نئے سپریم لیڈر مجتبیٰ خامنہ ای کے حوالے سے مختلف افواہیں پھیل رہی ہیں ان کی حالت کیسی اور وہ اس وقت کہاں ہیں؟ کویتی اخبار الجریدہ نے ایران کے سینئر حکام کے حوالے سے رپورٹ کیا ہے کہ ایران کے نئے سپریم لیڈر مجتبیٰ خامنہ ای جو امریکہ اور اسرائیل کے پہلے حملے میں زخمی ہو گئے تھے۔

نئے سپریم لیڈر مجتبیٰ خامنہ ای کے حوالے سے مختلف افواہیں پھیل رہی ہیں ان کی حالت کیسی اور وہ اس وقت کہاں ہیں؟ کویتی اخبار الجریدہ نے ایران کے سینئر حکام کے حوالے سے رپورٹ کیا ہے کہ ایران کے نئے سپریم لیڈر مجتبیٰ خامنہ ای جو امریکہ اور اسرائیل کے پہلے حملے میں زخمی ہو گئے تھے، انہیں خفیہ طور پر علاج کے لیے ماسکو لے جایا گیا تھا۔ 
ذرائع نے بتایا کہ خامنہ ای ۲۸؍ فروری کو اسرائیل اور امریکہ کے اسی حملے میں زخمی ہوئے تھے، جس میں ان کے والد آیت اللہ خامنہ ای کی شہادت ہوئی تھی۔ ان کی حالت کے پیش نظر انہیں اسپتال میں داخل ہونے اور مسلسل طبی دیکھ بھال کی ضرورت تھی۔ الجریدہ کی رپورٹ کے مطابق خامنہ ای کو خفیہ طور پر روسی فوجی طیارے میں تہران سے ماسکو پہنچایا گیا۔ 
رپورٹ میں کہا گیا ہے کہ روسی صدر ولادیمیر پوتن نے ایرانی صدر مسعود پیزشکیان کے ساتھ فون کال کے دوران ذاتی طور پر انہیں علاج کے لیے روس بھیجنے کی تجویز پیش کی۔ کریملن نے تصدیق کی کہ دونوں لیڈروں نے ۱۰؍ مارچ کو بات کی تھی۔  ماسکو پہنچنے پر، خامنہ ای کی مبینہ طور پر سرجری ہوئی اور اب وہ پوتن کی صدارتی رہائش گاہوں میں سے ایک کی بنیاد پر واقع ایک محفوظ طبی سہولت میں علاج کر رہے ہیں۔ 
قبرص میں ایران کے سفیر علی رضا سالاریان نے دی گارڈین کو بتایا کہ خامنہ ای کو ۲۸؍ فروری کے حملے میں چوٹیں آئی تھیں جس میں ان کے والد کی موت واقع ہوئی تھی۔ ان کا یہ بھی کہنا تھا کہ’’میں نے سنا ہے کہ اس کی ٹانگوں، ہاتھ اور بازو میں چوٹ لگی ہے۔ میرے خیال میں وہ اسپتال میں ہے کیونکہ وہ زخمی ہے۔‘‘ 
سی این این کے ایک ذریعے کے مطابق، خامنہ ای کے پاؤں میں فریکچر کے ساتھ ساتھ ان کی بائیں آنکھ کے قریب زخم اور ان کے چہرے پر معمولی زخم آئے ہیں۔  تہران نے خامنہ ای کے زخمی ہونے کی تردید نہیں کی ہے لیکن کہا ہے کہ زخمی ہونے کے باوجود خامنہ ای کی حالت مستحکم ہے۔ 
مجتبیٰ خامنہ ای بالکل ٹھیک ہیں: اسماعیل بقائی
امریکہ اور اسرائیل کی جانب سے ایران پر مسلط کردہ جنگ کے دوران کشیدگی میں مزید اضافہ ہوگیا ہے، ایران کے نئے سپریم لیڈر مجتبیٰ خامنہ ای کے منظرِ عام پر نہ آنے اور ان کی صحت سے متعلق بھی میڈیا پر قیاس آرائیاں گردش کررہی ہیں۔ غیر ملکی ذرائع ابلاغ کے مطابق ایران کے نائب وزیرِ خارجہ اسماعیل بقائی نے ہندوستانی میڈیا کو دیے گئے انٹرویو میں ایرانی سپریم لیڈر کی حالت سے متعلق میڈیا پر گردش کرتی تمام خبروں کی تردید کی۔ 
اُن کا کہنا تھا کہ مجتبیٰ خامنہ ای بالکل ٹھیک ہیں، مجھے یقین ہے کہ آپ پہلے ہی ان کا پیغام سن چکے ہیں اور امید ہے کہ بہت جلد وہ عوام کو ایک اور پیغام دیں گے۔ 

یہ بھی پڑھئے:ایران کے ساتھ جاری تنازع کے درمیان ٹرمپ نے اپنا بیجنگ کا دورہ ملتوی کردیا

واضح رہے کہ مجتبیٰ خامنہ ای کے بارے میں میڈیا پر یہ خبریں گردش کر رہی ہیں کہ وہ ۲۸؍ فروری کو امریکہ اور اسرائیل کی جانب سے تہران پر کیے گئے فضائی حملوں کے دوران زخمی ہو گئے تھے۔اس کے علاوہ امریکی صدر ڈونلڈ ٹرمپ نے اپنے ایک بیان میں کہا ہے کہ مجھے نہیں معلوم کہ مجتبیٰ خامنہ ای زندہ ہیں یا نہیں۔ 

یہ بھی پڑھئے:امتیاز علی کی ’’مَیں واپس آؤں گا‘‘ کا ٹیزر ریلیز

اُنہوں نے یہ بھی کہا کہ میں سن رہا ہوں کہ شاید وہ زندہ نہیں اور اگر زندہ ہیں، تو انہیں اپنے ملک کے لیے دانشمندانہ فیصلہ کرنا چاہیے اور ہتھیار ڈال دینا چاہیے۔  صرف اتنا ہی نہیں بلکہ کچھ میڈیا رپورٹس میں یہ دعویٰ بھی کیا گیا ہے کہ مجتبیٰ خامنہ ای کو مبینہ طور پر فضائی حملوں میں زخمی ہونے کے بعد علاج کے لیے روسی دارالحکومت ماسکو منتقل کر دیا گیا ہے، جہاں ان کی ٹانگ کی سرجری بھی ہوئی ہے۔