ہندوستان کی خاتون مکے باز نے شاندار کارکردگی کا مظاہرہ کرتے ہوئے ورلڈ چمپئن ایکاتیرنا کو دھول چٹا دی

  ہندوستانی مکے باز نکہت زرین  ترکی کے استنبول میں جاری بوسفورس مکے بازی مقابلے میں موجودہ عالمی چمپئن پلٹسیوا ایکاتیرنا کو شکست دے کر ۵۱؍کلوگرام کیٹگری کے کوارٹرفائنل میں پہنچ گئیں۔ ایشین چمپئن شپ کی برونز میڈلسٹ زرین نے ٹورنامنٹ کے دوسرے دن بڑاالٹ پھیر کرتے ہوئے روسی مکے باز کوصفر۔۵؍سے کراری شکست دی۔ زرین کا اب کوارٹر فائنل میں ۲؍بار کی سابق عالمی چمپئن قزاخستان کی مکے باز کی جیبے ناظم سے مقابلہ ہوگا۔ زرین کے علاوہ ۲۰۱۳ءکے ایشین چمپئن شیوا تھاپا، سونیا لاٹھر اور پروین نے اپنے اپنے مقابلوں میں جیت حاصل کرکے آخری۸؍ مقابلوں میں جگہ بنالی۔آسام کے مکے باز تھاپا نے قزاخستان کے سمگلو باگھتیوف کو۲۔۳؍سے شکست دے کر مردوں کے ۶۳؍کلوگرام کیٹگری کے آخری ۸؍ میں جگہ بنائی جبکہ عالمی چمپئن  شپ کی برونز میڈلسٹ لاٹھر (۵۷) اور پروین (۶۰) نے مقامی مکے بازوں سسرمینیلی تنگسیناز اور اوزیول ایسرا کو  صفر۔پانچ سے ہراکر آخری آٹھ میں جگہ بنائی۔
 اس درمیان دریودھن نیگی (۶۹)، برجیش یادو (۸۱) اور کرشن شرما (۹۱+) کو ابتدائی راؤنڈ میں ہی شکست کاسامنا کرنا پڑا۔