جموں وکشمیر کی سابق وزیر اعلیٰ نے کہا کہ وادی کی مین اسٹریم کی سیاسی جماعتوں کو بلی کا بکرا بنایا جارہا ہے اور پُرامن آواز اٹھانے پر ہمیں دبایاجارہا ہے

 مرکزی حکومت پر جموں وکشمیر کی مین اسٹریم کی سیاسی جماعتوں کو دبانے کا الزام لگاتے ہوئے سابق وزیر اعلیٰ محبوبہ مفتی  نے اتوار کو کہا کہ افسوس کی بات یہ ہے کہ یہ جماعتیں ’بلی کا بکرا’ بن گئی ہیں اور ’ہر کوئی ان پر ٹھیکرا پھوڑ رہا ہے۔ پی ڈی پی لیڈرنے کہا کہ ان سب کے باوجود وہ آئین کی دفعہ ۳۷۰؍کی بحالی کے لئے ایک ’ طویل اور مشکل سیاسی لڑائی‘ لڑنے کے لئے تیار ہیں، جسے غیر قانونی طریقےسے ہٹایا گیا تھا۔
 محبوبہ مفتی نے کہاکہ’ ’دکھ کی بات ہے کہ  اصل دھارے کی سیاسی جماعتیں بلی کا بکرا بن گئی ہیں اور سب اس پر ٹھیکرا پھوڑ رہے ہیں۔سچ یہ ہے کہ ہم اپنی پوری سیاسی زندگی دہلی کی  جانب سے لگائے جارہے  پاکستان حامی ہونے کے الزامات اور کشمیر سے ہندوستان حامی اور کشمیر مخالف ہونے کے الزامات سے لڑتے ہوئے گزار دیں گے۔‘‘ محبوبہ مفتی نے یہاں پی ٹی آئی - بھاشا کو دیئے گئے انٹرویو میں اس بات پر زور دیا کہ پی ڈی پی اور گپ کار اتحاد بنانے والی مین اسٹریم کی۶؍سیاسی جماعتوں نے صرف جمہوری اور پُرامن طریقے سے  ریاست کے سابقہ خصوصی درجے کو بحال کرانے کے لئے لڑنے کا عزم کیا تھا، لیکن ہندوستانی حکومت ہمیں اب بھی دبا رہی ہے اور عدم اطمینان کی آوازوں کو جرائم کی طرح دکھا رہی ہے۔
’’ کچھ بھی پتھر کی لیکر نہیں‘‘
 پی ڈی پی لیڈر سے جب پوچھا گیا کہ کیا انہیں واقعی امید ہے کہ ہندوستان میں کوئی بھی حکومت پارلیمنٹ کے ذریعہ ۵؍ اگست۲۰۱۹ء کو آرٹیکل۳۷۰؍ ختم کئے جانے کے فیصلے کو بدل دے گی جس کا پورے ملک میں بڑے پیمارے پر خیر مقدم کیا گیا تھا، تو انہوں نے کہاکہ’ ’کچھ بھی پتھر کی لکیر نہیں ہوتا۔اگر پارلیمنٹ کا فیصلہ ہی آخری فیصلہ ہوتا تو لاکھوں لوگ سی اے اے یا زرعی بلوں جیسے قوانین کے خلاف سڑکوں پر نہیں اترے ہوتے۔‘‘ انہوں نے کہا کہ ہم سے جو بھی غیر آئینی طریقے سے چھینا گیا ہے، اسے لوٹانا ہوگا، لیکن یہ لمبی اور مشکل سیاسی لڑائی ہوگی۔ سابق وزیر اعلیٰ محبوبہ مفتی  کے مطابق حال ہی میں ڈسٹرکٹ ڈیولپمنٹ کونسل (ڈی ڈی سی) کے انتخابات میں۲۸۰؍ سیٹوں میں سے ۱۱۲؍ پر گپ کار اتحاد (پی اے جی ڈی) کی جیت نے دکھا دیا ہے کہ عوام نے  دفعہ۳۷۰؍ کو ختم کئے جانے کے فیصلے کو واضح طور پر مسترد کردیا ہے۔