کمیٹی کے وکیل نے ہائی کورٹ میں سماعت کے دوران چیف جسٹس کے سامنے دلائل پیش کئے ،محکمہ آثار قدیمہ کے موقف پرسوال اٹھائے ،سروے روکنے کا مطالبہ

وارانسی کی گیانواپی مسجد سمیت ۲۲؍مساجد کی دیکھ بھال کرنے والی انجمن انتظامیہ مسجد کمیٹی نے مسجد کے احاطے (وضو خانہ کو چھوڑ کر) کے اے ایس آئی کے ذریعے سروے کرانے کی درخواست کو منظور کرنے کے ضلع عدالت کے حکم کے خلاف الٰہ آباد ہائی کورٹ  سے رجوع کرلیا ہے۔ یہ عرضی سپریم کورٹ کی اس ہدایت کے ایک دن بعد دائر کی گئی ہے کہ وارانسی عدالت کے حکم کو ۲۶؍جولائی کی شام ۵؍بجے تک نافذ نہیں کیا جانا چاہئے تاکہ مسجد کمیٹی کو ہائی کورٹ سے رجوع کرنے کیلئے کچھ وقت مل سکے۔
 امید کے مطابق  انتظامیہ کمیٹی نے منگل کو  ہائی کورٹ سے رجوع کرلیا۔ یہاں چیف جسٹس پریتنکر دیواکر کی بنچ نے خود اس معاملے کی سماعت کی۔ کمیٹی کی جانب سے پیش ہوئے سینئر وکیل ایس ایف اے نقوی نے بنچ کے سامنے اپنے دلائل میں کہا کہ گیان واپی کا سروے ملک میں اتھل پتھل مچاسکتا ہے۔ اسے فوری طور پر روکنے کی ضرورت ہے۔ انہوں نے یہ بھی کہا کہ ضلع عدالت کے سامنے سماعت کے دوران محکمہ آثار قدیمہ فریق نہیں تھا اس لئے اسے بھی سروے کا کام دینا مناسب نہیں ہے۔ اس سے کافی بے چینی پیدا ہو رہی ہے۔ انہوں نے وارانسی کی عدالت  میں سماعت پر بھی اعتراض کیا اور کہا کہ اس کی وجہ سے جو حالات  بن رہے ہیںوہ کسی کے بھی حق میں نہیں ہیں۔ بہر حال ایڈوکیٹ نقوی کے دلائل مکمل نہیں ہوئے تھے اور کورٹ کا وقت ختم ہو گیا تھا جس کے بعد معاملے کی سماعت بدھ تک ملتوی کردی گئی ۔