ہندوستانی فٹ بال ٹیم کے کپتان سنیل چھیتری نے کہا کہ انڈین سپر لیگ (آئی ایس ایل) اب ملک میں فٹ بال کی مقبولیت کو بڑھانے اور ہندوستانی ٹیم میں جگہ بنانے کی کوشش کرنے والے نوجوانوں کی حوصلہ افزائی میں مدد کرے گی۔

ہندوستانی فٹ بال ٹیم کے کپتان سنیل چھیتری نے کہا کہ انڈین سپر لیگ (آئی ایس ایل) اب ملک میں فٹ بال کی مقبولیت کو بڑھانے اور ہندوستانی ٹیم میں جگہ بنانے کی کوشش کرنے والے نوجوانوں کی حوصلہ افزائی میں مدد کرے گی۔ یہ آج تک کارآمد ثابت ہوا ہے اور لیگ کی سطح سال بہ سال بہتر ہو رہی ہے۔بنگلورایف سی کی قیادت کرنے والے چھیتری نے فٹ بال کے معیار میں بہتری پر روشنی ڈالی اور کہا کہ یہ ہندوستانی قومی ٹیم میں جگہ بنانے کی کوشش کرنے والے نوجوانوں کے لئے ایک تحریک ہے۔ انہوں نے سندیش جھنگن کی مثال دی جنہوں نے آئی ایس ایل میں کھیل کر اپنی سطح کو بہتر کیا ہے۔
 سنیل چھیتری نے کہا’’ہر سال بہتر کھلاڑیوں کی آمد سے لیگ کی سطح بھی بہتر ہو رہی ہے۔ سندیش جھنگن اس کی ایک مثال ہیں ۔ ایک نوجوان کے طور پر انہوں نے کورو، بارتھ اوگبیچے اور میکو جیسے کھلاڑیوں کے خلاف کھیل کر اپنے کھیل میں بہتری لائی۔آئندہ بھی اس لیگ سے ملک کیلئے بہتر کھلاڑی ملنے کی امید ہے۔آئی ایس ایل کھلاڑیوں کو اچھا پلیٹ فارم فراہم کر رہا ہے۔‘‘
 ہندوستانی فٹبال ٹیم کے کپتان کے خیالات کی تائید کرتے ہوئے حیدرآباد ایف سی کے ڈفینڈر چنگلینسانا سنگھ نے کہا کہ غیر ملکی کھلاڑیوں کے ساتھ ٹریننگ نے ہندوستانی کھلاڑیوں کو بہتر بنایا ہے۔ میرے خیال میں آئی ایس ایل نے پچھلے ۱۰؍برسوں میں بہت اچھا کام کیا ہے۔ جب آئی ایس ایل وجود میں آئی تو بہت سے غیر ملکی کھلاڑی آئے اور ہندوستانی کھلاڑیوں نے بڑے پیمانے پر ترقی کی۔ ہم جن کھلاڑیوں کے ساتھ کھیلتے ہیں ان کا معیار ملکی کھلاڑیوں کو ایمانداری سے مدد کرتا ہے اور آپ قومی ٹیم کے کھلاڑیوں کے نتائج دیکھ سکتے ہیں ۔
بنگلور ایف سی کے ہیڈ کوچ سائمن گریسن نے اس موقع پر کہا کہ اگر آپ کو لگتا ہے کہ آپ خطاب نہیں جیت سکتے تو ٹورنامنٹ میں جانے کا کوئی فائدہ نہیں ہے۔ ہم نے مقابلہ کی سطح کے لحاظ سے آئی ایس ایل میں بہترین ہونے کے اپنے عزائم طے کئے ہیں ۔ ہمارے پاس باصلاحیت نوجوانوں کا ایک گروپ ہے اور انہوں نے اس سال ہماری کامیابی میں بڑا کردار ادا کیا ہے۔ 
  واضح رہے کہ آئی ایس ایل کے دسویں سیزن کا آغاز ۲۱؍ستمبر کو ہوگا جب بنگلور ایف سی کا مقابلہ کوچی میں کیرالا بلاسٹرز سے ہوگا۔