ایم این ایس سربراہ نے لکھا’’ اگر ایسی ہی صورتحال رہی تو کل کون کھلاڑی ملک کیلئے خون پسینہ ایک کرے گا؟‘

مہاراشٹر نونرمان سینا کے سربراہ راج ٹھاکرے نے بدھ کو وزیراعظم نریندر مودی کے نام ایک خط لکھا ہے جس میں انہوں نے دہلی میں مسلسل احتجاج کر رہی خاتون پہلوانوں کے مطالبات کو تسلیم کرنے اور ان کے ساتھ ہوئی بد سلوکی پر توجہ دینے کا  مطالبہ کیا ہے۔ 
  مراٹھی زبان میں لکھے گئے اس خط کو خود راج ٹھاکرے نے اپنے فیس بک اکائونٹ  پر شیئر کیا ہے۔  مہاراشٹر نو نرمان سینا کے صدر نے اس خط کی شروعات ہی ایک طنزیہ جملے سے کی ہے۔  انہوں نے لکھاہے کہ ’’ آپ کو اس معاملے کا علم غالبا ً نہ ہو لیکن مجھے اس کے تعلق سے معلومات ہے کہ  اور اب ملک کے ’پردھان سیوک‘ ہونے کی حیثیت سے آپ اس جانب توجہ فرمائیں۔ ‘‘  خط میں آگے تحریر ہے کہ’’  وہ جنہیں آپ ’دیش کی بیٹیاں‘ کہہ کر یاد کرتے ہیں، وہ جن کی وجہ سے ملک کو کشتی کے کھیل میں کئی میڈل حاصل ہوئے، وہ خاتون پہلوان گزشتہ کئی دنوں سے دہلی  میں احتجاج کر رہی ہیں۔ ان کی شکایت ہے کہ کشتی فیڈریشن کے چیئرمین نے انہیں جنسی طور پر ہراساں کیا ہے۔  اور انہیں حکومت سے بس اتنی امید ہے کہ اس جانچ میں کسی بھی طاقتور شخص کی مداخلت نہیں ہوگی۔ ‘‘ 
  راج ٹھاکرے نے نریندر مودی کو یاد دلایا کہ جب گجرات کے وزیراعلیٰ تھے تو اتراکھنڈ میں ہونے والا حادثہ ہو یا ممبئی میں ۱۱؍۲۶؍ کا حملہ ہو،  آپ فوراً وہاں پہنچے تھے۔ یقیناً یہ آپ کی فکر مندی تھی۔  یہی فکر مندی آپ  اپنے دفتر سے تھوڑے ہی فاصلے پر دھرنے پر بیٹھی خواتین کے تعلق سے بھی دکھائیں۔  یہی  خواہش؍ درخواست خاتون پہلوانوں کی بھی ہے اور مہاراشٹر نو نرمان سینا کی بھی۔  اگر انہیں انصاف نہیں ملا تو کیا کوئی بھی کھلاڑی اپنا خون پسینہ ایک کرکے ملک کیلئے تمغہ حاصل کرنے کی تمنا کرے گا؟  ہمارے ملک کی حکومت کو ہمارے زخموں کی پروا نہیں ہے ، اگر ملک میں یہ ماحول رہا تو ’کھیلو انڈیا‘ یہ(نعرہ) ایک خواب ہی  رہ جائے گا۔  راج ٹھاکرے نے خط کے آخر میں لکھا ہے ’’ اگر آپ سچ میں ان کھلاڑیوں کو ملک کا فخر تصور کرتے ہیں تو امید ہے کہ آپ اس بات کو یقینی بنائیں گے کہ گزشتہ ۲۸؍ مئی کو ان خواتین کے ساتھ جو بدسلوکی کی گئی وہ آئندہ نہ ہو، اور ان کی  شکایتوںکو سنا جائے۔
 یاد رہے کہ گزشتہ کچھ عرصے سے بی جے پی کی حمایت میں بولنے والے راج ٹھاکرے نے اچانک  اپنا رویہ تبدیل کر لیا ہے اور کرناٹک الیکشن کے نتائج کے بعد سے وہ مسلسل بی جے پی کے خلاف بیانات دے رہے ہیں۔