ائیر انڈیا ایکسپریس کے طیارے میں سبزیاںبھیجی گئیں،دو میٹرک ٹن کے کارگو میں پرول، بھنڈی، ننوا، کندرو اورسورن وغیرہ سبزیاں ہیں

پوروانچل کی سبزیوں کو ایک بار پھر خلیجی ممالک  میں بھیجنے کی شروعات کر دی گئی ہے۔ دبئی اور شارجہ کے عوام پوروانچل کی تغذیہ بخش سبزیوں کا مزہ چکھ سکیں گے۔بابت پور واقع لال بہادر شاستری انٹرنیشنل ائیر پورٹ سے ائیر انڈیا ایکسپریس کے طیارے نے ہری سبزیوں کو لے کر اڑان بھری ہے۔دو میٹرک ٹن کے کارگو میں پرول، بھنڈی، ننوا، کندرو وسورن وغیرہ سبزیاں ہیں۔ ۲۰۲۰ء  میں بھی لندن،دبئی، دوحہ،قطر جیسے ممالک میں ہری مرچ، بنارسی لنگڑا آم، کالا نمک اور چاول برآمد کیا گیاتھا۔سرکاری ذرائع نے جمعرات کو بتایا کہ دلالوں کو درمیان سے ہٹا کر کسان اشیائے خوردنی  براہ راست برآمد کررہے ہیں جس سے ان کو زیادہ منافع مل رہا ہے۔ کسانوں کے گروپ فامر پروڈیوسر آرگنائزیشن (ایف پی او) کے ذریعہ کسان بغیر دلالوں کے براہ راست  پیداوار ایکسپورٹ کررہے ہیں جس سے ان کو زیادہ منافع ہورہا ہے۔ حکومت  کے ذرائع کا کہنا ہے کہ وہ  دلالوں کوہٹا کر کسانوں کی محنت کا پورا پیسہ ان کو دلانا چاہتی ہے۔ ان اقدامات کے ذریعے حکومت کسانوں کی آمدنی دوگنی کرنے میں تیزی سے کامیاب ہورہی ہے۔ جس میں کھیتی کی جدید کاری، کسانوں کی تربیت،اچھی بیج و کھاد کی وقت پر دستیابی، قدرتی آفات کے وقت مناسب معاوضہ وغیرہ حکومت کی امداد شامل ہیں۔ سرکل انچارج ڈاکٹر سی بی سنگھ نے بتایا کہ وزیر اعظم کے انتخابی حلقے وارانسی  کے لال بہادر شاستری ائیر پورٹ سے اس سیزن کا پہلی بار پوروانچل کے اضلاع وارانسی، پریاگ راج، بھدوہی سےدو میٹرک ٹن  سبزیاں یو اے ای کے دبئی اور شارجہ کیلئے روانہ ہوئیں جس میں بھنڈی، ننوا، پرول، کندرو اور سورن شامل ہیں۔انہوں نے بتایاکہ یہ سبزیاں بھدوہی کے فارمر پروڈیوس آرگنائزیشن کے ذریعے برآمد کی جارہی ہیں۔  اس تنظیم  سے تقریباً۱۵-۲۰؍کسان جڑے ہوئے ہیںجبکہ پوروانچل میں تقریباً۳۵؍ تا ۴۰؍ ایف پی او سرگرم عمل ہیں جس سے تقریباً ۳۵- ۴۰؍ہزار کسان جڑکر اپنی آمدنی بڑھا رہے ہیں۔