ویسٹ زون کے بلے باز چتیشور پجارا نے ۱۳۳؍رن بنائے۔ دلیپ ٹرافی ٹورنامنٹ کے سیمی فائنل میں ویسٹ زون نے سینٹرل پر ۳۸۴؍رن کی برتری حاصل کرلی ہے

 چتیشور پجارا (۱۳۳؍رن ) کی شاندار سنچری کی بدولت ویسٹ زون نے ۴؍ روزہ دلیپ ٹرافی ٹورنامنٹ کے تیسرے دن جمعہ کو سینٹرل زون کے خلاف اپنی دوسری اننگز میں ۹؍ وکٹ پر۲۹۲؍ رن بناکر ۳۸۴؍ رن کی اہم لیگ برتری حاصل کرلی۔ 
        کے سی اے کرکٹ گراؤنڈ میں ویسٹ زون کی پہلی اننگز کے اسکور۲۲۰؍رن کے جواب میں سینٹرل  زون کی ٹیم۱۲۸؍ رن پر ڈھیر ہوگئی۔ دوسری اننگز میں بھی ویسٹ زون  کے بلے بازوں نے شاندار کارکردگی کا مظاہرہ کیا لیکن پجارا کا انداز جمعہ کو مختلف تھا۔ پجارا نے اپنی قابل تعریف اننگز کے دوران۱۴؍ بار گیندوں کو باؤنڈری لائن کے پار پہنچایا ۔ وہ اننگز کے۹۲؍ویں اوور کی آخری گیند پر رن ​​آؤٹ ہوئے۔
   ان کی اننگز کا ہی نتیجہ تھا کہ ویسٹ زون نے سینٹرل کے خلاف زبردست برتری حاصل کر کے میچ پر اپنی گرفت مضبوط کر لی۔ پجارا کے علاوہ جمعہ کو کھیل کی اہم توجہ دھماکہ خیز بلے باز سوریہ کمار یادو (۵۲؍رن ) کی نصف سنچری تھی۔ انہوں نے اپنی اننگز میں صرف۵۸؍ گیندوں پر ۸؍ چوکے اور ایک چھکا لگایا۔سینٹرل زون کی جانب سے سوربھ کمار نے ۴؍ جبکہ سرنش جین نے۵۶؍ رن  کے عوض ۳؍ وکٹ حاصل  کئے۔
 ویسٹ زون نے۳؍ وکٹ پر۱۴۹؍ رن  سے دن کا آغاز کیا۔ اس وقت پجارا۵۰؍ رن پر بیٹنگ کر رہے تھے۔ انہوں نے۳۶۶؍ ​​منٹ کی اننگز میں۲۷۸؍ گیندوں کا سامنا کیا اور اس دوران انہوں نے۱۴؍ چوکے اور ایک چھکا لگایا۔ سینٹرل   زون نے دن کے پہلے ہی اوور میں سرفراز خان کو پویلین کی راہ دکھا کر دن کا اچھا آغاز کیا۔ سرفراز گزشتہ روز کے ۶؍ رن کے اسکور پر کوئی اضافہ کئے بغیر  اسپنر سوربھ کمار کی گیند پر وکٹ کیپر اوپیندر یادو کے ہاتھوں کیچ آؤٹ ہوگئے۔ اس کے بعد وکٹ کیپر ہیت ​​پٹیل (۲۷؍رن) نے پجارا کے ساتھ ۵؍ویں وکٹ کیلئے ۴۷؍ رن کی شراکت کی۔اس دوران پجارا نے احتیاط سے بیٹنگ پر توجہ دی اور رن بنائے۔