ریاست بھر میں منگل۳؍ مارچ سے دہم جماعت کے بورڈ کے امتحان کا آغاز ہوا۔ پہلا پرچہ زباندانی کا تھا ۔یہاں مکتائی نگر کے کرارڈ کاکورڈ قصبے میں مراٹھی زباندانی کا پرچہ امتحان شروع ہونے سے چند منٹ قبل سوشل میڈیا پر گشت کرنے کا معاملہ پیش آیا ہے۔

 جلگاؤں : ریاست بھر میں منگل۳؍ مارچ سے دہم جماعت کے  بورڈ کے امتحان کا آغاز ہوا۔پہلا پرچہ زباندانی کا تھا ۔یہاں مکتائی نگر کے کرارڈ کاکورڈ قصبے میں مراٹھی زباندانی کا پرچہ امتحان شروع  ہونے سے چند منٹ قبل سوشل میڈیا پر گشت کرنے کا معاملہ پیش آیا ہے۔اس معاملے میں  پنچایت سمیتی کے ایجوکیشن آفیسر نے متعلقہ امتحانی سینٹر کے انچارج اور سپروائزر کے خلاف مکتائی نگر پولیس اسٹیشن میں معاملہ درج کروایا ہے،ساتھ ہی فیض پور میں ۵؍ طلبہ کونقل کرتے ہوئے بھی پکڑا گیا ہے ۔
 اس واقعے کے منظر عام پر آنے سے تعلیمی حلقوں میں کھلبلی مچ گئی ہے ۔ایجوکیشن محکمہ اور امتحانی سینٹر پر چوطرفہ تنقیدیں کی جارہی ہیں۔ یہ معاملہ شیواجی ہائی اسکول نامی امتحانی سینٹر پر پیش آیا ہے۔ ذرائع کے مطابق یہاں چند طلبہ نے ایک معلم کی مدد سے  وہاٹس ایپ پر سوالیہ پرچہ ڈالا تھا ۔امتحانی سینٹر کے باہر ایک نوجوان سوالیہ پرچے کی مدد سے اس کا جواب تلاش کررہا تھا ۔اس کے بعد  یہ معاملہ منظر عام پر آیا ۔ دوسری جانب فیض پور میں میونسپل اسکول امتحانی سینٹر پر ۵؍ طلبہ کے پاس سے نقل کرنے  خاطر خواہ مواد ضبط کرنے کی کارروائی ہوئی۔ یہ کارروائی  محکمہ ایجوکیشن کے نقل مخالف دستے نے کی  ۔
 ناسک کے محکمہ ایجوکیشن کی جانب سے امتحانات کو نقل سے پاک بنانے کیلئے سخت اقدامات اٹھائے گئے ہیں ۔ناسک بورڈ کے ڈپٹی سیکریٹری نیتن اُپاسنے نے ضلعے کے تمام امتحانی سینٹروں کے سینٹر انچارج کو یکجا کر کے امتحانی سینٹروں پر امتحانات کے دوران ہونے والی غیر قانونی کارروائیوں پر روک لگانے کیلئے سختی سے ہدایات دی تھیں۔