یمنیٰ حسن نے جنریٹو اے آئی کو اصل تخلیقی کام سونپنے کے بڑھتے ہوئے رجحان کے خلاف دلیلیں پیش کیں۔ انہوں نے تخلیقی صلاحیت کو ایک ایسے پٹھے (muscle) سے تشبیہ دی جو ورزش اور فکری محنت کے ذریعے مضبوط ہوتا ہے۔ انہوں نے متنبہ کیا کہ خودکار ٹولز پر حد سے زیادہ انحصار کے باعث ذہنی صلاحیت کے کمزور پڑنے (cognitive atrophy) کا خطرہ پیدا ہوتا ہے۔

نوجوان مقرر یمنیٰ حسن نے آکسفورڈ یونیورسٹی کے ایک مباحثے میں مصنوعی ذہانت (اے آئی) کے دور کے ایک اہم چیلنج پر اظہارِ خیال کرکے ’بہترین پروپوزیشن اسپیکر‘ (Best Proposition Speaker) کا اعزاز اپنے نام کرلیا۔ ان کی شاندار فتح کے بعد معزز شرکاء کی پرجوش تالیوں کے درمیان آکسفورڈ کے لارڈ میئر نے ذاتی طور پر انہیں یہ ایوارڈ پیش کیا۔

یمنیٰ حسن نے جنریٹو اے آئی کو اصل تخلیقی کام سونپنے کے بڑھتے ہوئے رجحان کے خلاف دلیلیں پیش کیں۔ انہوں نے تخلیقی صلاحیت کو ایک ایسے پٹھے (muscle) سے تشبیہ دی جو ورزش اور فکری محنت کے ذریعے مضبوط ہوتا ہے۔ انہوں نے متنبہ کیا کہ خودکار ٹولز پر حد سے زیادہ انحصار کے باعث ذہنی صلاحیت کے کمزور پڑنے (cognitive atrophy) کا خطرہ پیدا ہوتا ہے۔ انہوں نے خبردار کیا کہ معمول کی خودکاریت بالآخر روزمرہ کے کاموں کو آزادانہ طور پر انجام دینے کی صلاحیت کو ختم کر سکتی ہے۔ تخلیقی صلاحیت کو ”تہذیب کی دھڑکن“ قرار دیتے ہوئے انہوں نے اس مسئلے کو انتہائی ذاتی قرار دیا اور زور دیا کہ انسانی ذہانت کا تحفظ خود انسانیت کے ایک لازمی حصے کے تحفظ کے مترادف ہے۔

یہ بھی پڑھئے: عائشہ وہاب پہلی افغان نژاد امریکی کانگریس رکن بنیں، AIPAC حامی حریف کو شکست

یہ فتح یمنیٰ حسن کے اعزازات کی طویل فہرست میں ایک اور اضافہ ہے۔ حسن نے اقوامِ متحدہ کا چینج میکر ایوارڈ ۲۰۲۶ء، فیشن فیکٹر دبئی ۲۰۲۶ء میں بہترین جین زی پوڈکاسٹ ایوارڈ، ’انٹرپرینیور مڈل ایسٹ‘ کی جانب سے ۲۰۲۵ء کا بہترین جین زی ایوارڈ، ’انڈیا انٹرنیشنل انفلوئنسر ایوارڈز ۲۰۲۵ء‘ میں سال کی بہترین جین زی مصنفہ اور ’گلف اچیورز ایوارڈز ۲۰۲۵ء‘ میں بہترین بین الاقوامی مصنفہ کا ایوارڈ، جیسے کئی اعزازات اپنے نام کئے ہیں۔ ان کے کام کو انٹرپرینیور مڈل ایسٹ، خلیج ٹائمز، گلف نیوز اور پیپر (PAPER) میگزین میں بھی نمایاں کوریج ملی ہے۔

حسن نے اپنے ساتھیوں پر زور دیا ہے کہ وہ اے آئی سے تیار کردہ شارٹ کٹس کے بجائے علم میں سرمایہ کاری کریں، نئے مشاغل اپنائیں اور حقیقی مہارت حاصل کریں، نیز انہوں نے جین زی کی حوصلہ افزائی کی کہ وہ جدید ٹولز کے استعمال میں مہارت حاصل کرنے کے ساتھ ساتھ تجسس پر مبنی اور اصل سوچ سے جڑے رہیں۔