بنگال کی نو منتخب وزیر اعلیٰ کے مطابق بی جے پی لیڈران ناکامی کو ہضم نہیں کر پارہے ہیں اسی لئے تشدد کو ہوا دے رہے ہیں، خاطیوں کیخلاف سخت کارروائی کا اعلان
EPAPER
Updated: May 07, 2021, 8:18 AM IST | Kolkata
بنگال کی نو منتخب وزیر اعلیٰ کے مطابق بی جے پی لیڈران ناکامی کو ہضم نہیں کر پارہے ہیں اسی لئے تشدد کو ہوا دے رہے ہیں، خاطیوں کیخلاف سخت کارروائی کا اعلان
مغربی بنگال کی وزیر اعلیٰ ممتا بنرجی نے انتخابات کے بعد مرکز کے لیڈروں کو بنگال میں ہونے والے تشدد کا ذمہ دار ٹھہرایا ہے۔ انہوں نے یہ الزام عائد کیا کہ مرکزی وزراء بنگال میں گھوم گھوم کر تشدد بھڑکارہے ہیں۔ انہوں نے کہا کہ انتخابات کے بعد ہونے والے تشدد میں۱۶؍ افراد اپنی جان گنوا بیٹھے ہیں لیکن بی جے پی کے لیڈران ریاست میں لوگوں کو اب بھی اکسارہے ہیں۔ ممتا نے یہ الزام بھی عائد کیا کہ نئی حکومت کے قیام کو۲۴؍ گھنٹے بھی نہیں ہوئے ہیں اور بی جے پی کے لیڈران صدر راج نافذ کرنے اور حکومت کو غیر مستحکم کرنے جیسی کوششوں کے تحت گورنر کو اور صدر جمہوریہ کو خطوط روانہ کررہے ہیں۔ نتائج کے بعد سے بی جے پی لیڈران کا بنگال دورہ بڑھ گیا ہے۔ دراصل وہ عوام کا فیصلہ قبول کرنے کے لئے تیار نہیں ہیں۔میری ان سے گزارش ہےکہ وہ ہوش میں واپس آئیں اور دیکھیں کہ عوام نے کیا فیصلہ کیا ہے۔
مغربی بنگال کی وزیر اعلیٰ ممتا بنرجی جنہوں نے حال ہی میں تن تنہا بی جے پی کی پوری بریگیڈ سے لوہا لیا اور اسے انتخابی جنگ میں شکست فاش دی، کہا کہ انتخابات کے بعد تشدد میں ہلاک ہونے والے تمام افراد کے اہل خانہ کو بلا امتیاز۲؍ لاکھ روپے معاوضہ دیا جائے گا۔ الیکشن کمیشن کے زیر کنٹرول نظم و نسق کے دوران۱۶؍ افراد اپنی زندگی سے ہاتھ دھو بیٹھے ہیں، جن میں سے نصف کا تعلق ٹی ایم سی اور نصف بی جے پی سے ہیں ۔