شاہ پور تعلقہ کے کنہاولی کے قریب واقع شِل گاؤں میں غذائی سمیت کا واقعہ پیش آیا جس میں ایک ہی خاندان کے ۲۲؍افراد بیمار ہوگئے۔

شاہ پور تعلقہ کے کنہاولی کے قریب واقع شِل گاؤں میں غذائی سمیت کا واقعہ پیش آیا جس میں ایک ہی خاندان کے ۲۲؍افراد بیمار ہوگئے۔ متاثرین میں سے ۲۱؍افراد کو علاج کیلئے شاہ پور سب ڈسٹرکٹ اسپتال میں داخل کرایا گیا ہے جبکہ ایک شخص کی حالت تشویشناک ہونے پر اسے تھانے سول اسپتال منتقل کیا گیا ہے۔ تمام مریضوں کا علاج جاری ہے اور بیشتر کی حالت مستحکم بتائی جارہی ہے۔ 

یہ بھی پڑھئے: کلیان: عید الاضحی کی نماز کے دوران ہندو تنظیموں کا گھنٹہ ناد آندولن

موصولہ اطلاعات کے مطابق شِل گاؤں میں اشوک بھوئیر کی والدہ بارکابائی بھوئیر کے انتقال کے بعد تیسرے دن تعزیتی پروگرام منعقد کیا گیا تھا، جس میں رشتہ داروں اور قریبی افراد کیلئے کھانے کا انتظام کیا گیا۔ دوپہر میں تیار کیا گیا کھانا کچھ افراد نے وہیں تناول کیا جبکہ بچ جانے والے کھانے کو خراب ہونے سے بچانے کیلئے ٹھنڈے پانی سے بھری بالٹی میں محفوظ رکھا گیا تھا۔ شام کے وقت یہی بچا ہوا کھانا دوبارہ رشتہ داروں اور قریبی افراد کو پیش کیا گیا۔ کھانا کھانے کے کچھ ہی دیر بعد کئی افراد کو قے، دست، بخار اور متلی کی شکایت شروع ہوگئی۔ رات تقریباً۹؍ بجے ۲۲؍افراد کی طبیعت بگڑنے پر انہیں فوری طور پر کنہاولی پرائمری ہیلتھ سینٹر منتقل کیا گیا، جہاں ابتدائی علاج کے بعد ۲۱؍افراد کو شاہ پور سب ڈسٹرکٹ اسپتال جبکہ ہری بھوئیر کو مزید علاج کے لئے تھانے سول اسپتال ریفر کیا گیا۔ 
انتظامیہ کے مطابق تمام مریضوں کی حالت فی الحال بہتر ہے۔ واقعہ کے بعد محکمہ صحت نے معاملے کی جانچ شروع کردی ہے۔ اسی دوران شاہ پور پنچایت سمیتی کے گٹ وکاس افسر بی ایچ راٹھوڑ نے جمعہ کی صبح اسپتال پہنچ کر مریضوں کی عیادت کی اور متعلقہ حکام کو ضروری ہدایات جاری کیں۔