عبوری ضمانت ۲۹؍ دسمبر کو ختم ہو جائے گی، ۳۰؍ دسمبر کو عمر خالد کو خود سپردگی کرنی ہو گی ، ستمبر ۲۰۲۰ء سے جیل میں تھے

طلبہ لیڈر عمر خالد جمعہ کو تہاڑ جیل سے رِہا ہو گئے۔ عدالت نے انہیں ان کی بہن کی شادی میں شرکت کے لئے ۷؍دن کی عبوری ضمانت دی ہے۔ جیل حکام کے مطابق انہیں جمعہ کی صبح ۷؍بجے رہا کیا گیا اور ساتھ ہی متعدد ہدایات دی گئیں ۔ یاد رہے کہ دہلی کی  عدالت نے ۱۲؍ دسمبر کو عمر خالد کی عبوری ضمانت کی درخواست منظور کی تھی۔ خالد نے دو ہفتوں کے لئے ضمانت  دینے کی  درخواست کی تھی لیکن انہیں ایک ہی ہفتہ کی ضمانت دی گئی۔حکم جاری کرتے ہوئے ایڈیشنل سیشن جج امیتابھ راوت نے واضح کیا تھا کہ عبوری ضمانت ۲۳؍ دسمبر سے شروع ہوگی جو ۲۹؍ دسمبر تک جاری رہے گی۔انہیں ۳۰؍ دسمبر کو خودسپردگی کرنی ہوگی۔ 
 یاد رہے کہ عمر خالد ستمبر۲۰۲۰ء سے حراست میں  ہیں۔ اس سے قبل ۱۸؍ اکتوبر کو جسٹس سدھارتھ مردول اور جسٹس رجنیش بھٹناگر کی خصوصی بنچ نے انہیں ضمانت دینے سے انکار کر دیاتھا۔عمر خالد پر دہلی فسادات کی سازش رچنے کا سنگین الزام عائد کیا گیا ہے۔