مغربی بنگال سے تعلق رکھنےوالی شاہدہ کے اہل خانہ عدالتی چارہ جوئی پر مجبور۔

مغربی بنگال سے تعلق رکھنےوالی ۴۰؍ سالہ  شاہدہ  جو تقریباً ۲؍ دہائیوں سے اپنے خاندان کے ساتھ نوی ممبئی میں مقیم تھیں، کو پولیس نے  ’’درانداز‘‘ ہونے کے شبہ میں  بنگلہ دیش بھیج دیاگیاہے۔ 

دی انڈین ایکسپریس کے مطابق شمالی۲۴؍ پرگنہ ضلع کے سوروپ نگر کی  رہنے والی شاہدہ فقیر نوی ممبئی کے سانپاڑہ میں اپنے شوہر۴۵؍ سالہ جمن فقیراور ساتویں جماعت میں زیر تعلیم چھوٹے بیٹے کے ساتھ رہتی تھیں۔   رپورٹ کے مطابق شاہدہ کو۱۸؍ جولائی کو اس وقت پولیس نے حراست میں لیا جب وہ مقامی بازار گئی تھیں۔ اس کے بعد ان کے اہل خانہ چمبور  کےحراستی مرکز  میں ان سے ملنے پہنچے اور شاہدہ کی ہندوستانی شہریت ثابت کرنے کیلئے دستاویز پیش کئے ۔جمن نے انڈین ایکسپریس کو بتایا کہ انہوں نے  شاہدہ کا پیدائش کا سرٹیفکیٹ، اسکول کا سرٹیفکیٹ، والدین کی زمین کی دستاویزات اور دیگر شناختی کاغذات پیش کئے  تاہم ۳؍دن بعد خاندان کو اطلاع دی گئی کہ شاہدہ کو پہلے ہی بنگلہ دیش بھیج دیا گیا ہے۔