مدھیہ پردیش کے وزیر اعلیٰ شیوراج سنگھ چوہان نے ریاست کے ۲؍ سابق وزرائے اعلیٰ کملناتھ اور دگ وجے سنگھ پر حملہ کرتے ہوئے کہاکہ کانگریس چھوڑنے والے لیڈروں کو ’بکاؤ‘ کہنے سے پہلے انہیں اپنے گریبان میں جھانکنا چاہئے

مدھیہ پردیش کے وزیر اعلیٰ شیوراج سنگھ چوہان نے ریاست کے ۲؍ سابق وزرائے اعلیٰ کملناتھ اور دگ وجے سنگھ پر حملہ کرتے ہوئے کہاکہ کانگریس چھوڑنے والے لیڈروں کو ’بکاؤ‘ کہنے سے پہلے انہیں اپنے گریبان میں جھانکنا چاہئے۔چوہان نے مدھیہ پردیش کے سواسرا اسمبلی حلقہ کے تحت آنے والے گراڑیا پرتاپ میں بی جے پی کے امیدوار ہردیپ سنگھ ڈنگ کے حق میں انتخابی جلسہ سے خطاب کیا۔ انہوں نےاتوار کو بھوپال میں کانگریس اور اسمبلی کا عہدہ چھوڑ کر بی جے پی میں شامل ہونے والے راہل سنگھ کے نام کا ذکر کرتے ہوئے کہا کہ کانگریس کے لیڈروں نے پھر سے ’بکاؤ بکاؤ‘ گانا شروع کردیا ہے۔اصل میں کانگریس کے لیڈروں کو سوچنا  چاہئے کہ ان کے اراکین اسمبلی ایسا کرنے  پر مجبور کیوں ہورہے ہیں۔انہوں نے کہا کہ کانگریس کے لیڈروں کو اپنے اراکین اسمبلی اور ان کے ساتھ برسوں تک کام کرنے والوں کو بکاؤ کہتے ہوئے شرم نہیں آتی۔ وزیراعلیٰ نے کہاکہ موتی لال نہرو اور سبھاش چندر بوس نے بھی کانگریس چھوڑ ی تھی۔ یہی نہیں سابق وزیراعلیٰ کے بھائی بھی کانگریس چھوڑ کر بی جے پی میں شامل ہوئے تھے۔ تو کیا کانگریس ان تمام کو بکاؤ مانتی ہے۔
 وزیراعلیٰ شیوراج نے کہاکہ اصل میں کانگریس  میں کچھ بچا نہیں ہے۔ ریاست میں کانگریس کے تمام عہدوں پر کمل ناتھ قبضہ کئے ہوئے ہیں۔کمل ناتھ مرکزی قیادت کی باتوں پر توجہ نہیں دے رہے ہیں۔ ان حالات میں اگر کانگریس کے رکن اسمبلی انکی پارٹی چھوڑ رہے ہیں تو اس کیلئے ذمہ دار کون ہے؟