مانچسٹر سٹی کلب نے افتتاحی میچ میں برنلے کلب کو اس کے ہی میدان پر شکست دی

 جمعہ کی دیر رات سے انگلش پریمیر لیگ کے نئے سیزن کا آغاز ہوگیا اور اپنے افتتاحی میچ میں دفاعی چمپئن مانچسٹر سٹی فٹبال کلب نے شاندار کامیابی سے شروعات کی۔ مانچسٹر سٹی نے برنلے کے میدان پر ہی  اسے ۰۔۳؍گول سے شکست دے کر پورے ۳؍ پوائنٹس حاصل کئے۔ اس میچ میں سٹی کی ٹیم نے شروعات ہی سے حملے کئے۔
 ارلنگ ہالینڈ نےنئے سیزن کا آغاز بھی شاندار انداز میں کیا اور ۲؍گول کئے۔ انہوں نے میچ کے چوتھے منٹ ہی میں پہلا گول کیا۔ اس کے بعد ۳۶؍ ویں منٹ میں انہوں نے ٹیم اور اپنا دوسرا گول کیا۔ پہلے گول میں ان کی مدد راڈری نے کی اور دوسرے گول میں جے الواریز نے مدد کی۔ میچ کے ۷۵؍ویں منٹ میں راڈری نے مانچسٹر سٹی کا تیسرا گول کرکے ٹیم کی فتح یقینی بنادی۔ سنیچر کو ہی ای پی ایل کے ایک اور میچ میں آرسنل فٹبال کلب  نے ناٹنگھم شائر کو ۱۔۲؍ گول سے شکست دے کر ۳؍پوائنٹس حاصل کئے۔ این کیتیا اور باکوساکا نے آرسنل کیلئے ایک ایک گول کیا۔