اجمیر شریف میں روایتی طور پر وزیراعظم کی طرف سے پیش کی جانے والی چادر چڑھانے سے روکنے کی درخواست کو سپریم کورٹ نے رد کر دیا۔ یہ مقدمہ ہندو سینا کے چیف نے جنوری ۲۰۲۵ء میں دائر کیا تھا جس میں دعویٰ کیا گیا ہے کہ اجمیر درگاہ ہندو مندر کو توڑ کر بنائی گئی ہے۔

بار اینڈ بنچ کی رپورٹ کے مطابق پیر کو سپریم کورٹ نے وزیراعظم ہند نریندر مودی کو اجمیر شریف درگاہ پر چادر چڑھانے سے روکنے کی درخواست کو رد کر دیا ہے۔ چیف جسٹس سوریہ کانت اور جسٹس جوئے مالیا باگچی کی بنچ نے کہا کہ یہ معاملہ بے نتیجہ ہے کیوں کہ چادر کا چڑھاوا دسمبر میں پہنچایا جا چکا ہے۔ بنچ نے  مزید کہا کہ یہ معاملہ کوئی ’’انصافی مسئلہ نہیں‘‘ یا ایسا معاملہ نہیں کہ جس کا فیصلہ عدالت کرے۔ تاہم عدالت نے یہ بھی واضح کیا کہ اس حکم سے زیر سماعت مقدمہ پر کوئی اثر نہیں پڑے گا جس میں دعویٰ کیا گیا ہے کہ ۱۳؍ ویں صدی کے صوفی بزرگ خواجہ معین الدینؒ کا مزار شیو مندر پر تعمیر کیا گیا ہے۔

یہ بھی پڑھئے: سنبھل: مسجد، مدرسہ منہدم، بلڈورز کارروائی پر تنازع

واضح ہو کہ چادر کے سالانہ چڑھاوے کے خلاف مقدمہ ہندو سینا کے چیف وشنو گپتا نے جنوری ۲۰۲۵ء میں دائر کیا تھا، جس میں بحث تھی کہ یہ عمل سیاسی تنازع کیلئے جواز پیش کرتا ہے۔ اپنے اصل مقدمے میں گپتا نے ہدایت مانگی کہ اجمیر شریف درگاہ کو بھگوان شری سنکٹموچن مہادیو ویراجمان مندر قرار دیا جائے۔ درخواست میں یہ اپیل کی گئی کہ درگاہ کے احاطے سے کمیٹی کو نکالا جائے اور مطالبہ کیا گیا ہے کہ اس جگہ کا آرکیالوجیکل سروے کرایا جائے۔ درخواست گزار نے دعویٰ کیا ہے کہ داخلی حصے کی چھت پر جو نقاشی کی گئی ہے اس سے معلوم ہوتا ہے کہ یہ ہندو عمارت ہے اور یہ جگہ اصل میں ایک مندر ہے۔ یاد رہے کہ نریندر مودی نے ۲۰۱۴ء سے وزیراعظم ہند کی جانب سے درگاہ کیلئے چادر بھیجنے کی روایت برقرار رکھی ہے۔ 

یہ بھی پڑھئے: دہلی حکومت نے سال بھر کیلئے مفت شکر کی تقسیم کی منظوری دی

لائیو لاء کی رپورٹ کے مطابق گپتا نے درخواست میں بحث کی ہے کہ اس عمل کی شروعات ملک کے پہلے وزیر اعظم جواہر لال نہرو کے ذریعے ۱۹۴۷ء میں ہوئی جس کی کوئی آئینی بنیاد نہیں ہے۔ چڑھاوے کے خلاف یہ مقدمہ جنوری ۲۰۲۵ء میں نریندر مودی کی طرف سے روایتی چادر بھیجے جانے سے قبل دائر کیا گیا تھا۔ قابل ذکر بات یہ ہے کہ اس کے بعد ۲۲؍ دسمبر کو وزیر برائے اقلیتی امور کرن رجیجو نے نریندر مودی کی طرف سے چادر پیش کی تھی۔

On the auspicious occasion of the 814th Urs of Khwaja Garib Nawaz, I had the privilege of visiting the revered Dargah Sharif, Ajmer & offering the sacred chadar at the holy shrine.
I prayed for the peace, harmony & well-being of all. Khwaja Sahib’s timeless message of love,… pic.twitter.com/nT94vxCEsM

— Kiren Rijiju (@KirenRijiju) December 22, 2025

واضح رہے کہ دسمبر ۲۰۲۴ء میں سپریم کورٹ نے ٹرائل عدالتوں کو عبادت گاہوں کے مذہبی کردار اور سروے کی ہدایت سے متعلق احکامات جاری کرنے سے روک دیا ہے۔ سپریم کورٹ نے مزید کہا کہ جب تک عباد تگاہوں کے قانون (۱۹۹۱ء) کی آئینی حیثیت پر فیصلہ نہیں سنایا جاتا تب تک ملک بھر میں کہیں بھی اس قانون کے تحت نئے مقدمات درج نہیں کئے جائیں گے۔ یہ قانون ۱۵؍ اگست ۱۹۴۷ء کے وقت موجود کسی بھی عبادت گاہ میں تبدیلی کی اجازت نہیں دیتا۔ یاد رہے کہ اس وقت ملک بھر میں وارانسی کی گیان واپی مسجد، متھرا کی شاہی عید گاہ مسجد اور جونپور کی اٹالہ مسجد سمیت ۱۰؍ مساجد اور مقبروں پر کم از کم ۱۸؍ مقدمات زیر سماعت ہیں۔ ہندو فریق نے ان مقدمات میں دعویٰ کیا ہے کہ یہ عمارتیں قدیم ہندو مندروں کو توڑ کر بنائی گئی ہیں۔