ناروے چیس ۲۰۲۶ء کے آٹھویں راؤنڈ میں پراگنانندھا رمیش بابو نے ایک بار پھر میگنس کارلسن کو شکست دے کر شاندار کامیابی حاصل کی۔ اس فتح کے بعد ٹائٹل کی دوڑ میں ان کی پوزیشن مزید مضبوط ہو گئی ہے۔

ناروے چیس ۲۰۲۶ء کے آٹھویں راؤنڈ میں پراگنانندھا رمیش بابو نے ایک بار پھر میگنس کارلسن کو شکست دے کر شاندار کامیابی حاصل کی۔ اس فتح کے بعد ٹائٹل کی دوڑ میں ان کی پوزیشن مزید مضبوط ہو گئی ہے۔۲۰؍ سالہ ہندوستانی کھلاڑی نے گزشتہ ہفتے سفید مہروں کے ساتھ کارلسن کو ہرایا تھا، جبکہ آٹھویں راؤنڈ میں سیاہ مہروں کے ساتھ کامیابی حاصل کر کے انہوں نے اپنی برتری کو دُہرایا۔
اس کامیابی کے ساتھ پراگنانندھا، ہندوستان کے عظیم شطرنج ماسٹر وشوناتھن آنند کے بعد، ایک ہی ٹورنامنٹ میں کارلسن کو دو مرتبہ شکست دینے والے صرف دوسرے کھلاڑی بن گئے ہیں۔ وہ ان منتخب کھلاڑیوں کے گروپ میں بھی شامل ہو گئے ہیں جنہوں نے پانچ بار کے عالمی چیمپئن کو کلاسیکل شطرنج میں تین بار شکست دی ہے۔
علی رضا فیروزجا نے عالمی چیمپئن گوکیش ڈوماراجو کے خلاف ایک اہم کلاسیکل کامیابی حاصل کی۔ سفید مہروں کے ساتھ کھیلتے ہوئے، فیروزجا نے وقت کے دباؤ میں ایک سنسنی خیز اینڈ گیم کو کامیابی سے مکمل کیا اور قیمتی فتح اپنے نام کی۔ اس کامیابی کے بعد وہ ٹورنامنٹ لیڈر ویسلے سو سے صرف ایک پوائنٹ پیچھے رہ گئے ہیں۔ ویسلے سو اور ونسنٹ کیمر کے درمیان کلاسیکل مقابلہ ڈرا رہا، تاہم بعد میں آرمگیڈن ٹائی بریک میں ویسلے سو نے کامیابی حاصل کر کے اضافی پوائنٹ حاصل کیا اور اپنی برتری برقرار رکھی۔

Pragg beats Magnus with 98.1% accuracy and secures 3rd place after 8 rounds at Norway Chess 💪 #NorwayChess pic.twitter.com/SeVAiaq9TY

— Norway Chess (@NorwayChess) June 2, 2026

۸؍ویں راؤنڈ کے اختتام پر ویسلے سو ۱۴؍ پوائنٹس کے ساتھ ناروے چیس کی درجہ بندی میں سرفہرست ہیں۔ علی رضا فیروزجا ۱۳؍ پوائنٹس کے ساتھ دوسرے نمبر پر ہیں، جبکہ پراگنانندھا ۱۲؍ پوائنٹس کے ساتھ مضبوط دعوے دار بنے ہوئے ہیں، جس سے آخری راؤنڈز سے قبل ٹائٹل کی دوڑ انتہائی دلچسپ ہو گئی ہے۔
ناروے چیس ویمنز کے آٹھویں راؤنڈ میں دو فیصلہ کن کلاسیکل مقابلے اور ایک آرمگیڈن ٹائی بریک کھیلا گیا، جس میں بیبی سارا اساؤبایوا نے اپنی برتری مزید بڑھا لی۔ اساؤبایوا نے دیویا دیشمکھ کے خلاف اہم کلاسیکل فتح حاصل کی۔ سیاہ مہروں کے ساتھ کھیلتے ہوئے انہوں نے دباؤ کا بھرپور مقابلہ کیا اور دیویا کے وقت کی کمی کا فائدہ اٹھاتے ہوئے مکمل پوائنٹس حاصل کیے۔

یہ بھی پڑھئے:’’یوفوریا‘‘ سیزن ۳؍ کے ساتھ ختم، ایچ بی او کی تصدیق

ژو جنر نے موجودہ خواتین عالمی چیمپئن جو وین جون کو شکست دے کر ایک بڑی کلاسیکل کامیابی حاصل کی۔ انہوں نے پورے اینڈ گیم کے دوران مسلسل دباؤ برقرار رکھا اور آخر میں اپنی برتری کو فتح میں تبدیل کرتے ہوئے دیویا دیشمکھ کے برابر ۱۰؍ پوائنٹس حاصل کر لیے۔ اینا موزیچک اور ہمپی کونیرو کا کلاسیکل مقابلہ ڈرا رہا۔ آرمگیڈن ٹائی بریک میں بھی سخت مقابلہ دیکھنے میں آیا، لیکن آخرکار ہمپی کونیرو نے سیاہ مہروں کے ساتھ کامیابی حاصل کر کے اضافی پوائنٹ اپنے نام کیا۔

یہ بھی پڑھئے:ہندوستان کے لیے تاریخی لمحہ: کیرالا کے فٹبالر تحسین محمد جمشید قطر کی ورلڈ کپ ٹیم میں

آٹھویں راؤنڈ کے بعد بیبی سارا اساؤبایوا ۵ء۱۵؍ پوائنٹس کے ساتھ خواتین کی درجہ بندی میں پہلے نمبر پر ہیں۔ اینا موزیچک ۵ء۱۰؍ پوائنٹس کے ساتھ دوسرے نمبر پر ہیں، جبکہ دیویا دیشمکھ اور ژو جنر ۱۰۔۱۰؍ پوائنٹس کے ساتھ مشترکہ طور پر تیسرے مقام پر موجود ہیں۔