شہر ناندیڑ کی ایک مسجد کی دیوار پر پوسٹر لگانے کی اجازت دے کر میونسپل کارپوریشن پیسے کما رہا ہے جبکہ یہ جگہ سرکاری نہیں بلکہ مسجد کی ہے۔

شہر ناندیڑ کی ایک مسجد کی دیوار پر پوسٹر لگانے کی اجازت دے کر میونسپل کارپوریشن پیسے کما رہا ہے جبکہ یہ جگہ سرکاری نہیں بلکہ مسجد کی ہے۔ اس پر مسجد انتظامیہ ناراض ہے اور  اس نے مسجد کی دیواروں پر اشتہارات اور پوسٹر نہ لگانے کی استدعا کی ہے۔ اس کیلئے انتظامیہ کو تحریری  درخواست بھی  دی گئی ہے۔
  اطلاع کے مطابق ناندیڑ کی مسجد وزیرآباد کے قبرستان کی دیوار کے پاس شہری انتظامیہ نے ’ بینرس پوائنٹ ‘ بنایا ہے۔ یعنی یہاں لوگ میونسپل کارپوریشن کو فیس ادا کرکے اشتہارات اور پوسٹر لگا سکتے ہیں۔ مزے کی بات یہ ہے کہ مذکورہ جگہ سرکاری نہیں ہے بلکہ یہ مسجد انتظامیہ کی ملکیت ہے جو کہ وقف بورڈ کے تحت آتی ہے۔ یہاں مسجد کی دیوار پر اشتہارات لگانے کی وجہ سے لوگوں میں ناراضگی ہے۔ بلکہ  کچھ وقت کیلئے کشیدگی بھی پیدا ہو گئی تھی۔ 
 یہی وجہ ہے کہ مسجد انتظامیہ نے دیوار پر بینر لگائے جانے کی مخالفت کی ہے اور مسجد وزیرآباد کمیٹی کے ذمہ اران و مصلیان پر مشتمل ایک وفد نےسنیچر کو  میونسپل کارپوریشن دفتر پہنچ کر کمشنر سے ملاقات کی اور انہیں ایک میمورنڈم دیا جس میں مسجد کی دیوار پر سے ’بینرس پوائنٹ ختم کرنے کا مطالبہ کیا گیا ۔ مکتوب میں کہا گیا ہے کہ مسجد کے اطراف میں اشتہار بازی نامناسب ہے۔ عبادتگاہ کے تقدس کے خلاف ہے۔ اس پر یہ جگہ میونسپل کارپوریشن کی ملکیت نہیں ہے بلکہ وقف بورڈ میںرجسٹرڈمسجد کی ملکیت ہے۔ ان اشتہارات کی وجہ سے عوام کی ناراضگی کا بھی حوال دیا گیا ہے۔  
  ناندیڑ کے سینئر صحافی عبدالستار عارف نے  گفتگو کے دوران بتایا کہ ماضی میں بھی کارپوریشن کی جانب سےکر مسجد کی دیوار کے پاس  بینرس  لگانے کا سلسلہ شروع کیا گیا تھا جس کی لوگوں نے مخالفت کی تھی  حتیٰ کہ یہاں  حالات بگڑ گئے تھے جس پر پولیس کو  لاٹھی چارج کرنی پڑی تھی۔ انہوں نے کہا ’’ ہمارا کہنا ہے کہ اس جگہ پر بینرس  نہ لگائے جائیں۔ یہ جگہ ویسے بھی مسجد وزیرآباد کی   ملکیت ہے جو اوقاف سے رجسٹرڈ ہے۔ یہاں مصلیان کمیٹی کی مجلس  عاملہ کی فہرست باقاعدہ وقف بورڈ کو بھیجی جاتی ہے ۔اْسے اوقاف  کی جانب سے منظوری ملنے کے بعد مجلس عاملہ یہاں کے امور کا اختیار رکھتی ہے۔ اس مجلس عاملہ ( یا کمیٹی) کی اجازت کےبغیر مسجد یا قبرستان کی دیوار کا کوئی استعمال نہیں کیا جا سکتا۔ ‘‘
  عبدالستار عارف نے کہا’’ مسلمانوں کے جذبات مجروح نہ ہو ںاسلئے یہ پوائنٹ منسوخ کیا جائے ۔کمشنر مہش کمار ڈویفوڑے نے وفد  کی باتیں سنیں اور اس معاملے میں جلد ہی کوئی فیصلہ کرنےکا تیقن دیا۔ اس موقع پر مسجد کمیٹی کے ذمہ داران، مسجد کے امام و خطیب  مفتی ایوب قاسمی، نائب امام محمد ریاض، موذن محمد ابراہیم کے علاوہ توفیق حسین، فاروق عمرکھیڑی، عبدالمختار عابد وغیرہ موجود تھے۔