ہے جس میں بھارت جوڑو یاترا کے نقش نظر آتے ہیں۔ اس میں ۵؍ ستونوں (نوجوانوں، خواتین، کسانوں، مزدوروں اور شراکت داری) کو اہمیت دی گئی ہے، اور منشور میں ۲۵؍ گیارنٹیاں دی گئی ہیں۔ 

یہ بھی پڑھئے: روزگار، انصاف اور بہتر حکمرانی- ملک کے مستقبل کیلئے جرأت مندانہ منشور

دونوں ہی سیاسی پارٹیوں نے اپنے منشور میں نوجوانوں کو خاص اہمیت دی ہے۔ امسال ۸ء۱؍ کروڑ نوجوان پہلی بار ووٹ دیں گے۔ ۲۰۲۴ء میں ۸ء۹۶؍ کروڑ شہری ووٹ دیںگے جن میں ۷ء۴۹؍ کروڑ مرد اور ۱ء۴۷؍ کروڑ خواتین اور ۴۸؍ ہزار تیسری صنف کے افراد ہیں۔ سیاسی جماعتوں کے مستقبل کا فیصلہ کرنے میں خواتین رائے دہندگان اہم رول ادا کرسکتی ہیں۔

یہ بھی پڑھئے: مودی سرکار کے نا مکمل وعدے اور اب ۲۰۴۷ء کے سبز خواب!

مختلف محاذوں پر بی جے پی اور کانگریس کے منشور کا موازنہ

سیاسی ماہرین، ناقدین، تجزیہ نگار اور دانشوروں نے کانگریس کے منشور کو زیادہ ٹھوس قرار دیا ہے جس میں زمینی سطح کے مسائل کو پیش نظر رکھا گیا ہے۔

انڈین ایکسپریس کے کالم نگار پروین چکرورتی کانگریس کے منشور کے متعلق لکھتے ہیں کہ ’’روزگار، انصاف، حکمرانی؛ ہندوستان کے مستقبل کیلئے ایک جرات مندانہ منشور ہے۔‘‘
انڈین ایکسپریس نے اپنے اداریئے میں کانگریس کے منشور کو بی جے پی کے مقابلے میں زیادہ ٹھوس قرار دیا ہے البتہ یہ بھی کہا ہے کہ دونوں ہی پارٹیوں کے منشور میں طویل مدتی نتائج کا احاطہ نہیں کیا گیا ہے۔
دی کوئنٹ کے ساتھ اپنے انٹرویو میں فائے ڈیسوزا نے دونوں ہی پارٹیوں کے منشور کا موازنہ کرتے ہوئے کہا کہ ’’کانگریس نے زمینی سطح کے مسائل کو بنیاد بنایا ہے جبکہ بی جے پی کے منشور میں کوئی خاص بات نظر نہیں آتی۔‘‘
دی بزنس لائن کی پاروتی بینو لکھتی ہیں کہ ’’بی جے پی نے خواتین کو مالی طور پر مستحکم بنانے کا وعدہ کیا ہے جبکہ کانگریس بے خواتین کو افرادی قوت میں شامل کرنے کا وعدہ کیا ہے، جو کئی لحاظ سے بہتر ہے۔‘‘
ماہر معاشیات رادھیکا راؤ نے ڈی بی ایس کی رپورٹ میںلکھا ہے کہ ’’بی جے پی کے منشور کے محدود مالیاتی اثرات ہیں جبکہ کانگریس کی اسکیموں سے معیشت پر کافی لاگت آئے گی۔‘‘
منٹ کی کالم نگار آکریتی آنند لکھتی ہیں کہ ’’بی جے پی نے پوری کائنات کا لیڈر بننے کے عزم کا اظہار کیا ہے، مگر کیسے؟ یہ واضح نہیں ہے البتہ کانگریس نے پڑوسی ممالک کے ساتھ تعلقات پر توجہ مرکوز کی ہے۔‘‘