یاترا شروع کرنے سے قبل ایک ٹویٹ میں جونیئر پاسوان نے کہا کہ’ ’ان حالات میں آپ بھی غمزدہ ہوںگے ، لیکن میں ہار نہیں مانوں گا، آپ ہی کا بیٹا ہوں‘‘

لوک جن شکتی پارٹی میں سیاسی وراثت کی جنگ ہر گزرتے دن کےساتھ تیز ہوتی جارہی ہے۔ سابق مرکزی وزیر اور ایل جے پی کے بانی را م ولاس پاسوان کے یوم پیدائش پر اُن کے بیٹے چراغ پاسوان نے پیر کو  اپنی آشیرواد یاترا کا آغاز کیا ہے۔  یاترا کے آغاز سے قبل چراغ نے ایک ٹویٹ کرکے اپنے والد کو یاد کیا۔ انہوں نے لکھا کہ ’’ آپ کی بہت یاد آتی ہے۔  میں آپ سے کئے گئے وعدے کو پایہ تکمیل تک پہنچانے کی پوری کوشش کررہا ہوں۔ آپ جہاں کہیں بھی ہیں، ان حالات میں مجھے لڑتا ہوا دیکھ کر آپ غمزدہ ہوںگے۔ آپ ہی کا بیٹا ہوں، ہار نہیں مانوں گا،  میں جانتا ہوں کہ آپ کا آشیرواد میرے ساتھ ہے۔ لو یو پاپا جی۔‘‘ خیال رہے کہ چراغ نے اس یاترا کا آغاز وہیں سے کیا جو اُن کے پاپا کا پارلیمانی حلقہ رہا ہے لیکن آج وہاں  سےآنجہانی پاسوان کے بھائی پشوپتی کمار پارس ایم پی ہیں۔ پارس نے ایل جے پی کے پانچوں اراکین پارلیمان کے ساتھ مل کر چراغ کو پارٹی سے بے دخل کردیا ہے۔اس کے بعد سے چراغ  اپنے سیاسی وجود کی لڑائی لڑ رہے ہیں۔ حالانکہ انہوں نے کہا کہ اس یاترا کو صرف آشیرواد یاترا سمجھا جائے، یہ طاقت کا مظاہرہ نہیں ہے۔