پچھلے سال کا مجموعی نتیجہ ۶۵؍فیصد تھا، جو خاطر خواہ نہ ہونے پر میونسپل شعبہ تعلیم نے طلبہ کی تعلیمی اور سماجی مشکلات کا اندازہ لگایا ، اساتذہ ،تعلیمی مشیروں، پرنسپل اور انتظامی افسران نے طلبہ سے ملاقاتیں کیں۔ اس سروے میں طلبہ کے جو مسائل ابھر کر سامنے آئے ان سے نمٹنے کے اقدامات کئے گئے، اسکولوں کے عملہ نے بھی بہتر سے بہتر نتائج کیلئے مزید محنت کی۔

میرابھائندر میونسپل کارپوریشن کے اسکولوں کا ایس ایس سی امتحان مارچ ۲۰۲۵ءکا نتیجہ مجموعی طور پر۶۵ء۹۰؍فیصد رہا۔میرا بھائندر میونسپل کارپوریشن کے محکمہ اطلاعات و تعلقات عامہ کی جانب سے فراہم کردہ معلومات کے مطابق اس سال۵؍ میونسپل اسکولوں کے کل۲۴۱؍ طلبہ کامیاب ہوئے۔ پاس ہونے کا تناسب مجموعی طور پر۶۵ء۹۰؍ فیصد رہا جو گزشتہ سال کے مجموعی  فیصد۶۵؍ کے مقابلے میں کافی بہتری آئی ہے۔  میونسپل اسکول نمبر ۴؍ کی طالبہ پریتی گائیکواڈ نے۸۵؍فیصد نمبرات سے کامیابی حاصل کی ہے۔
  محکمہ اطلاعات و تعلقات عامہ کی جانب سے فراہم کردہ پریس نوٹ میں کہا گیا کہ گزشتہ سال میونسپل  اسکولوں کے نتائج خاطر خواہ نہیں تھے اس لئے کارپوریشن نے اپنی اسکولوں کا جائزہ لیا اور اس معاملے میں مناسب اقدامات کئے محکمہ تعلیم نے طلبہ کی تعلیمی اور سماجی مشکلات کا اندازہ لگایا اساتذہ ،تعلیمی مشیروں پرنسپل اور انتظامی افسران نے طلبہ سے ملاقاتیں کیں۔
پچھلے سال خاطر خواہ نتائج برآمد نہ ہونے پر سروے کیا گیا
  اس سروے میں طلبہ کے جو مسائل ابھر کر سامنے آئے ان میں صرف مطالعہ کے مسائل نہیں تھےبلکہ مالی، سماجی، خاندانی اور جذباتی چیلنجز سے بھی متعلق تھے۔ اسکول میں دیر سے داخلہ، مالی مشکلات، پڑھائی میں پیش رفت نہ ہونا اور دیگر مشکلات جیسے سنگین مسائل سامنے آئے۔ 
بہتر سے بہتر نتائج کیلئے کون سے اقدامات کئے گئے؟
 سروے کے ذریعہ سامنے آنے والے مسائل اور ان کی سنگینی کو ذہن میں رکھتے ہوئے میرا بھائندر میونسپل کارپوریشن محکمہ تعلیم نے اہم اقدامات کئے ۔ ہر استاد کو۱۰؍ طلباء کی سرپرستی دی گئی یہ اساتذہ باقاعدگی سے رابطے، رہنمائی، ہوم ورک کی جانچ، انفرادی مطالعہ کی منصوبہ بندی، اور مطالعہ کی مشکلات کو حل کرنے میں سرگرم رہے۔ اساتذہ اور طلبہ کے درمیان یہ مضبوط جذباتی رشتہ طلبہ کے خود اعتمادی کے لیے انتہائی مددگار ثابت ہوا۔  طلباء کی انفرادی ضروریات کے مطابق اہم مضامین کی خصوصی کلاس کا اہتمام کیا گیا۔ اس کی وجہ سے ان کے پریڈ اہم موضوعات پر خصوصی توجہ کے ساتھ لئے جاتے تھے۔میونسپل اسکولوں میں ہر طالب علم کو پری امتحان گائیڈز، متوقع سوالات کے سیٹ، نوٹس، اور پریکٹس کے سوالیہ پرچے وقت پر تقسیم کیے گئے۔ اس اقدام سے طلباء کو اپنی پڑھائی کی صحیح منصوبہ بندی کرنے میں مدد ملی، جس سے ان کے اعتماد میں اضافہ ہوا اور امتحانی تناؤ کم ہوا۔ ٹیسٹ سیریز اور پریکٹس سوالیہ پیپرز پہلے سے امتحان کی تیاری کے لیے باقاعدہ ٹیسٹ سیریز، موضوع کے لحاظ سے ٹیسٹ اور مکمل پریکٹس امتحانات منعقد کیے گئے۔ اس مشق نے طلبہ کو امتحان کے فارمیٹ کو سمجھنے، ٹائم مینجمنٹ کی مہارتوں کو فروغ دینے، اور اعتماد میں زبردست فروغ حاصل کرنے میں مدد کی۔ ان تمام اقدامات کی وجہ سے طلباء کی کامیابی میں نمایاں اضافہ ہوا ہے جس کے نتیجے میں اس سال شاندار نتائج برآمد ہوئے ہیں۔
اگلے تعلیمی سال کیلئے کیا مشن ہے؟
 مذکورہ بالا مثبت تجربے سے متاثر ہو کر میونسپل کارپوریشن کے محکمہ تعلیم نے جون۲۰۲۵ء سے شروع ہونے والے نئے تعلیمی سال کے آغاز سے ان تمام اقدامات کو مؤثر طریقے سے نافذ کرنے کا فیصلہ کیا ہے۔ اس بار بنیادی ہدف نہ صرف طلبہ کے پاس ہونے کے فیصد کو بڑھانا ہوگا بلکہ ان کے معیار کو بھی بہتر بنانا ہوگا۔صد فیصد طالب علم کے ’پاس‘ ہونے کے ہدف کو حاصل کرنے کے لیے، میرا بھائندر میونسپل کارپوریشن ایجوکیشن ڈیپارٹمنٹ کے ذریعے ایک  منصوبہ بند طریقہ کار نافذ کیا جائے گا جو ہر طالب علم تک پہنچے۔