اسپین میں رہائشی بحران کے خلاف احتجاجی مظاہروں کا سلسلہ جاری ہے، جہاں دارالحکومت میڈرڈ کے مرکزی سول اسکوائر میں ۳۰۰؍ سے زائد خیمے نصب کیے گئے ہیں۔ مظاہرین سستے اور قابلِ استطاعت مکانات کی فراہمی اور کرایوں میں اضافے پر قابو پانے کا مطالبہ کر رہے ہیں، جبکہ پارلیمنٹ میں رہائشی بحران سے متعلق حکومتی اقدامات پر ووٹنگ بھی ہونے والی ہے۔

اسپین میں رہائش کے بحران کے خلاف احتجاج کا سلسلہ جمعرات کو بھی جاری رہا اور دارالحکومت میڈرڈ کے مرکزی سول اسکوائر میں ۳۰۰؍ سے زائد خیمے لگائے گئے۔ ۲۶؍ ستمبر سے شروع ہونے والے ان مظاہروں کی حمایت بائیں بازو اور انتہائی بائیں بازو سے وابستہ سول سوسائٹی گروپوں نے کی ہے۔ مظاہرین نے عوامی اجلاس منعقد کیے اور رہائشی علاقوں میں کمیٹیاں قائم کرنے کا مطالبہ کیا تاکہ رہائش کے مسئلے پر ملک گیر ہڑتال کیلئے مہم چلائی جاسکے۔ سیکڑوں مظاہرین نے برتن اور پین بجا کر احتجاج کیا، جبکہ بارسلونا، سیویلا اور لاس پالماس سمیت دیگر شہروں میں بھی چھوٹے پیمانے پر مظاہرے کیے گئے۔

یہ بھی پڑھئے: فلائی دبئی طیارے کے ہائی جیکنگ خدشے پر نیتن یاہو پر انتخابی حربے کا الزام

واضح ہو کہ یہ احتجاج ایسے وقت میں ہو رہا ہے جب اسپین کی پارلیمنٹ رہائش کے بحران سے نمٹنے کیلئے حکومت کی جانب سے پیش کیے گئے ۲؍ حکمناموں پر ووٹنگ کی تیاری کر رہی ہے۔ اپوزیشن جماعت پیپلز پارٹی اور ووکس نے ان اقدامات کے خلاف ووٹ دینے کا اعلان کیا ہے۔ ان حکمناموں کی منظوری کا انحصار باسک اور کاتالونیا کے خطے سے تعلق رکھنے والی چھوٹی سیاسی جماعتوں کے ووٹوں پر متوقع ہے۔ ایک حکمنامے کے تحت کرایے کے معاہدوں میں خودکار اور غیر معینہ مدت تک توسیع متعارف کرانے کی تجویز ہے، جبکہ کرایوں میں اضافے کو صارف قیمت اشاریے سے منسلک کیا جائے گا۔ جو مکان مالک معاہدے میں توسیع سے انکار کرے گا، اسے کرایہ دار کو معاوضہ ادا کرنا ہوگا۔ تاہم اس اقدام کے مسترد ہونے کا امکان ہے۔ تاہم دوسرے حکمنامے کی منظوری متوقع ہے، جس کے تحت بعض کرایہ داری معاہدوں میں ۲؍ سال کی توسیع کی جائے گی، جبری بے دخلی کا عمل ۲۰۳۰ء تک معطل کیا جائے گا اور موسمی و کمرہ کرایے پر دینے کیلئے نئے قواعد متعارف کرائے جائیں گے۔ اس کے علاوہ ایسے معاہدوں میں کرایہ بڑھانے پر بھی پابندی ہوگی جو رہائشی قیمتوں کے مقررہ اشاریے کی حد سے تجاوز کرتے ہوں۔

یہ بھی پڑھئے: مکہ: مسجد الحرام میں خودکش بمبار کی افواہ، سیکوریٹی حکام نے تردید کی

حکمنامے کے تحت بعض زیادہ خطرے والے سرمایہ کاری فنڈز، جنہیں ’’ولچر فنڈز‘‘ (Vulture Funds) کہا جاتا ہے، کو ۲۰۲۸ء تک مکانات خریدنے سے روکنے کی بھی تجویز ہے۔ حکومت کے مطابق ان اقدامات سے ۱۸؍ لاکھ ۹۰؍ ہزار کرایہ داری معاہدوں کے تحت رہنے والے تقریباً ۵۰؍ لاکھ افراد کو فائدہ پہنچے گا۔ رہائش کا بحران اسپین میں ایک اہم سیاسی مسئلہ بن چکا ہے۔ گزشتہ ماہ میڈرڈ میں ۸۷؍ سالہ ماری کارمین کو اس مکان سے زبردستی بے دخل کیے جانے کے بعد یہ مسئلہ مزید توجہ کا مرکز بنا جہاں وہ ۷۰؍ سال سے رہ رہی تھیں۔ بعد ازاں میڈرڈ سٹی کونسل اور ایک جائیداد سرمایہ کاری کمپنی کے درمیان معاہدے کے نتیجے میں توقع ہے کہ وہ نئے ۸؍ سالہ کرایہ داری معاہدے کے تحت دوبارہ اپنے گھر واپس جا سکیں گی۔ نئے معاہدے کے مطابق انہیں کرایے کی مد میں اپنی پنشن کا ۳۰؍ فیصد ادا کرنا ہوگا۔