اسپینش لیگ لالیگامیں بارسلونا فٹبال کلب نے ریئل میڈرڈ کو ۱۔۲؍گول سے شکست دی۔ خطاب کی طرف ایک اور قدم بڑھا دیا

بارسلونا فٹبال کلب نے اتوار کی دیر رات ہونے والے میچ میں ریئل میڈرڈ فٹبال کلب کو شکست دے کر ایل کلاسیکو مقابلے میں۱۰۰؍ویں کامیابی حاصل کرلی۔ اس جیت کے ساتھ ہی بارسلونا لالیگا کے خطاب کے قریب تر ہوگیا ہے۔  بارسلونا نے کیمپ ناؤ کے میدان پر جشن منا کر سیزن کی آخری ہسپانوی لیگ کے ایل کلاسیکومیچ کاخاتمہ کیا۔ ریئل  میڈرڈ نے اپنے اعزاز کو برقرار رکھنے کے تمام امکانات کو ختم کرنے کے بعد ریفرینگ کی  شکایت کی تھی۔
 بارسلونا نے اتوار کو میڈرڈ کو۱۔۲؍سے  شکست دینے  کے بعد۲۰۱۹ء کے بعد اپنا پہلا لیگ ٹائٹل جیتنے کی طرف ایک اوربڑا قدم اٹھایا ہے۔ فرینک کیسی نے اسٹاپیج ٹائم میں گول کرکے کتالونیا  کلب کو گھریلو فتح دلائی اور پوائنٹس ٹیبل پر ۱۲؍پوائنٹس کی واضح برتری دلائی ہے۔  فائنل سیٹی بجنے کے بعد بارسلونا کے کھلاڑیوں نے اپنے جوشیلے شائقین کے سامنے جشن منایا۔ خیال رہے کہ اب اسپینش لیگ لالیگا کا سیزن ختم ہونے کیلئے محض ۱۲؍میچ باقی رہ گئے ہیں۔
 بارسلونا کوویڈیو اسسٹنٹ ریفری (وی اے آر) نے لگاتار دوسرے میچ میں بچایاہےکیونکہ میڈرڈ کے پاس  برتری حاصل کرنے کا موقع تھا۔ یہ گول  مارکو ایسینسیو نے۸۱؍ویں منٹ میں کیا تھا لیکن یہ آف سائیڈ گول تھا۔ پچھلے ہفتے بارسلونا نے ایتھلیٹک بلباؤ کے کھلاڑی ایناکی ولیمز کے ۸۷؍ویں منٹ کئے گئےبرابری  کے گول کو بھی وی اے آر سے مسترد کروایا تھا۔
 ریئل میڈرڈفٹبال کلب کے کوچ کارلو اینسیلوٹی نے ایسنسیو کے گول کے بارے میں کہاکہ’’ہمیں ابھی تک یقین نہیں ہے کہ یہ آف سائیڈ گول تھا۔یہ صدفیصد آف سائیڈگول نہیں لگتا تھا۔ ہم اس شک کے ساتھ میڈرڈ واپس جائیں گے۔‘‘ دوسری طرف بارسلونا فٹبال کلب کے کوچ ژاوی ہرنانڈیز نے اس سے اتفاق نہیں کیا۔
 ژاوی ہرنانڈیزنے کہاکہ یہ واضح طور پر آف سائیڈ تھا، میں اینسیلوٹی کے تبصروں سے حیران ہوں۔ یہ یا تو آف سائیڈ ہے یا یہ نہیں ہے۔ کوئی بحث نہیں ہے۔ نتیجہ منصفانہ تھا۔
 بارسلونا کو اس میچ میں اب بھی تنقید کا سامنا کرنا پڑ رہا ہے کیونکہ اسے کئی برسوں میں ملک کی ریفرینگ کمیٹی کے سابق نائب صدر کو کئی ملین ڈالرس کی ادائیگیوں پر تنقید کا سامنا ہے۔ استغاثہ نے باضابطہ طور پر بارسلونا پر مبینہ بدعنوانی، فریب دہی اور دستاویزات میں جعلسازی کا الزام لگایا ہے۔ میڈرڈ ان کلبوں میں شامل ہے جو قانونی کارروائی میں بارسلونا کے خلاف ہے، جیسا کہ ہسپانوی حکومت، لیگ اور فٹبال فیڈریشن ہے۔ بارسلونا نے مستقل طور پر کسی بھی غلط کام یا مفادات کے تصادم کی تردید کی ہے  اور کہا ہے کہ اس نے ریفریوں پر تکنیکی رپورٹس کیلئے ادائیگی کی لیکن کھیلوں میں ان کے فیصلوں پر اثر انداز ہونے کی کبھی کوشش نہیں کی۔ریئل  میڈرڈفٹبال کلب کے گول کیپر تھیباؤٹ کورتیئس نے کہا کہ ہمیں ابھی تک یقین نہیں ہے کہ یہ آف سائیڈ تھا۔ہمیں ایماندار ہونا پڑے گا، یہ ۴؍ گیمز کا فائدہ ہے۔ یہ ناممکن نہیں ہے لیکن مشکل ضرور ہو گا۔‘‘
 بارسلونا نے۲۰۱۹ء تک۱۱؍ سیزن میں ۸؍ لیگ خطاب جیتے ہیں۔ یہ کلب ۲۰۲۰ء میں ریئل میڈرڈ کے بعد دوسرے نمبر پر رہا تھا۔ ایٹلیٹیکومیڈرڈ فٹبال کلب ۲۰۲۱ء میں چمپئن بنا اور لیونل میسی کے بغیر پچھلے سیزن میں کھیلنے والی بارسلونا کی ٹیم ،ریئل میڈرڈ  کے بعد  دوسرے نمبر پر رہی۔ یہ اپنے۲۷؍ ویں لیگ ٹائٹل کی تلاش میں ہے۔ اتوار کو میچ کے زیادہ تر حصے پر بارسلونا کا کنٹرول تھا، جس سے زیادہ تر اہم مواقع پیدا ہوئے۔
  مہمانوں نے ۹؍ویں منٹ میں بارسلونا کے محافظ رونالڈ آراؤجو کے خوش قسمتی سے اپنے گول کے ساتھ اسکورنگ کا آغاز کیا، جس نے دائرے  کے بائیں جانب سے میڈرڈکلب کے فارورڈ وینشیس جونیئر کے کراس پاس کے بعد ہیڈرکے ذریعے گیند کو جال میں بھیج دیا۔ سرگی رابرٹو نے ۴۵؍ ویں منٹ میں دائرے  کے اندر گیندکو جال میں پہنچا نےکےبعد برابری کی اور کیسی نے انجری ٹائم میں گول کرکے بارسلونا فٹبال کلب کو فاتح بنا دیا۔۳؍ ہفتوں سے بھی کم عرصے میں روایتی حریفوں کے درمیان یہ دوسرا میچ تھا۔ بارسلونا نے کوپا ڈیل رے کے سیمی فائنل کے پہلے مرحلے میں۳؍ مارچ کوسینٹیاگو برنابیو اسٹیڈیم میں ۰۔۱؍گول سے کامیابی حاصل کی تھی۔ کیمپ ناؤ میں واپسی کا مرحلہ ۵؍ اپریل ۲۰۲۳ءکو ہے۔