آسٹریلیا کے تجربہ کار تیز گیند باز مچل اسٹارک نے جنوبی افریقہ کے خلاف شاندار کارکردگی کی بدولت ایک بار پھر آئی سی سی ٹیسٹ بولنگ رینکنگ میں پہلی پوزیشن حاصل کرلی ہے۔

آسٹریلیا کے تجربہ کار تیز گیند باز مچل اسٹارک نے جنوبی افریقہ کے خلاف شاندار کارکردگی کی بدولت ایک بار پھر آئی سی سی ٹیسٹ بولنگ رینکنگ میں پہلی پوزیشن حاصل کرلی ہے، جبکہ ہندوستانی کپتان شریاس ایر نے ٹی ۲۰؍ انٹرنیشنل بلے بازوں کی تازہ ترین درجہ بندی میں دو مقام کی ترقی کرتے ہوئے ساتویں پوزیشن پر قبضہ جما لیا ہے۔ انٹرنیشنل کرکٹ کونسل (آئی سی سی) کی جانب سے بدھ کو جاری کردہ  تازہ رینکنگ میں ٹیسٹ، ون ڈے اور ٹی ۲۰؍ تینوں فارمیٹس کے متعدد کھلاڑیوں کی پوزیشن میں تبدیلی دیکھنے کو ملی ہے۔ 
مچل اسٹارک نے جنوبی افریقہ کے خلاف کیپ ٹاؤن میں کھیلے گئے تین ٹیسٹ میچوں کی سیریز کے تیسرے اور آخری مقابلے میں مجموعی طور پر ۹؍ وکٹیں حاصل کیں۔ ان کی اس شاندار کارکردگی نے انہیں ایک مقام کی ترقی دلاتے ہوئے ٹیسٹ گیند بازوں کی فہرست میں دوبارہ پہلے نمبر پر پہنچا دیا۔ اسٹارک نے اس میچ کی پہلی اننگز میں ۷۲؍ رن دے کر ۶؍ وکٹیں حاصل کی تھیں، جبکہ دوسری اننگز میں بھی ان کی گیند بازی مؤثر رہی۔
اسٹارک نے اس سے قبل اگست میں پہلی مرتبہ ٹیسٹ گیند بازوں کی عالمی درجہ بندی میں نمبر ایک مقام حاصل کیا تھا، جب انہوں نے ہندوستان کے جسپریت بمراہ کو پیچھے چھوڑا تھا  تاہم، جنوبی افریقہ کے مارکو جانسن نے گکیبرہا میں دوسرے ٹیسٹ کے دوران ۶؍ وکٹیں حاصل کرکے یہ مقام اپنے نام کرلیا تھا۔ کیپ ٹاؤن ٹیسٹ میں جانسن صرف ۳؍ وکٹیں حاصل کرسکے، جس کے نتیجے میں اسٹارک نے دوبارہ پہلی پوزیشن حاصل کرلی۔ اس مرتبہ انہوں نے کیریئر کی بہترین ۸۸۱؍ ریٹنگ بھی حاصل کی ہے۔ جنوبی افریقہ کے آف اسپنر سائمن ہارمر نے بھی تازہ ٹیسٹ رینکنگ میں نمایاں ترقی کی ہے۔ کیپ ٹاؤن ٹیسٹ میں انہوں نے آسٹریلیا کی دوسری اننگز میں ۶؍ وکٹیں حاصل کرکے اپنی ٹیم کی کامیابی اور سیریز جیتنے میں اہم کردار ادا کیا۔ اس کارکردگی کے نتیجے میں وہ ۹؍ مقام کی چھلانگ لگاکر ٹیسٹ گیند بازوں کی فہرست میں ساتویں نمبر پر پہنچ گئے ہیں۔ انہوں نے اپنے ہم وطن کگیسو ربادا کو بھی پیچھے چھوڑ دیا ہے۔اگرچہ مارکو جینسن ٹیسٹ گیند بازوں کی فہرست میں پہلی پوزیشن سے محروم ہوگئے، لیکن آل راؤنڈرز کی درجہ بندی میں ان کی برتری مزید مضبوط ہوئی ہے۔ تیسرے ٹیسٹ میں نصف سنچری بنانے کے بعد انہوں نے کیریئر کی بہترین ریٹنگ حاصل کی۔ جنوبی افریقہ کے ویان ملڈر ایک مقام ترقی کرکے تیسرے اور سائمن ہارمر تین مقام آگے بڑھ کر پانچویں نمبر پر پہنچ گئے ہیں۔ 

یہ بھی پڑھئے:پاکستان کا سری لنکا کے خلاف ہوم ٹیسٹ سیریز کے لیے نیا منصوبہ

ٹیسٹ بلے بازوں کی تازہ درجہ بندی میں بھی جنوبی افریقی کھلاڑیوں نے ترقی کی ہے۔ ایڈن مارکرم ایک مقام آگے بڑھ کر ۱۱؍ ویں نمبر پر پہنچ گئے، جبکہ ویان ملڈر نے ۷؍ مقام کی چھلانگ لگاکر ۱۷؍ ویں پوزیشن حاصل کرلی۔ ریان رکلٹن کی کارکردگی سب سے زیادہ نمایاں رہی، جنہوں نے ۲۵؍ مقام کی ترقی کرتے ہوئے ۲۳؍ ویں پوزیشن حاصل کی اور کیریئر کی بہترین ریٹنگ بھی اپنے نام کی۔آسٹریلیا کے کیمرون گرین تین مقام اور ایلکس کیری دو مقام آگے بڑھ کر مشترکہ طور پر ۱۹؍ ویں نمبر پر پہنچ گئے۔ ویسٹ انڈیز کے جسٹن گریوز نے بنگلہ دیش کے خلاف پہلے ٹیسٹ میں اپنی ٹیم کی ۸؍ وکٹوں سے کامیابی کے بعد ۱۲؍ مقام کی ترقی کی اور مشترکہ طور پر ۳۸؍ ویں پوزیشن حاصل کی۔ ویسٹ انڈیز کے جومیل ویرکن ٹیسٹ گیند بازوں میں چھ مقام آگے بڑھ کر ۳۰؍ ویں نمبر پر پہنچ گئے، جبکہ روسٹن چیز آل راؤنڈرز کی فہرست میں آٹھ مقام کی ترقی کے بعد مشترکہ طور پر ۲۳؍ ویں پوزیشن پر آگئے۔ 
پاکستان میں حال ہی میں مکمل ہونے والی ون ڈے سہ فریقی سیریز کے اثرات بھی آئی سی سی کی تازہ درجہ بندی میں نمایاں ہوئے ہیں۔ پاکستان کے کپتان اور تیز گیند باز شاہین شاہ آفریدی ایک مقام کی ترقی کے ساتھ ون ڈے گیند بازوں کی فہرست میں پانچویں نمبر پر پہنچ گئے ہیں، جبکہ حارث رؤف نے پانچ مقام کی چھلانگ لگاکر ۲۴؍ ویں پوزیشن حاصل کرلی ہے۔ ون ڈے بلے بازوں کی درجہ بندی میں پاکستان کے فخر زمان نے ۹؍ مقام کی ترقی کرتے ہوئے ۳۷؍ ویں پوزیشن حاصل کی۔ انگلینڈ کے بین ڈکٹ ایک مقام آگے بڑھ کر چھٹے نمبر پر پہنچ گئے، جبکہ سری لنکا کے پون رتنائیکے نے ۲۰؍ مقام کی بڑی چھلانگ لگاتے ہوئے ۱۶؍ ویں پوزیشن حاصل کی۔ 

یہ بھی پڑھئے:’بزدلی اور آمریت‘، ’’ستلج‘‘ کے ہدایت کار ہنی تریہن نئی سینسر بورڈ گائیڈ لائنز پر برہم

 ٹی ۲۰؍ انٹرنیشنل بلے بازوں کی تازہ درجہ بندی میں ہندوستانی کپتان شریاس ایر نے دو مقام کی ترقی کرتے ہوئے ساتویں پوزیشن حاصل کرلی ہے۔ نیوزی لینڈ کے خلاف سیریز میں ہندوستان کی کامیابی کے بعد ایر کو رینکنگ میں یہ فائدہ پہنچا ہے۔ نیوزی لینڈ کے گلین فلپس نے بھی ۱۳؍ مقام کی ترقی کرتے ہوئے ٹی ۲۰؍ بلے بازوں کی فہرست میں ۲۴؍ ویں پوزیشن حاصل کرلی ہے۔
ٹی ۲۰؍ گیند بازوں کی فہرست میں نیوزی لینڈ کے مچل سینٹنر دو مقام آگے بڑھ کر پانچویں نمبر پر پہنچ گئے، جبکہ جیکب ڈفی نے ۲۳؍ مقام کی بڑی چھلانگ لگاکر ۲۳؍ ویں پوزیشن حاصل کی۔ افغانستان کے آل راؤنڈر عظمت اللہ عمرزئی نے بھی ٹی ۲۰؍ آل راؤنڈرز کی درجہ بندی میں تین مقام کی ترقی کی ہے۔ زمبابوے کے خلاف متحدہ عرب امارات میں کھیلی گئی حالیہ سیریز میں شاندار کارکردگی اور پلیئر آف دی سیریز کا اعزاز حاصل کرنے کے بعد وہ اس فہرست میں تیسرے نمبر پر پہنچ گئے ہیں۔ آئی سی سی کی تازہ رینکنگ سے واضح ہوتا ہے کہ حالیہ ٹیسٹ اور محدود اوورز کی سیریز میں کھلاڑیوں کی کارکردگی نے عالمی درجہ بندی میں اہم تبدیلیاں پیدا کی ہیں۔ اسٹارک کی دوبارہ نمبر ایک پوزیشن، شریاس ایّر کی ٹی ۲۰؍ میں ترقی اور پاکستانی گیند بازوں کی ون ڈے رینکنگ میں بہتری اس تازہ اپ ڈیٹ کے نمایاں پہلو ہیں۔