رائل چیلنجرزبنگلور کے مقابلے آئی پی ایل کے میچ میں راجستھان رائلز کا پلڑا بھاری۔

راجستھان رائلز(آر آر) جے پور کے سوائی مان سنگھ اسٹیڈیم میں رائل چیلنجرز بنگلور(آر سی بی) کے خلاف کھیلے گی۔ راجستھان رائلز نے ٹورنامنٹ کے آغاز میں لگاتار ۳؍ میچ جیتے ہیں جس کی وجہ سے ان کے اعتماد میں اضافہ ہوا ہے۔ وہ فی الحال پوائنٹس ٹیبل پر ۳؍ میچوں میں ۶؍ پوائنٹس اور۱ء۲۴۹+ کے نیٹ رن ریٹ کے ساتھ دوسرے نمبر پر ہیں۔ ایسے میں وہ ایک بار پھر جیتنے کیلئے تیار ہوں گے۔ 
 دوسری طرف، رائل چیلنجرز بنگلور کو اپنے گھریلو میچوں میں کے کے آر اور ایل ایس جی کے خلاف لگاتار شکستوں کا سامنا کرنا پڑا۔ لکھنؤ کے خلاف اپنے آخری میچ میں انہیں ۲۸؍ رن سے شکست ہوئی تھی۔ ۴؍ میچوں میں ایک جیت اور تین ہار کے ساتھ، آر سی بی فی الحال پوائنٹس ٹیبل پر۸؍ویں نمبر پر ہے۔ 
 خطاب کے دعویدار کے طور پر راجستھان رائلز نے ۲۰۲۴ء کے سیزن میں اب تک شاندار کارکردگی کا مظاہرہ کیا ہے۔ اس کے ساتھ ہی رائل چیلنجرز بنگلور کی مہم کا آغاز اب تک مایوس کن رہا ہے۔ دونوں ٹیموں کے درمیان کھیلے جانےوالے آخری۵؍ میچوں میں سے آر سی بی نے۳؍  میچ جیتے ہیں جبکہ آر آر نے صرف ۲؍ میچ جیتے ہیں۔ یہ وہی سوائی مان سنگھ اسٹیڈیم ہے جہاں یہ دونوں ٹیمیں اب تک۸؍ میچ کھیل چکی ہیں اور دونوں نے ۴۔ ۴؍ میچ جیتے ہیں۔ 
 سوائی مان سنگھ اسٹیڈیم، جو پہلے چوگن اسٹیڈیم کے نام سے جانا جاتا تھا، آئی پی ایل۲۰۲۴ء میں اس مقام پر ہونے والے کل ۵؍ میچوں میں سے سیزن کے اپنے تیسرے میچ کی میزبانی کر رہا ہے۔ جے پور کے سوائی مان سنگھ اسٹیڈیم میں کھیلے جانے والے ۵۴؍ میچوں میں، ہدف کا تعاقب کرنے والی ٹیم نے۶۲ء۹۶؍ فیصد مرتبہ کامیابی حاصل کی ہے، جب کہ پہلے بیٹنگ کرنے والی ٹیم صرف۳۷ء۰۴؍فیصد میچ جیت سکی ہے۔ سوائی مان سنگھ اسٹیڈیم کی پچ بیٹنگ کے لئے مشہور ہے، جس کی وجہ سے حالیہ آئی پی ایل سیزن میں بہت سے زیادہ اسکورنگ میچ ہوئے۔ بولنگ میں راجستھان کا پلڑا بھاری ہے جس میں تجربہ کار لیگ اسپنر یزویندر چہل کے علاوہ تیز گیند باز ٹرینٹ بولٹ اور آندرے برجر ہیں۔ ان تینوں نے مل کر ۱۶؍ وکٹ لئے ہیں۔ تجربہ کار روی چندرن اشون بھی ان میں شامل ہیں۔