کرن جوہر نے تصدیق کی ہے کہ ڈیوڈ دھون ’’ہے جوانی تو عشق ہونا ہے‘‘ کے بعد فلمی دنیا سے ریٹائر ہوجائیں گے۔ کرن نے جذباتی انداز میں ڈیوڈ دھون کے طویل اور کامیاب کریئر کو خراج تحسین پیش کیا۔ اس فلم میں ورون دھون، پوجا ہیگڑے اور مرنال ٹھاکر مرکزی کرداروں میں ہیں۔

بالی ووڈ کے معروف کامیڈی فلمساز ڈیوڈ دھون کے بارے میں جاری قیاس آرائیوں کے درمیان اب یہ تقریباً واضح ہو گیا ہے کہ ان کی آنے والی فلم ’’ہے جوانی تو عشق ہونا ہے‘‘ ان کے کریئر کی آخری فلم ثابت ہو سکتی ہے۔ کئی دہائیوں تک ہندی سنیما میں کامیڈی اور خاندانی تفریح ​​کو نئی پہچان دینے والے ڈیوڈ دھون نے متعدد سپر ہٹ فلمیں دیں، جنہوں نے نہ صرف باکس آفس پر کامیابی حاصل کی بلکہ پاپ کلچر کا حصہ بھی بن گئیں۔ اب اطلاعات کے مطابق وہ فلمی دنیا سے ریٹائرمنٹ لینے کی تیاری کر رہے ہیں۔ دلچسپ بات یہ ہے کہ اس خبر کی تصدیق سب سے پہلے نہ تو خود ڈیوڈ دھون نے کی اور نہ ہی ان کے بیٹے ورون نے بلکہ کرن جوہر نے انسٹاگرام پر ایک جذباتی پوسٹ کے ذریعے اس کا انکشاف کیا۔

یہ بھی پڑھئے : ممبئی صرف خواب نہیں دکھاتا بلکہ انہیں پورا کرنے کی طاقت بھی دیتا ہے: شریا

کرن جوہر نے اپنی پوسٹ میں لکھا کہ ’’کل جب میں ڈیوڈ جی کی تقریب میں گیا اور انہوں نے مجھے بتایا کہ یہ ان کی آخری فلم ہونے والی ہے، تو میرے دل میں ایک عجیب اداسی پیدا ہوئی۔ یہاں ایک ایسا فلمساز ہے جس نے تفریح ​​کی ایک پوری صنف تخلیق کی۔‘‘ انہوں نے مزید کہا کہ ’’ڈیوڈ دھون نام ہی تفریح، کامیڈی اور خالص بالی ووڈ انٹرٹینمنٹ کی علامت ہے۔ بے شمار فلمساز ان سے متاثر ہوئے ہیں۔ ہماری برادری میں ان کا بہت احترام کیا جاتا ہے اور انہیں بہت پسند کیا جاتا ہے۔‘‘ 

کرن جوہر کی پوسٹ کے بعد سوشل میڈیا پر ڈیوڈ دھون کے فلمی سفر پر بڑی تعداد میں تبصرے سامنے آنے لگے۔ مداحوں نے ان کی فلموں جیسے ’’قلی نمبر ون‘‘، ’’بیوی نمبر ون‘‘، ’’ہیرو نمبر ون‘‘ اور ’’پارٹنر‘‘ کو یاد کرتے ہوئے انہیں بالی ووڈ کامیڈی کا ’’سنہری دور‘‘ قرار دیا۔ واضح رہے کہ ’’ہے جوانی تو عشق ہونا ہے‘‘ میں ورون دھون کے ساتھ پوجا ہیگڑے اور مرنال ٹھاکر مرکزی کردار ادا کر رہے ہیں۔ فلم میں مونی رائے، منیش پال، راکیش بیدی اور راجیش کمار بھی اہم کرداروں میں ہیں۔

یہ بھی پڑھئے : بھوپال میں’’ پیڈی‘‘ کی آواز کنسرٹ میں اے آر رحمان اور رام چرن کی شرکت

یہ فلم ڈیوڈ دھون اور ورون دھون کے درمیان چوتھا اشتراک ہوگی۔ اس سے قبل دونوں ’’میں تیرا ہیرو‘‘، ’’جڑواں ۲‘‘ اور ’’قلی نمبر ون‘‘ میں ایک ساتھ کام کر چکے ہیں۔ اگرچہ ڈیوڈ دھون نے اپنے کریئر میں کئی بڑی کامیابیاں حاصل کیں، لیکن گزشتہ برسوں میں ان کی چند فلمیں تنقید اور باکس آفس ناکامی کا بھی شکار رہیں۔ اس کے باوجود، انہیں ہندی سنیما میں ماس انٹرٹینمنٹ اور کامیڈی فلموں کے سب سے اہم ناموں میں شمار کیا جاتا ہے۔ ’’ہے جوانی تو عشق ہونا ہے‘‘ ۴؍ جون کو سنیما گھروں میں ریلیز ہوگی۔